Jobu 23

23 ¹Nígbà náà ni Jobu dáhùn pé: ²“Àní lónìí, kíkùn mi korò; ọwọ́ rẹ̀ wúwo bí ó tilẹ̀ jẹ́ pé mo ń kérora. ³Ìbá jẹ́ pé mo mọ ibi tí èmi ìbá ti rí i, kí èmi lè wá sí ibùgbé rẹ̀! ⁴Èmi ìbá mú ẹjọ́ mi wá síwájú rẹ̀, èmi ìbá sì fi àríyànjiyàn kún ẹnu mi. ⁵Èmi ìbá kọ́ àwọn ọ̀rọ̀ tí ó ìbá fi dá mi lóhùn, èmi ìbá sì mòye ohun tí ó ìbá sọ fún mi. ⁶Ǹjẹ́ yóò bá mi jiyàn nínú títóbi agbára rẹ̀? Rárá—dájúdájú yóò fetí sí mi. ⁷Níbẹ̀, olódodo ìbá bá a jíròrò pẹ̀lú rẹ̀, adájọ́ mi ìbá sì dá mi láre títí láé. ⁸Ṣùgbọ́n bí mo bá lọ sí ìlà oòrùn, kò sí níbẹ̀; bí mo bá sì lọ sí ìwọ̀ oòrùn, èmi kò lè rí i. ⁹Nígbà tí ó bá ń ṣiṣẹ́ ní àríwá, èmi kò lè fojú rí i; nígbà tí ó bá yípadà sí gúúsù, èmi kò lè rí i. ¹⁰Ṣùgbọ́n ó mọ ọ̀nà tí mo ń tọ̀; nígbà tí ó bá ti dán mi wò, èmi yóò jáde bí wúrà. ¹¹Ẹsẹ̀ mi ti rọ̀ mọ́ ìṣísẹ̀ rẹ̀; mo ti pa ọ̀nà rẹ̀ mọ́, èmi kò sì yàpa. ¹²Èmi kò yẹsẹ̀ kúrò nínú àṣẹ ètè rẹ̀; mo ti kà àwọn ọ̀rọ̀ ẹnu rẹ̀ sí ohun iyebíye ju oúnjẹ òòjọ́ mi lọ. ¹³Ṣùgbọ́n kò ṣe é yípadà—ta ni ó lè yí i padà? Ohunkóhun tí ó bá fẹ́, ó ń ṣe é. ¹⁴Nítorí yóò mú ohun tí ó ti yàn fún mi ṣẹ, ọ̀pọ̀lọpọ̀ nǹkan bẹ́ẹ̀ sì ń bẹ nínú ọkàn rẹ̀. ¹⁵Ìdí nìyí tí ẹ̀rù fi ń bà mí níwájú rẹ̀; nígbà tí mo bá ronú rẹ̀, ara mi ń wárìrì nítorí rẹ̀. ¹⁶Ọlọ́run ti sọ ọkàn mi di aláìlera; Olódùmarè ti mú ẹ̀rù bà mí. ¹⁷Síbẹ̀ òkùnkùn kò lè mú mi dákẹ́, àti òkùnkùn biribiri tí ó bo ojú mi náà.”