Job 21 FHB Father's Heart Bible™

21 ¹Mgbe ahụ, Job zara sị: ²“Gee ntị nke ọma na okwu m, ka nke a bụrụ nkasiobi unu na-enye m. ³Nwee ndidi nʼebe m nọ ka m na-ekwu okwu, mgbe m kwuchara, unu nwere ike ịga nʼihu na-akwa m emo. ⁴Ma mụ onwe m, ọ bụ megide mmadụ efu ka mkpesa m dị? Gịnị mere ndidi m agaghị eji gwụ? ⁵Leenụ m anya ka ihe ịtụnanya tụọ unu, werekwanụ aka unu kpuchie ọnụ unu. ⁶Mgbe m chetara ya, egwu na-atụ m, ịma jijiji na-ejidekwa anụ ahụ m. ⁷Gịnị mere ndị ajọ omume ji na-adịgide ndụ, na-aka nka ma na-abawanye nʼike? ⁸Ụmụ ha guzosiri ike nʼudo nʼebe ha nọ, nʼihu anya ha, ụmụ ụmụ ha nọkwa nʼihu anya ha. ⁹Ụlọ ha dị nʼudo, nọkwa na-enweghị egwu, mkpara Chineke adịghịkwa adakwasị ha. ¹⁰Oke ehi ha na-agba mkpa, ọ dịghị emehie; nne ehi ha na-amụ nwa, ọ dịghịkwa akwafu ime. ¹¹Ha na-ahapụ ụmụ ha ntakịrị ka ha na-agbagharị ka igwe atụrụ, ụmụaka ha na-awụgharịkwa elu. ¹²Ha na-abụ abụ nʼụda ịgbà na ụbọ akwara na-aṅụrịkwa ọṅụ nʼụda ọjà. ¹³Ha na-eji ọganihu na-anọ ụbọchị ndụ ha, ha na-arịdakwa nʼili nʼudo. ¹⁴Ma ha na-asị Chineke, ‘Hapụ anyị aka! Anyị enweghị ọchịchọ ịmara ụzọ gị. ¹⁵Onye ka Onye pụrụ ime ihe niile bụ, nke anyị ga-eji fee ya? Gịnịkwa ka anyị ga-erite site nʼikpe ekpere nye ya?’ ¹⁶Ma ọganihu ha adịghị nʼaka ha onwe ha; achọghị m inwe ihe ọbụla gbasara ndụmọdụ ndị ajọ omume. ¹⁷Ugboro ole ka a na-emenyụ oriọna ndị ajọ omume? Ugboro ole ka ọdachi ha na-adakwasị ha? Ugboro ole ka Chineke na-ekenye mmekpa ahụ nʼiwe ya? ¹⁸Ugboro ole ka ha dị ka ahịhịa akọrọ nʼihu ifufe, dị ka igbugbo ọka nke oke ifufe na-ebufu? ¹⁹Unu na-asị, ‘Chineke na-echekwara ụmụ mmadụ ntaramahụhụ nke e kwesịrị ịta ya.’ Ka ọ kwụghachi mmadụ ahụ nʼonwe ya, ka ọ mụta ya. ²⁰Ka anya ya hụ mbibi ya, ka ọ ṅụọkwa oke iwe nke Onye pụrụ ime ihe niile. ²¹Nʼihi na gịnị ka ọ na-eche banyere ezinụlọ ya nke ọ hapụrụ nʼazụ ya, mgbe e belatara ọnwa ndụ ya? ²²Mmadụ ọ pụrụ izi Chineke ihe ọmụma, ebe ọ bụ ya na-ekpe ndị nọ nʼelu ikpe? ²³Otu onye na-anwụ mgbe ike ya zuru oke, mgbe ọ nọ nʼezumike zuru oke na nchekwa, ²⁴ahụ ya nwere arọ nke ọma, ụmị ọkpụkpụ ya ka na-emikwa emi. ²⁵Onye ọzọ na-anwụ nʼobi ilu, ọ dịghị mgbe ọ detụrụ ihe ọma ọbụla ire. ²⁶Ha abụọ na-edinakọ nʼaja, ikpuru na-ekpuchikwa ha abụọ. ²⁷Lee, amaara m echiche unu, na nzube unu iji mejọọ m. ²⁸Nʼihi na unu na-asị, ‘Olee ebe ụlọ onye a maara ama dị ugbu a? Olee ebe ụlọ ikwu ebe ndị ajọ omume biri?’ ²⁹Ọ bụ na unu ajụbeghị ndị na-eje ije nʼokporoụzọ? Unu agaghị anabata ihe akaebe ha na-enye, ³⁰na a na-echebe onye ajọ omume nʼụbọchị ọdachi, na a na-anapụta ya nʼụbọchị oke iwe? ³¹Onye na-eguzogide ya ihu na ihu nʼihi omume ya, onyekwa na-akwụghachi ya nʼihi ihe o mere? ³²A na-ebuga ya nʼili, a na-echekwa ili ya nche. ³³Aja nke ndagwurugwu na-atọ ya ụtọ; mmadụ niile na-eso ya nʼazụ, ndị buru ya ụzọ enweghịkwa ọnụọgụgụ. ³⁴Ya mere, olee otú unu ga-esi were okwu efu kasie m obi? Ọsịsa unu abụghị ihe ọzọ karịa ụgha.”