Jobu 24

24 ¹“Èéṣe tí Olódùmarè kò fi dá àkókò sílẹ̀ fún ìdájọ́? Èéṣe tí àwọn tí ó mọ̀ ọ́n kì í rí ọjọ́ rẹ̀? ²Àwọn ènìyàn búburú ń ṣí òkúta ààlà; wọ́n ń gba agbo ẹran, wọ́n sì ń bọ́ wọn bí ẹni pé tiwọn ni. ³Wọ́n ń lé kẹ́tẹ́kẹ́tẹ́ aláìní baba lọ; wọ́n sì ń gba màlúù opó ní ìdúró. ⁴Wọ́n ń ti àwọn aláìní kúrò lójú ọ̀nà, tó bẹ́ẹ̀ tí àwọn tálákà ilẹ̀ náà fi ní láti fi ara pamọ́. ⁵Wò ó—bí àwọn kẹ́tẹ́kẹ́tẹ́ igbó ní aginjù, àwọn tálákà ń jáde lọ sí iṣẹ́ wọn, wọ́n ń wá oúnjẹ kiri; aṣálẹ̀ ni ó ń mú oúnjẹ wá fún àwọn ọmọ wọn. ⁶Wọ́n ń kórè ewéko nínú oko tí kì í ṣe tiwọn, wọ́n sì ń ká èso tó ṣẹ́kù nínú ọgbà àjàrà ènìyàn búburú. ⁷Wọ́n ń lo òru ní ìhòòhò, láìní aṣọ, láìní ìbora kankan láti dènà òtútù. ⁸Òjò òkè ńlá ń rọ̀ sí wọn lára, wọ́n sì ń rọ̀ mọ́ àpáta nítorí àìní ibi ààbò. ⁹Wọ́n ń já ọmọ aláìní baba gbà kúrò ní ọmú, wọ́n sì ń gba ọmọ ọwọ́ tálákà ní ìdúró. ¹⁰Wọ́n ń rìn kiri ní ìhòòhò, láìní aṣọ; ebi ń pa wọ́n, síbẹ̀ wọ́n ń ru ìtí ọkà. ¹¹Láàrín àwọn ọgbà igi ólífì ni wọ́n ti ń fún òróró; wọ́n ń tẹ ibi ìfún wáìnì, síbẹ̀ òǹgbẹ ń gbẹ wọ́n. ¹²Láti ìlú wá ni àwọn tó ń kú ti ń kérora, ọ̀fun àwọn tí a ṣèṣe sì ń ké fún ìrànlọ́wọ́—síbẹ̀ Ọlọ́run kò ka ẹ̀ṣẹ̀ náà sí ẹnikẹ́ni lọ́rùn.

¹³“Àwọn kan wà tí wọ́n ń ṣọ̀tẹ̀ sí ìmọ́lẹ̀; wọn kò mọ ọ̀nà rẹ̀, bẹ́ẹ̀ ni wọn kò dúró sí ipa ọ̀nà rẹ̀. ¹⁴Ní àfẹ̀mọ́júmọ́ ni apànìyàn ń dìde láti pa tálákà àti aláìní, ní òru sì ni ó ń yọ́ kiri bí olè. ¹⁵Ojú panṣágà ń retí ìrọ̀lẹ́, ó ń rò pé, ‘Ojú kan kì yóò rí mi,’ ó sì ń bo ojú rẹ̀ mọ́lẹ̀. ¹⁶Nínú òkùnkùn ni wọ́n ń fọ́ ilé; ní ọ̀sán wọ́n ń ti ara wọn pamọ́, nítorí wọn kò fẹ́ nǹkankan ṣe pẹ̀lú ìmọ́lẹ̀. ¹⁷Nítorí òkùnkùn biribiri ni òwúrọ̀ fún gbogbo wọn; ẹ̀rù òkùnkùn kò ṣàjèjì sí wọn.

¹⁸“Síbẹ̀ ẹ̀yin wí pé wọ́n yára lójú omi; ègún ni ìpín wọn nínú ilẹ̀, kò sì sí ẹni tí ń yípadà sí ọgbà àjàrà wọn. ¹⁹Bí ọ̀dá àti ooru ti ń mú yìnyín tí ń yọ́ lọ, bẹ́ẹ̀ ni isà òkú ń já àwọn tí ó ti dẹ́ṣẹ̀ gbà. ²⁰Inú tí ó bí wọn gbàgbé wọn; kòkòrò ń jẹ wọ́n dùn; a kì í rántí wọn mọ́, a sì fọ́ ìwà búburú túútúú bí igi. ²¹Wọ́n ń hùwà ìkà sí àgàn tí kò bímọ, wọn kò sì ṣàánú opó.

²²“Síbẹ̀ Ọlọ́run fi agbára rẹ̀ wọ́ àwọn alágbára lọ; ó dìde, kò sì sí ẹni tí ó dá a lójú nípa ẹ̀mí ara rẹ̀. ²³Ọlọ́run jẹ́ kí wọ́n sinmi ní àìléwu, wọ́n sì gbára lé e, ṣùgbọ́n ojú rẹ̀ ń bẹ lórí ọ̀nà wọn. ²⁴A gbé wọn ga fún ìgbà díẹ̀, lẹ́yìn náà wọ́n sì kọjá lọ; a rẹ̀ wọ́n sílẹ̀, a sì kó wọn jọ bí gbogbo ènìyàn mìíràn, a gé wọn kúrò bí orí ọkà. ²⁵Bí èyí kò bá rí bẹ́ẹ̀, ta ni ó lè fi mi hàn ní òpùrọ́, kí ó sì sọ ọ̀rọ̀ mi di asán?”