Ayubu 24 FHB Father's Heart Bible™

24 ¹“Nĩkĩĩ Mwene-Hinya ataigagĩra mahinda ma gũtuanĩra ciira? Nĩkĩĩ arĩa mamũũĩ mataroonaga mĩthenya yake? ²Andũ aaganu nĩmeheragia mahiga ma mĩhaka; nĩmataahaga ndũũru, makamĩrĩithia ta ciao ene. ³Nĩmatwaraga ndigiri ya mwana wa ngoriai; makooya ndegwa ya mũtumia wa ndigwa ĩrũgamĩrĩre thiirĩ. ⁴Nĩmatindĩkaga arĩa abatari makoima njĩrainĩ, nĩ ũndũ ũcio athĩĩni a bũrũri makahatĩrĩrio mehithe. ⁵Ta rora—o ta ndigiri cia gĩthaka werũinĩ, athĩĩni moimagara magĩthiĩ wĩrainĩ wao, magĩcaragia irio; werũ ũcio mũũmũ nĩũheanaga irio cia ciana ciao. ⁶Magethaga nyeki mĩgũndainĩ ĩtarĩ yao, na makahaara mũgũnda wa mĩthabibũ wa arĩa aaganu. ⁷Maraaraga njaga, matarĩ na nguo, matarĩ na kĩndũ gĩa kwĩhumbĩra heho. ⁸Maiyũragio nĩ mbura cia irĩmainĩ, na makehatĩkania harĩ ihiga tondũ matirĩ na kĩĩhitho. ⁹Mwana wa ngoriai nĩatunyagwo nyondoinĩ, na gakenge ka mũthĩĩni kanyiitagwo gatuĩke gĩa kũrũgamĩrĩra thiirĩ. ¹⁰Mathiiaga njaga, matarĩ na nguo; marĩ na ng'aragu, magakuua itĩĩa cia ngano. ¹¹Gatagatĩinĩ ka mĩtamaiyũ nĩmahihaga maguta; marutaga wĩra ihihiroinĩ cia ndibei, no-o makanyoota. ¹²Kuuma itũũrainĩ inene arĩa marakua nĩmacaayaga, na mĩmero ya arĩa magurarĩtio ĩgakaya ĩkĩhooya ũteithio—no Ngai ndarĩ mũndũ acuukagĩra ũũru ũcio.

¹³“Nĩ kũrĩ arĩa maremagĩra ũtheri; matiũĩ njĩra ciaguo, kana magaikara tũcĩrainĩ twaguo. ¹⁴Rũũciinĩ tene mũũragani nĩokĩraga akoorage mũthĩĩni na mũbatari, na ũtukũ agaceeraga ta mũici. ¹⁵Riitho rĩa mũtharia rĩetagĩrĩra mairia, akĩĩciiria atĩrĩ, ‘Gũtirĩ riitho rĩkũnyona,’ na akahitha ũthiũ wake. ¹⁶Ndumainĩ nĩmatuaga nyũmba magĩtoonya; mũthenya makehingĩra kũndũ, tondũ matiĩkũendaga ũndũ na ũtheri. ¹⁷Nĩgũkorwo nduma ndumanu nĩyo rũũciinĩ harĩ-o oothe; nĩmamenyeerete imakania cia nduma.

¹⁸“No inyuĩ muugaga atĩ marĩ na ihenya igũrũ rĩa maaĩ; igai rĩao rĩa bũrũri nĩrĩrume, na gũtirĩ mũndũ ũhũndũkagĩra mĩgũnda yao ya mĩthabibũ. ¹⁹O ta ũrĩa riũa na ũrugarĩ ciaiyaga ira rĩrĩa rĩratweka, ũguo noguo mbĩrĩra ĩtahaga arĩa mehĩtie. ²⁰Nda ĩrĩa yaamaciarire nĩĩmariganagĩrwo nĩo; igunyũ rĩkamarĩa; maticookaga kũririkanwo, naguo waganu ũkoinangwo ta mũtĩ. ²¹Mahinyĩrĩragia mũndũ-wa-nja thaata ũrĩa ũtaciaraga mwana, na matiĩguagĩra mũtumia wa ndigwa tha.

²²“No nĩ ũndũ wa hinya wake, Ngai nĩakururaga arĩa marĩ hinya; akarahũka, na gũtirĩ mũndũ ũrĩ na ma ya muoyo wake mwene. ²³Ngai nĩamarekagĩrĩria mahuurũke marĩ na thaayũ, nao makehokera ũguo, no maitho make marĩ igũrũ rĩa mĩthiĩre yao. ²⁴Matũũgagĩrio kahinda kanini, na thuutha ũcio magathira; manyiihio na makonganio ta andũ arĩa angĩ oothe, magatinio ta ngira cia ngano. ²⁵Angĩkorwo ũũ tiguo kũrĩ, nũũ ũngĩnyonania atĩ ndĩ mũheenania, na atue ciugo ciakwa cia tũhũ?”