Jobu 22

22 ¹Nígbà náà ni Elifasi ará Temani dáhùn pé: ²“Ènìyàn ha lè ṣe àǹfààní kankan fún Ọlọ́run bí? Dájúdájú, ọlọ́gbọ́n ènìyàn ṣe àǹfààní fún ara rẹ̀ nìkan ni. ³Ǹjẹ́ ó jẹ́ adùn kankan fún Olódùmarè bí ìwọ bá jẹ́ olódodo, tàbí èrè kankan fún un bí ìwọ bá ń gbé ní àìlẹ́bi? ⁴Ǹjẹ́ nítorí ìbẹ̀rù rẹ ni ó fi ń bá ọ wí, tí ó sì ń mú ọ wá sí ìdájọ́? ⁵Ǹjẹ́ ìwà búburú rẹ kò tóbi bí? Ǹjẹ́ ẹ̀ṣẹ̀ rẹ kò ní òpin bí? ⁶Nítorí ìwọ béèrè ohun ìgbọ̀wọ́ lọ́wọ́ àwọn arákùnrin rẹ láìnídìí, ìwọ sì bọ́ aṣọ kúrò lára àwọn tí ń wà ní ìhòòhò. ⁷Ìwọ kò fún àwọn tí ó rẹ̀ ní omi láti mu, ìwọ sì háwọ́ oúnjẹ fún àwọn tí ebi ń pa. ⁸Ọkùnrin alágbára ni ó ni ilẹ̀ náà, ẹni tí a ṣe ojúrere sí ni ó sì ń gbé inú rẹ̀. ^a a v8 Elifasi ń fi hàn pé Jobu kà ilẹ̀ sí ohun tí ó jẹ́ ti alágbára nìkan, tí ó fi àwọn tálákà sílẹ̀ láìní ohunkóhun. ⁹Ìwọ rán àwọn opó lọ ní ọwọ́ òfo, ìwọ sì tẹ apá àwọn ọmọ òrukàn mọ́lẹ̀. ¹⁰Ìdí nìyí tí àwọn okùn-ìdẹkùn fi yí ọ ká, tí ẹ̀rù òjijì sì bò ọ́ mọ́lẹ̀; ¹¹tàbí òkùnkùn, tó bẹ́ẹ̀ tí ìwọ kò fi lè ríran, tí àgbàrá omi sì bò ọ́ mọ́lẹ̀. ¹²Ǹjẹ́ Ọlọ́run kò ha wà ní òkè gíga ọ̀run bí? Wò ó bí àwọn ìràwọ̀ tí ó ga jùlọ ti ga tó! ¹³Síbẹ̀ ìwọ wí pé, ‘Kí ni Ọlọ́run mọ̀? Ǹjẹ́ ó lè ṣe ìdájọ́ láàrin òkùnkùn biribiri báyìí? ¹⁴Àwọsánmà tí ó nípọn bò ó mọ́lẹ̀ tó bẹ́ẹ̀ tí kò fi lè ríran, ó sì ń rìn lórí ìforí ọ̀run.’ ¹⁵Ǹjẹ́ ìwọ yóò máa rìn ní ọ̀nà àtijọ́ tí àwọn ènìyàn búburú ti rìn? ¹⁶A gbá wọn lọ kí àkókò wọn tó pé, àgbàrá omi sì gbá ìpìlẹ̀ wọn lọ. ¹⁷Wọ́n wí fún Ọlọ́run pé, ‘Fi wá sílẹ̀! Kí ni Olódùmarè lè ṣe sí wa?’ ¹⁸Síbẹ̀ òun ni ó fi ohun rere kún ilé wọn—nítorí náà èmi kò fẹ́ nǹkankan ṣe pẹ̀lú ìmọ̀ràn àwọn ènìyàn búburú. ¹⁹Àwọn olódodo rí i, inú wọn sì dùn; àwọn aláìlẹ́bi fi àwọn ènìyàn búburú ṣe yẹ̀yẹ́, wí pé, ²⁰‘Dájúdájú, a ti pa àwọn ọ̀tá wa run, iná sì ti jó ohun tí wọ́n fi sílẹ̀ lẹ́yìn wọn.’ ²¹Tẹríba fún Ọlọ́run nísinsìnyí, kí o sì wà ní àlàáfíà pẹ̀lú rẹ̀; báyìí ni rere yóò fi wá sọ́dọ̀ rẹ. ²²Gba ẹ̀kọ́ láti ẹnu rẹ̀, kí o sì to àwọn ọ̀rọ̀ rẹ̀ jọ sínú ọkàn rẹ. ²³Bí ìwọ bá padà sọ́dọ̀ Olódùmarè, a ó mú ọ bọ̀ sípò; bí ìwọ bá lé àìṣòdodo jìnnà réré kúrò ní ilé rẹ, ²⁴tí o sì fi wúrà rẹ lélẹ̀ sínú ekuru, wúrà Ofiri láàrin àwọn òkúta odò, ^b b v24 Ofiri gbajúmọ̀ ní ayé ìgbàanì gẹ́gẹ́ bí orísun wúrà tí ó dára jùlọ. ²⁵nígbà náà Olódùmarè fúnra rẹ̀ yóò jẹ́ wúrà rẹ, fàdákà iyebíye rẹ. ²⁶Nígbà náà ni ìwọ yóò ní inú dídùn nínú Olódùmarè, ìwọ yóò sì gbé ojú rẹ sókè sí Ọlọ́run. ²⁷Ìwọ yóò gbàdúrà sí i, òun yóò sì gbọ́ ti rẹ, ìwọ yóò sì mú ẹ̀jẹ́ rẹ ṣẹ. ²⁸Ohun tí ìwọ bá pinnu yóò ṣẹ, ìmọ́lẹ̀ yóò sì tàn sí ọ̀nà rẹ. ²⁹Nígbà tí a bá rẹ àwọn ẹlòmíràn sílẹ̀, tí ìwọ sì wí pé, ‘Gbé wọn sókè!’, òun yóò gba àwọn tí ọkàn wọn rẹ̀wẹ̀sì là. ³⁰Òun yóò gbà á là pàápàá ẹni tí kì í ṣe aláìlẹ́bi, ẹni tí a ó gbà là nípasẹ̀ mímọ́ ọwọ́ rẹ.”