Zofari Vutulaka Dyaka
Zofari ke vutula na vwanzi ya yandi mosi, yandi ke songa kununga ya nkufi ya muntu ya yimbi: yandi ke mina bimvwama mpe ke luka yawu, ke bumba yimbi na nsi ya ludimi ya yandi tii yawu ke kuma misa ya mpidi. Yandi ke tuba ti yayi kele kabu yina Nzambi ke kabula, mpe yandi ke pesa kima ya nkaka ve.
20 1Na yina, Zofari mu-Naama vutulaka: 2«Ni yawu yina mabanza ya munu ya mpasi ke pusa munu na kuvutula, samu na vwanzi yina kele na kati ya munu. 3Mu ke kuwa ndumunu yina ke vweza munu, mpe na mayela ya munu, mpeve ke pusa munu na kuvutula mvutu. 4Ya tsyelika, nge me zaba mutindu yawu vwandaka kubanda na ntangu ya ntama, kubanda ntangu ba tulaka muntu na ntoto: 5kununga ya bantu ya yimbi kele ya nkufi, mpe kyese ya muntu yina ke zitisaka Nzambi ve ke zinga kaka mwa ntangu fyoti. 6Ata lunangu ya yandi ke kuma tii na mazulu, mpe ntu ya yandi ke simba matuti, 7yandi ke fwa seko, mutindu matufi ya yandi mosi; bayina talaka yandi ke yufula: “Yandi kele wapi?” 8Yandi ke pumbuka mutindu ndosi, ba ke mona yandi dyaka ve, ba ke kukula yandi mutindu lumoni ya mpimpa. 9Disu yina talaka yandi ke tala yandi dyaka ve; kisika ya yandi ke tala yandi dyaka ve. 10Bana ya yandi ke bondila bansukami; maboko ya yandi mosi fwana kuvutula bimvwama ya yandi. 11Ngolo ya bumwana yina ke fuluka na mikwa ya yandi ke lala ti yandi na putulu. 12Ata yimbi kele ya kitoko na yinwa ya yandi, mpe yandi ke bumba yawu na nsi ya ludimi ya yandi, 13ata yandi ke manga kubika yawu mpe yandi ke bumba yawu na yinwa ya yandi, 14kasi madya ya yandi ke kuma nkunzu na kivumu ya yandi; yawu ke kuma misa ya bampidi na kati ya yandi. 15Yandi ke mina bimvwama kasi yandi ke luka yawu; Nzambi ke basisa yawu na divumu ya yandi. 16Yandi ke nwa pwazon ya bampidi; meno ya mpidi ke kufwa yandi. 17Yandi ke tala ata fyoti ve mizumba ya maza, banzadi yina ke kwenda na mafuta ya nyosi mpe folomaze. 18Yandi fwana kuvutula mbuma ya kisalu ya yandi ya mpasi, yandi ke mina yawu ve; yandi ke sepela na ndandu ya mumbungu ya yandi ve. 19Samu ti yandi fyataka mpe yandi bikaka bansukami; yandi botolaka yinzo yina yandi tungaka ve. 20Samu ti divumu ya yandi zabaka ngemba ve, yandi ke kima ve na bima yina yandi vwandaka zola mingi. 21Ata kima mosi bikanaka ve samu na yandi kudya; na yina, kimvwama ya yandi ke zingila ve. 22Na kati ya bimvwama ya yandi mingi, mpasi ke kwizila yandi; kiyeko nyonso ya misepa ke bwila yandi. 23Ntangu yandi me fulusa divumu ya yandi, Nzambi ke fidisa nkele ya yandi ya ngolo na zulu ya yandi, mpe ke nokisa yawu na zulu ya yandi bonso madya ya yandi. 24Ata yandi ke kima na binwanunu ya kibende, dikonga ya mbengi ke tobola yandi. 25Yandi ke katula yawu, mpe yawu ke basika na nzutu ya yandi; disongi ya yawu ya kungenga ke basika na nkeni ya yandi. Boma ya nene ke bwila yandi. 26Kitombe ya mvimba ke vingila bimvwama ya yandi; tiya yina muntu pelisaka ve ke manisa yandi na kudya mpe ke dya yina me bikana na tenta ya yandi. 27Mazulu ke monisa mbi ya yandi, mpe ntoto ke telama samu na kunwana yandi. 28Bimvwama nyonso ya yinzo ya yandi, ba ke nata yawu, yawu ke mwangana na kilumbu ya nkele ya Nzambi. 29Yayi ni kikunku ya muntu ya yimbi yina ke katuka na Nzambi, mvwilu yina Nzambi me tudila yandi.»