Mbenga Ndikhakwanisa Kun'gumana

Yobe asafuna bwalo la kutonga, tayu nkhondo. Mbadagumana pinakhala Mulungu, mbadalonga mulandu wace mbapulumuswa. Mbwenye Mulungu nkhabe kumabvazuwa peno kumadokero, na asacita pyonsene pinafuna Iye. Yobe asalonga kuti anadzabuluka ninga oro, mbwenye asapitiriza kugopa kakamwe.

Kapitulu 23.

Na tenepo Djobi atawira tenepa: “Ngakhale lero kudungunya kwanga ndi kwakuwawa; djanja yace ndi yakulemera maseze ndisabuula. Mbenga ndikhadziwa kuti ndinan'gumana kupi, toera ndikwanise kufika pakukhala pace! Mbidabweka mulandu wanga pamaso pace, mbandidzaza mulomo wanga na mathangwi. Mbidapfundza mafala anafuna iye kunditawira, mbandibvesesa pinafuna iye kundipanga. Kodi mbadalimbana na ine na mphambvu zace zikulu? Nkhabe—mwandimomwene mbadandibvesera. Penepo munthu wakulungama mbadakwanisa kulonga na iye, pontho ine mbidasudzulwa kwa muyaya na ntongi wanga. Mbwenye ndingaenda kumabulukiro a dzuwa, iye nkhabe kweneko; kumadokero nkhabe kwanisa kun'gumana iye. Iye angacita basa kumpoto, nkhabe kwanisa kumuona; angazungunukira kumadyo, nkhabe kwanisa kun'gumana iye. Mbwenye iye asadziwa njira inafamba ine; angamala kundiyesera, ndinabuluka ninga oru. Mwendo wanga waphatirira mu mapando ace; ndakoya njira yace mbandikhonda kucoka. Ine nkhabe kubuluka pa matongero a milomo yace; ndakoya mafala a mulomo wace kupita cakudya canga ca ntsiku na ntsiku. Mbwenye iye nkhabe kucinja—mbani anakwanisa kunsandusa? Pyonsene pinafuna iye, asapicita. Thangwi iye anadzacita pidatonga iye thangwi ya ine, pontho pinthu pizinji ninga penepi piri mu manyerezero mace. Ndi thangwi ineco ndisagopa pamaso pace; ndingananyerezera penepi, ndisatetemera thangwi ya iye. Mulungu acita ntima wanga kulefuka; Wamphambvu Zonsene andicitisa kugopa. Mbwenye nee ndamatamiswa na cidima tayu, nee na cidima cikulu cinaphimba nkhope yanga tayu.”