ቢልዳድ ዳግማይ ተዛረበ
ናይ መወዳእታ ዘረባ ቢልዳድ ሽዱሽተ ፍቕዲ ጥራሕ እያ፥ ርሕቀት እምበር ካልእ ዝተረፋ ነገር የብላን፦ ስልጣን ናይ እግዚኣብሄር እዩ፥ ኣብ ቅድሚኡ ወርሕን ከዋኽብትን እኳ ንፁሃት ኣይኮኑን፥ እምበኣር መዋቲ ሰብ እንታይ እዩ? ዕፄ፥ ሓሰኻ። ክርክር እቶም ፈተውቲ ቃላት ወዲኡ።
ምዕራፍ 25።
25 1ሽዑ ቢልዳድ ሹሓዊ ኸምዙይ ኢሉ መለሰ፦ 2“ስልጣንን ፍርሓትን ናቱ እዮም፤ ኣብ ላዕለዎት ስፍራታቱ ሰላም ይገብር። 3ንሰራዊቱ ክቘፅሮም ዝኽእል ሰብ ኣሎ ዶ? ብርሃኑከ ኣብ ልዕሊ ኵሉ ሰብ ኣይበርህን ዶ? 4እምበኣር መዋቲ ሰብ ኣብ ቅድሚ እግዚኣብሄር ከመይ ኢሉ ፃድቕ ክኸውን ይኽእል? ካብ ሰበይቲ ዝተወለደኸ ከመይ ኢሉ ንፁህ ክኸውን ይኽእል? 5እንሆ፥ ኣብ ዓይኑ ወርሒ እኳ ብሩህ ኣይኮነን፥ ከዋኽብቲ ድማ ንፁሃት ኣይኮናን፤ 6ዕፄ ዝኾነ መዋቲ ሰብ፥ ሓሰኻ ዝኾነ ወዲ ሰብ ድማ ደኣ ኽንደይ ዘይንእስ!”
