Khisāda Sāshap-pangshapana Atam Mashunmana
Sāshap-pangshapana khisāda bichar kasāwui atam makahaikhala da Jobna ngahānga. Ana mangahānkākahai ot chi hāngphungkhai: thari phukhai, ra̱meinaowui mukkā khuikashui, kachāmana kachon mangavaila kaphung kazing lungli piya, shaokathatabing kala khalebingna tangkhamang lungli ot sāzata, kathiabingna ringngai, kala Varena khipāli akhala mayonmimana.
24 1"Khisāda Sāshap-pangshapana bichar sākhavaiwui atam mashunmana? Ali theibingna khisāda awui thangbing katang matheirarmana? 2Makhayābingna thari phura; athumna yao tukkhuilaga akhalattawui sāda hompama. 3Athumna avāva̱ makhaleibingwui gadhā kashamshoka; ra̱meiva̱wui sei khangashit khuihaira. 4Khavātabingli shongfawui eina kashama, chieina ngaleiwui kachāmabingna ngayina. 5Yanglu, lamhāngli khalei khararwui gadhābing thāda, kachāmabingna athumwui ot sākhavai shoka, kashakazā phāshaizata; lamhāngna athumwui naobingli kashakazā mira. 6Athumna athumwui malingkasang luilungli seizāt māhā, kala makhayāwui drakhā yāmgui mātham. 7Athumna ngayā asāmsai eina piya, kashankachon maleila, khamakuiwui faror khavai maleimana. 8Kaphungwui zingrotna athumli ya̱haira, kala ngayin khavai maleimada lunghārli pamhaira. 9Avāva̱ makhalei nao chi na̱ eina khuithuihaowa, kala khangazanawui angāngnao khangashit sāda khuihaowa. 10Kashankachon maleila athumna asāmsai eina yaozata; thaihaoda māvām phunga. 11Olive yāmguibing alungli athumna thao surra, drakhāra̱ surkhavaipamli ot sāla, chithālala athum ra̱changa. 12Keinungwui eina kathibingna ngahuiya, kala khamā za̱bingwui akhonna khangachon khavai vaoshoka; chithālala Varena khipākhalila khanguila maphenmana.
13"Kahorli ngakaishi kajibing lei; athumna chiwui apong matheila, lah chiwui shongfali maleimana. 14Kazing kathangli shaokathatapā khangazana kala khavātabingli shaothat khavai ngakarthuiya; ngayāshong ana khale mi thāda yaozata. 15Phokaphāwui mikna ngazinshong ngaraipama, 'Khipākhana ili matheimara,' da machukta, kala ana amai ngathumhai. 16Tangkhamangli athumna shimbing leekakhuia; zimikthang athumna themlāk shuna, kaja athumna kahorli makhangaimana. 17Kaja athum saikorawui vang, tangkhamang china ngathor kathāna; athumna tangkhamangwui khangacheebingli ngasozata.
18"Chithālala nathumna hānga, athum tara̱ mangāli kathāka; athumwui ngaleiwui yar khonkashi chi ngasāhaira, kala khipānakha athumwui drakhā yāmgui shong mangareiungmana. 19Kazing kakāng kala kasāna tākrorda horam chi khuithuihai thāda, chithāda chomna morei sāhaibingli ngapaithuihaira. 20Athumli pharākakhui naopam malaihaira; mathanna athumli zai; athumli maphaningungluimara, kala makaphā makhayā chi thingrong kathā sātekmihaira. 21Athumna nao makhavai naokashumva̱li marekharek, kala ra̱meinaoli malumashanmi.
22"Chithālala Varena awui pangshap eina kapangabingli ngakhunshoka; ana nganinga, kala khipānakha khalattawui mirin chi machihānmara. 23Varena athumli ning tāphup ngasām ngasaka, kala athumna chili kashaikhui, kha awui mik athumwui shongfali lei. 24Athum atam kateoli masot ngasaka, kala chiwui thili athum thuihaira; athum nem ngasakta mikumo kathāda kazipkhuihaira, mā kui kathā katattāhaira. 25Hi chithāda maningakha, khipāna ili kakapikna chipaishira kala iwui tui makhaninga ngasā ngasakra?"
