Yobe 22 FHB Father's Heart Bible™

22 ¹Na tenepo Elifazi Mtemani atawira tenepa: ²“Kodi munthu anakwanisa kuphedza Mulungu? Ndimo mwene, munthu wandzeru asaphedza ekhene basi. ³Kodi Wamphambvu Zonsene asakomerwa ungakhala wakulungama, peno iye anaphindula ungakhala wakusowa mulando? ⁴Kodi ndi thangwi ya kun'gopa kwako kuti iye asakutcunyusa mbakubweresa ku ciyeruzo? ⁵Kodi kuipa kwako si kukulu tayu? Kodi madawo ako si akukhonda kumala tayu? ⁶Thangwi iwe wakhaphemba cikole kuna abale ako mwakusowa thangwi, mbukwatula nguwo za ale akhali maliya. ⁷Iwe hudapasa madzi akumwa kuna anyakuneta tayu, mbukhondesa nkate kuna anyanjala. ⁸Mamuna wamphambvu akhali na dziko, ule wakukomerwa akhakhala mu iro. ^a a v8 Elifazi asabveka kuti Yobi akhacita dziko ninga ya anyamphambvu basi, mbasiya anyakutcerenga nkhabe cinthu. ⁹Iwe wabulusa akazi a cimasiye na manja mabulanda, mbuswanya manja a ana ncherere. ¹⁰Ndi thangwi yace misampha isakukuzungulira, na gopa yakukasika isakukupwaza; ¹¹peno cidima, cakuti nkhabe kukwanisa kuona, na cigumula ca madzi cisakukufukatira. ¹²Kodi Mulungu nkhabe kukhala padzulu kwa kudzulu tayu? Ona kuti nyenyezi zakulapha kakamwe ziri kutali tani! ¹³Mbwenye iwe usalonga, ‘Kodi Mulungu asadziwanji? Kodi iye anakwanisa kueruza na cidima cikulu tenepa? ¹⁴Makole makulu asamphimbira toera akhonde kuona, iye asafamba padzulu pa thambo ya kudzulu.’ ¹⁵Kodi iwe unapitiriza kufamba munjira yakale idafamba anthu akuipa? ¹⁶Iwo akwatulwa mbudzati kukwana n'dzidzi wawo, maziko awo akukulwa na cigumula ca madzi. ¹⁷Iwo apanga Mulungu, ‘Tisiyeni teka! Kodi Wamphambvu Zonsene anaticitanji?’ ¹⁸Mbwenye ndi iye adadzaza nyumba zawo na pinthu pyadidi—natenepa ine nkhabe kufuna kucita na mapangano a anthu akuipa. ¹⁹Anyakulungama asapiona mbakomerwa; ale akusowa mulando asaseka anthu akuipa, mbalonga, ²⁰‘Ndimo mwene, anyamalwa athu afudzwa, na moto wapisa pidasiya iwo.’ ²¹Bvera Mulungu cincino mbukhala pa ntendere na iye; na njira ineyi pyadidi pinabwera kuna iwe. ²²Tambira pfundziso kubulukira mu mulomo wace, mbukoya mafala ace muntima mwako. ²³Ungabwerera kuna Wamphambvu Zonsene, unadzabwezeredwa; ungathamangisa kusalungama kutali na panyumba pako, ²⁴mbugonesa ouro wako m'pfumbi, ouro wa Ofiri pakati pa miyala ya nkulo, ^b b v24 Ofiri ikhadziwika kakamwe mu dziko yakale ninga mbuto yakubulukira ouro wadidi kakamwe. ²⁵penepo Wamphambvu Zonsene ekhene anadzakhala ouro wako, parata yako yakufunika. ²⁶Penepo unadzakomerwa na Wamphambvu Zonsene mbudzatambika nkhope yako kuna Mulungu. ²⁷Unadzaphembera kuna iye, iye anadzakubva, mbudzakwanirisa mapikiro ako. ²⁸Pinasankhula iwe pinadzacitika, na ceza cinadzayetimira munjira zako. ²⁹Anango angacepeswa pantsi, mbulonga iwe, ‘Akwezeni iwo!’, iye anadzapulumusa ale akucepeswa. ³⁰Iye anadzapulumusa ngakhale ule anakhonda khala wakusowa mulando, anadzapulumuswa kubulukira mu kucena kwa manja ako.”