ಯೋಬನ ಗ್ರಂಥ 21 FHB Father's Heart Bible™

21 ¹ಆಗ ಯೋಬನು ಉತ್ತರಿಸಿದನು: ²“ನನ್ನ ಮಾತುಗಳನ್ನು ಗಮನವಿಟ್ಟು ಕೇಳಿರಿ, ಇದೇ ನೀವು ನನಗೆ ನೀಡುವ ಸಾಂತ್ವನವಾಗಿರಲಿ. ³ನಾನು ಮಾತನಾಡುವಾಗ ನನ್ನನ್ನು ಸಹಿಸಿಕೊಳ್ಳಿರಿ, ನಾನು ಮಾತನಾಡಿದ ಮೇಲೆ ನೀವು ಪರಿಹಾಸ್ಯ ಮಾಡುತ್ತಲೇ ಇರಬಹುದು. ⁴ನನಗಾದರೋ, ನನ್ನ ದೂರು ಕೇವಲ ಮನುಷ್ಯನ ವಿರುದ್ಧವೋ? ನಾನು ಅಸಹನೆಗೊಳ್ಳದೆ ಇರುವುದಾದರೂ ಹೇಗೆ? ⁵ನನ್ನನ್ನು ನೋಡಿ ದಿಗ್ಭ್ರಮೆಗೊಳ್ಳಿರಿ, ನಿಮ್ಮ ಕೈಯನ್ನು ಬಾಯಿಯ ಮೇಲಿಟ್ಟುಕೊಳ್ಳಿರಿ. ⁶ನಾನು ಅದನ್ನು ನೆನಪಿಸಿಕೊಂಡಾಗ ಭಯಭೀತನಾಗುತ್ತೇನೆ, ನನ್ನ ದೇಹವನ್ನು ನಡುಕ ಆವರಿಸುತ್ತದೆ. ⁷ದುಷ್ಟರು ಬದುಕುತ್ತಲೇ ಇದ್ದು, ಮುದುಕರಾಗಿ, ಬಲದಲ್ಲಿ ವೃದ್ಧಿಯಾಗುವುದೇಕೆ? ⁸ಅವರ ಮಕ್ಕಳು ಅವರ ಕಣ್ಣೆದುರಿನಲ್ಲಿಯೇ ಅವರೊಂದಿಗೆ ನೆಲೆಗೊಂಡು ಸುರಕ್ಷಿತರಾಗಿದ್ದಾರೆ, ಅವರ ಸಂತಾನವು ಅವರ ದೃಷ್ಟಿಯೆದುರಿನಲ್ಲಿದೆ. ⁹ಅವರ ಮನೆಗಳು ಸುರಕ್ಷಿತವಾಗಿಯೂ ಭಯವಿಲ್ಲದೆಯೂ ಇವೆ, ದೇವರ ದಂಡವು ಅವರ ಮೇಲೆ ಬೀಳುವುದಿಲ್ಲ. ¹⁰ಅವರ ಹೋರಿ ಸಂತಾನವನ್ನು ಉಂಟುಮಾಡುತ್ತದೆ, ಎಂದೂ ತಪ್ಪುವುದಿಲ್ಲ; ಅವರ ಹಸು ಕರು ಹಾಕುತ್ತದೆ, ಗರ್ಭಪಾತವಾಗುವುದಿಲ್ಲ. ¹¹ಅವರು ತಮ್ಮ ಚಿಕ್ಕ ಮಕ್ಕಳನ್ನು ಹಿಂಡಿನಂತೆ ಸ್ವತಂತ್ರವಾಗಿ ಓಡಾಡಗೊಡುತ್ತಾರೆ, ಅವರ ಮಕ್ಕಳು ಕುಣಿದಾಡುತ್ತಾರೆ. ¹²ಅವರು ದಮ್ಮಡಿಗೂ ಕಿನ್ನರಿಗೂ ಹಾಡುತ್ತಾರೆ, ಕೊಳಲಿನ ನಾದಕ್ಕೆ ಆನಂದಿಸುತ್ತಾರೆ. ¹³ಅವರು ತಮ್ಮ ದಿನಗಳನ್ನು ಏಳಿಗೆಯಲ್ಲಿ ಕಳೆಯುತ್ತಾರೆ, ಸಮಾಧಾನದಲ್ಲಿ ಸಮಾಧಿಗೆ ಇಳಿಯುತ್ತಾರೆ. ¹⁴ಆದರೂ ಅವರು ದೇವರಿಗೆ ಹೀಗೆನ್ನುತ್ತಾರೆ: ‘ನಮ್ಮನ್ನು ಬಿಟ್ಟುಬಿಡಿ! ನಿಮ್ಮ ಮಾರ್ಗಗಳನ್ನು ತಿಳಿಯಲು ನಮಗೆ ಇಚ್ಛೆಯಿಲ್ಲ. ¹⁵ನಾವು ಸೇವಿಸುವಂತೆ ಸರ್ವಶಕ್ತರು ಎಂಥವರು? ಅವರಿಗೆ ಪ್ರಾರ್ಥಿಸಿದರೆ ನಮಗೇನು ಲಾಭ?’ ¹⁶ಆದರೆ ಅವರ ಏಳಿಗೆ ಅವರ ಸ್ವಂತ ಕೈಯಲ್ಲಿಲ್ಲ; ದುಷ್ಟರ ಆಲೋಚನೆಯೊಂದಿಗೆ ನನಗೆ ಯಾವ ಸಂಬಂಧವೂ ಬೇಡ. ¹⁷ದುಷ್ಟರ ದೀಪ ಎಷ್ಟು ಬಾರಿ ಆರಿಹೋಗುತ್ತದೆ? ಅವರ ವಿಪತ್ತು ಎಷ್ಟು ಬಾರಿ ಅವರ ಮೇಲೆ ಬೀಳುತ್ತದೆ? ದೇವರು ತಮ್ಮ ಕೋಪದಲ್ಲಿ ಎಷ್ಟು ಬಾರಿ ಯಾತನೆಗಳನ್ನು ಹಂಚುತ್ತಾರೆ? ¹⁸ಅವರು ಎಷ್ಟು ಬಾರಿ ಗಾಳಿಯೆದುರಿನ ಹುಲ್ಲಿನಂತೆಯೂ ಬಿರುಗಾಳಿ ಬಡಿದುಕೊಂಡುಹೋಗುವ ಹೊಟ್ಟಿನಂತೆಯೂ ಇದ್ದಾರೆ? ¹⁹‘ದೇವರು ಮನುಷ್ಯನ ಶಿಕ್ಷೆಯನ್ನು ಅವನ ಮಕ್ಕಳಿಗಾಗಿ ಕೂಡಿಡುತ್ತಾರೆ’ ಎಂದು ನೀವು ಹೇಳುತ್ತೀರಿ. ದೇವರು ಆ ಮನುಷ್ಯನಿಗೇ ಪ್ರತಿಫಲವನ್ನು ಕೊಡಲಿ, ಆಗ ಅವನು ಅದನ್ನು ಅರಿತುಕೊಳ್ಳುವನು. ²⁰ಅವನ ಸ್ವಂತ ಕಣ್ಣುಗಳೇ ಅವನ ವಿನಾಶವನ್ನು ಕಾಣಲಿ, ಅವನು ಸರ್ವಶಕ್ತರ ರೌದ್ರವನ್ನು ಕುಡಿಯಲಿ. ²¹ಅವನ ತಿಂಗಳುಗಳು ಕಡಿತಗೊಂಡ ಮೇಲೆ, ತನ್ನ ತರುವಾಯದ ಮನೆಯವರ ಬಗ್ಗೆ ಅವನಿಗೆ ಏನು ಚಿಂತೆ? ²²ಉನ್ನತದಲ್ಲಿರುವವರಿಗೆ ನ್ಯಾಯತೀರಿಸುವವರು ದೇವರೇ ಆಗಿರಲು, ಯಾರಾದರೂ ಅವರಿಗೆ ಜ್ಞಾನವನ್ನು ಬೋಧಿಸಬಲ್ಲರೇ? ²³ಒಬ್ಬನು ಪೂರ್ಣ ಚೈತನ್ಯದಲ್ಲಿ, ಸಂಪೂರ್ಣ ನೆಮ್ಮದಿಯಲ್ಲಿಯೂ ಸುರಕ್ಷಿತನಾಗಿಯೂ ಸಾಯುತ್ತಾನೆ, ²⁴ಅವನ ದೇಹ ಚೆನ್ನಾಗಿ ಪೋಷಿತವಾಗಿದೆ, ಅವನ ಎಲುಬುಗಳ ಮಜ್ಜೆ ಇನ್ನೂ ಹಸಿಯಾಗಿದೆ. ²⁵ಮತ್ತೊಬ್ಬನು ಯಾವ ಸುಖವನ್ನೂ ಎಂದೂ ಅನುಭವಿಸದೆ, ಕಹಿಯಾದ ಮನಸ್ಸಿನಿಂದ ಸಾಯುತ್ತಾನೆ. ²⁶ಅವರಿಬ್ಬರೂ ಒಟ್ಟಿಗೆ ಧೂಳಿನಲ್ಲಿ ಮಲಗುತ್ತಾರೆ, ಹುಳುಗಳು ಅವರಿಬ್ಬರನ್ನೂ ಮುಚ್ಚುತ್ತವೆ. ²⁷ನೋಡಿ, ನಿಮ್ಮ ಆಲೋಚನೆಗಳನ್ನೂ ನನಗೆ ಅನ್ಯಾಯ ಮಾಡುವ ನಿಮ್ಮ ಒಳಸಂಚುಗಳನ್ನೂ ನಾನು ಬಲ್ಲೆ. ²⁸ಏಕೆಂದರೆ ‘ಶ್ರೀಮಂತನ ಮನೆ ಈಗ ಎಲ್ಲಿ? ದುಷ್ಟರು ವಾಸಿಸಿದ ಗುಡಾರ ಎಲ್ಲಿ?’ ಎಂದು ನೀವು ಹೇಳುತ್ತೀರಿ. ²⁹ದಾರಿಯಲ್ಲಿ ಪ್ರಯಾಣಿಸುವವರನ್ನು ನೀವು ಎಂದೂ ಕೇಳಲಿಲ್ಲವೇ? ಅವರು ಕೊಡುವ ಪುರಾವೆಯನ್ನು ನೀವು ಒಪ್ಪುವುದಿಲ್ಲವೇ, ³⁰ವಿಪತ್ತಿನ ದಿನದಲ್ಲಿ ದುಷ್ಟನು ಉಳಿಸಲ್ಪಡುತ್ತಾನೆ, ರೌದ್ರದ ದಿನದಲ್ಲಿ ಅವನು ಪಾರಾಗುತ್ತಾನೆ ಎಂಬುದನ್ನು? ³¹ಅವನ ನಡತೆಯ ಬಗ್ಗೆ ಅವನ ಮುಖದೆದುರು ಯಾರು ಅವನನ್ನು ಎದುರಿಸುತ್ತಾರೆ, ಅವನು ಮಾಡಿದ್ದಕ್ಕೆ ಯಾರು ಅವನಿಗೆ ಪ್ರತಿಫಲ ನೀಡುತ್ತಾರೆ? ³²ಅವನನ್ನು ಸಮಾಧಿಗೆ ಹೊತ್ತುಕೊಂಡು ಹೋಗುತ್ತಾರೆ, ಅವನ ಗೋರಿಯ ಮೇಲೆ ಕಾವಲು ಇಡುತ್ತಾರೆ. ³³ಕಣಿವೆಯ ಮಣ್ಣು ಅವನಿಗೆ ಸಿಹಿಯಾಗಿದೆ; ಪ್ರತಿಯೊಬ್ಬರೂ ಅವನ ಹಿಂದೆ ಹೋಗುತ್ತಾರೆ, ಅವನ ಮುಂದೆ ಹೋದವರು ಲೆಕ್ಕವಿಲ್ಲದಷ್ಟಿದ್ದಾರೆ. ³⁴ಹಾಗಾದರೆ ಬರಿಯ ಮಾತುಗಳಿಂದ ನೀವು ನನ್ನನ್ನು ಹೇಗೆ ಸಂತೈಸಬಲ್ಲಿರಿ? ನಿಮ್ಮ ಉತ್ತರಗಳು ಸುಳ್ಳಲ್ಲದೆ ಬೇರೇನೂ ಅಲ್ಲ.”