Ina Ali Phākhuisi Kaja Chong
Jobna ngazek ngarok maningla bichar kasāpam ngaraiya. Varewui leikapam ina theisi kaje, iwui tuingaphun awui mangāli khuivāda mashun samphangra. Kha Vare mangāshong maleisāmana, khanukshongla maleisāmana, kala awui ningkachāng chi ana sai. Ana chāng yanghaiakha I sinā thāda shokra da Jobna hānga, kha ngacheeshuda leichinga.
23 1Chieina Jobna ngahānkai: 2"Ajala tangda iwui makhamayā chi khāshihaira; ina ringkhangā ngahuida leilala awui pāng chi iwuitungli kharitana. 3Iyavo, ali khaleipam chi ina theisi kaje, chieina ina awui pamkhavaili rāsi kaje! 4Ina iwui tuingaphun awui mangāli phongshokra, kala ina ikhamor tuingaphun eina chipemmira. 5Ana ili ngahānkā tui chi ina tamkhuira, kala ana ili kahāng chi ina theishingkhuira. 6Ana awui pangshap reikhamatai eina ili ngaphatrala? Maningmana; kachangkhata ana ili nganāmira. 7Chili mashungrik kahai mina ali ngasakshapra, kala iwui bicharsame ili mashimānla mashung ngasakra. 8Kha ina zingshoshong vāakha, ana chili maleimana; kala zingtunshong ina ali maphākhuimara. 9Ana atungshong ot sai tharan, ina ali matheimara; ana azingshong ngareivā tharan, ina ali maphākhuimara. 10Kha iwui kazatpam chi ana thei; ana ili chāng yang kahai thili, ina sinā thāda shokra. 11Iphei awui pheikarli shaitita; ina awui shongfa mayonhaira kala mangareithuimana. 12Ina awui morchaiwui ningkhami eina mapākthuimana; iwui thangthangwui kashakazāli mataimeida awui khamorwui tui chi ina shāptithaira. 13Kha ana makailakmana—khipāna ali ngalan ngasakshaprakhala? Awui ningkachāng athishurda ana sai. 14Kaja ana iwui vang makānkhami kahai chi sāra, kala hikathā ot kachungkha awui ningli lei. 15Chiwui vang eina ina awui mangāli ngacheenāhaowa; ina hi machukkhui tharan, ina ali ngacheelaka. 16Varena ining vān ngasakhaira; Pangshapana ili ngacheenā ngasakhaira. 17Chithālala tangkhamang einala, imai fakhammi khangami kashā einala ili masāshimānmimara."
