ኢዮብ 24 FHB Father's Heart Bible™

24 ¹“እቲ ዅሉ ዝኽእል ኣምላኽ ስለ ምንታይ ጊዜያት ፍርዲ ዘይውስን? እቶም ዝፈልጥዎ ስለ ምንታይ መዓልቲታቱ ዘይርእዩ? ²እቶም ረሲኣን ኣእማን ወሰን ይደፍኡ፤ መጓሰ ይምንጥሉ፥ ከም ናታቶም ገይሮም ድማ የጓስይዎም። ³ኣድጊ እቶም ደኽታማት የባርሩ፤ ብዕራይ መበለት ድማ ብትሕጃ ይወስድዎ። ⁴ንፅጉማት ካብ መንገዲ ይደፍእዎም፤ ስለዙይ ድኻታት እታ ምድሪ ክሕብኡ ይግደዱ። ⁵እንሆ፥ ከም ኣእዱግ በረኻ ኣብ ምድረ በዳ፥ ድኻታት ናብ ዕዮኦም ይወፁ፥ ምግቢ ድማ ይደልዩ፤ በረኻ ኸዓ ንደቆም እንጀራ ይህብ። ⁶ኣብ ዘይናቶም ግራት ሳዕሪ የዓፅዱ፥ ናይ ረሲኣን ወይኒ ድማ ይቕርሙ። ⁷ጥራሖም ይሓድሩ፥ ክዳን ብዘይብሎም፥ ካብ ዛሕሊ መኽደኒ ድማ የብሎምን። ⁸በቲ ዝናም ኣኽራን ይጠልቕዩ፥ መዕቘቢ ስለ ዝሰኣኑ ድማ ኣብ ከውሒ ይፅግዑ። ⁹ደኽታም ቈልዓ ካብ ጡብ ይምንጠል፥ ህፃን ድኻ ድማ ብትሕጃ ይውሰድ። ¹⁰ጥራሖም ይኸዱ፥ ክዳን ብዘይብሎም፤ ተጠምዮም ከዓ እንዳእቲ ይሽከሙ። ¹¹ኣብ ማእኸል ኣታኽልቲ ኣውሊዕ ዘይቲ ይፅምቑ፥ መፅመቚ ወይኒ ይረግፁ፥ ግና ይፀምኡ። ¹²ካብ ከተማ እቶም ዝመውቱ ይግዕሩ፥ ጐሮሮ እቶም ዝቘሰሉ ድማ ይጠርዕ፥ ረዲኤት ይደልዩ፤ እግዚኣብሄር ግና ንሓደ እኳ ብኣበሳኡ ኣይከስሶን እዩ።

¹³“ነቲ ብርሃን ዝዓምፁ ኣለዉ፤ መንገዱ ኣይፈልጡን፥ ኣብ ጐደናኡ ድማ ኣይፀንዑን። ¹⁴ወጋሕታ ቐታሊ ሰብ ተሲኡ ንድኻን ፅጉምን ይቐትል፥ ለይቲ ድማ ከም ሰራቒ ይዞር። ¹⁵ዓይኒ ዘማዊ ንፅልግልግ ይፅበዮ፥ ‘ዓይኒ ኣይክርእየንን እዩ’ እናበለ፥ ገፁ ድማ ይሽፍን። ¹⁶ብፀልማት ኣብ ኣባይቲ ሰይሮም ይኣትዉ፤ ብመዓልቲ ተዓፅዮም ይጸንሑ፥ ነቲ ብርሃን ኣይደልይዎን እዮም እሞ። ¹⁷ንዅላቶም ድቕድቕ ፀልማት ንግሆ እዩ እሞ፤ ምስ ራዕዲ ፀልማት ለሚዶም እዮም።

¹⁸“ንስኻትኩም ግና ኣብ ገፅ ማያት ቅልጡፋት እዮም ትብሉ፤ ግዴኦም ካብ ምድሪ ርጉም እዩ፥ ናብ ኣታኽልቲ ወይኖም ድማ ዝምለስ የለን። ¹⁹ድርቅን ሃሩርን ነቲ ዝመክኽ በረድ ከም ዝወስድዎ፥ ከምኡ ድማ መቓብር ነቶም ሓጢኣት ዝገበሩ ይምንጥሎም። ²⁰እቲ ዝወለዶም ማህፀን ይርስዖም፤ ሓሰኻ ይበልዖም፤ ከቶ ኣይዝከሩን፥ ክፍኣት ድማ ከም ኦም ይስበር። ²¹ነታ ዘይትወልድ መኻን ሰበይቲ ይጭንቕዋ፥ ንመበለት ድማ ሰናይ ኣይገብሩን።

²²“እግዚኣብሄር ግና ብሓይሉ ነቶም ሓያላት ይስሕቦም፤ ንሱ ይትስእ፥ ብህይወቱ ዝተኣማመን ከዓ የለን። ²³እግዚኣብሄር ብድሕንነት ከዕርፉ ይሓድጎም፥ ንሳቶም ድማ ኣብኡ ይምርኰሱ፥ ኣዒንቱ ግና ኣብ መንገዶም እየን። ²⁴ቍሩብ ጊዜ ልዕል ይብሉ፥ ድሕሪኡ ድማ የለዉን፤ ትሕት ይብሉ፥ ከም ኵሉ ሰብ ድማ ይእከቡ፥ ከም ሰዊት እኽሊ ድማ ይቚረፁ። ²⁵እዙይ ከምኡ እንተ ዘይኮይኑ፥ ሓሳዊ ዘውፅአንን ንዘረባይ ከንቱ ዝገብሮን መን እዩ?”