Thükenbouei Matjembü Jih Aila Aphoda

Jobei Thükenbouei matjembü jih aila aphoda dogo pheda. Haoei jongai akibü shuong lenkei: leilang laang khokan apbü, latnyueibü masu leibü, shalebü shuong shongh dei ka shausiyung nakeila yepbü, müt haitibü hoba kokbü shuong nakthüha lamkümbü, lausikei hailabü shuongei ngühyoda hoba Mühghaüei aoche to mat ajemda.

Chapter 24.

“Thükenbouei matjembü jih aila aphoda? Hao damenbü shuongei haoeibü jih aila ladangkei ahapda? Amaibü shuongei leilang laang khokan apda; haoenei sanlon lapan jembü shangabü tegü lamshautida. Haoenei bou akibü gadu shian sattida; haoenei latnyueibü masu authebü tegü leida. Haoenei khambü shuong lam ka apda, kheijinei kaonyeka shalebü shuong haoen lolo hula. Chühashi, yama kibü yamkabü gadu tegü, shalebü shuong haoeneibü kümsilei to shausiyung lamla longda; phetsen kaodakei haoeneibü shousi shuong shanga wentek kümda. Haoenei jembü aying kibü sek ka nyem youlat kümda, hoba amaibü shuongeibü semlühlaak to youman atda. Haoen mütkong, neisimei ayingko, kham ka küplepnyu ayingko otda. Haoen shongh sangei shentida, hoba satenshang ayingko laang to nongetan kida. Haoenei bou akibü nashou senlang ka senetlangda, hoba shalebü senyopbü authebü tegü leida. Haoen mütkong paida, neisimei ayingko; nyakmühei, haoenei youthep künda. Oliv bamang amonbü haoenei onang sungda; ih netshang ka ungda, aieilausi haoen deilada. Sangnyu ka hailabü shuongei ngühyoda, hoba leiluan kibü shuongei thuibü shanga ngekda; aieilausi Mühghaüei ao to shabü shanga mat ajemda.

“Ngesakbü khulimbo lobü shuong kia; haoenei khoeibü lam angeda, ayingsi khoeibü lamnyua apaida. Ngeyang müt haitibou shalebü hoba khambü shuong haitila pida, hoba nangnaka haoei kokbü tegü paida. Jamboueibü nyekei chasem lamda, ‘Ao nyekeikei ngo ahaplabü,’ dogo damda, hoba haoei haoeibü thenyek hula. Nakthüha haoenei chem phetnyinan lotda; chaloua haoen lolo khinan phoda, aishanga haoenei ngesakbü to üang aying. Aishanga nakthüh haübü kho haoen pendou shanga ngeyang ki; haoen nakthühbü mokbü yoa jembü chem tegü kida.

“Lausikei nyi lauda, haoen dei thenyeka sobüsepbü ki; haoeneibü kaodak phejan shedla khaulabü, hoba aoeikei haoeneibü semlühlaak aeto asepei. Inei hoba aubüei linjung satbü ninthu mautila tegü, kheijinei heeei shabü shonbü shuong taketda. Haoen bukbü nasetshangei haoen amada; yangei haoen shauda; haoen toukei adamentilabü, hoba amaibü kho bu tegü shatlabü. Haoenei shousi abuk angkong sao to tetsida, hoba latnyu to sanou alenda.

“Lausikei haoeibü hauei Mühghaüei lakjaibü shuong leijung sattida; haoei loenda, hoba aoeikei jembü langkei shanga tükde akida. Mühghaüei haoen sangmaia hakso kuda, hoba haoen khüto nongan, lausikei haoeibü nyek haoeneibü lamnyua kida. Haoen shisho jiha yaangentilabü, kheijinei haoen maulabü; haoen yantilabü hoba lubü pendou tegü yoshailabü, youshou youlong tegü wapan aplabü. Ho tegü ayinglonga, aoei ngo yepeijawebü dogo lenenla thükkei, hoba ngeibü ngüh ai aki dogo kümtila thükkei?”