Naarĩ Korwo No Ndĩmuone

Ayubu arenda igooti, ti kũrũa. Angĩona kũrĩa Ngai atũũraga, nĩangĩiga ciira wake mbere yake na oigwo ndarĩ na mahĩtia. No Ngai ndarĩ irathĩro kana ithũĩro, na ekaga o ũrĩa endete. Ayubu oiga nĩakoima ta thahabu, no agatũũra arĩ na guoya mũnene.

Gĩcunjĩ 23.

Naake Ayubu agĩcookia atĩrĩ: “O na ũmũthĩ gũteta gwakwa nĩ kũrũrũ; guoko gwake nĩ kũritũ o na ngĩcaaya. Naarĩ korwo nĩnjũũĩ harĩa ingĩmuona, nĩ geetha nginye gĩikaroinĩ gĩake! Ingĩiga ciira wakwa mbere yake, njiyũrie kanua gakwa mohooto. Ingĩmenya ciugo iria angĩĩnjookeria, na ndaũkie ũrĩa angĩnjĩĩra. Hihi angĩkararania na niĩ na ũnene wa hinya wake? Aca—ti-itherũ nĩangĩĩthikĩrĩria. Hau mũndũ mũthingu no attaarane nake, na niĩ ndĩĩohorithio nginya tene nĩ mũtuanĩri wakwa wa ciira. No ingĩthiĩ mwena wa irathĩro, ndarĩ ho; na mwena wa ithũĩro ndingĩmuona. Rĩrĩa aruta wĩra mwena wa gathigathini, ndingĩmuona; rĩrĩa agarũrũka mwena wa gũthini, ndingĩmuona. No we nĩoĩ njĩra ĩrĩa ngeeraga; aarĩkia kũngeria, ngoima ndĩ ta thahabu. Kũgũrũ gwakwa nĩgũrũmĩtie makinya make; nĩnũũmĩtie njĩra yake, na ndirĩ ndahũgũka. Ndirĩ ndeehera wathoinĩ wa mĩromo yake; nĩnjĩkĩrĩte ciugo cia kanua gake bata gũkĩra irio ciakwa cia o mũthenya. No we ndangĩgarũrũka—nũũ ũngĩmũhũndũra? Kĩrĩa gĩothe eendaga, nĩakĩĩkaga. Nĩgũkorwo nĩakahingia ũrĩa aanduĩrĩire, na maũndũ maingĩ ta macio marĩ meciiriainĩ make. Nĩkĩo njiguaga guoya mbere yake; rĩrĩa ndeeciiria ũhoro ũcio, ngamwĩtigĩra mũno. Ngai nĩatuĩte ngoro yakwa yũrwo nĩ hinya; Mwene-Hinya-Wothe nĩanjiguĩthĩtie guoya. No rĩrĩ, ndirĩ ndakirithio nĩ nduma, kana nĩ nduma ndumanu ĩrĩa ĩhumbĩrĩte ũthiũ wakwa.”