نئیه قادئری‌موطلق واختلار تعیئن اتمئر
ایّوب سوروشور کی، نئیه قادئری‌موطلق موحاکئمه اوچون واختلار تعیئن اتمئر. جاوابسیز قالانلاری سایاری: یرئندن ترپَدئلن سرحد داشلاری، گئروو گؤتورولن دول آروادین اؤکوزو، داغ یاغیشیندا لوت یاتان کاسیبلار، قارانلیقدا ائش گؤرَن قاتئل‌لر و اوغرولار، حال بو کی، اؤلَنلر ناله ادئر و تاری هچ کئمی تقصئرکار ساییمیر.
24 1«نئیه قادئری‌موطلق موحاکئمه اوچون واختلار تعیئن اتمئر؟ نئیه اونو تانییانلار هچ واخت اونون گونلرئنی گؤرمورلر؟ 2شرئرلر سرحد داشلارینی یرئندن تَرپَدئرلر؛ سورولری قاپیب اؤز مالی کئمی اوتارئرلار. 3یِتئمئن اِششه‌یئنی قوووب آپارئرلار؛ دول آروادین اؤکوزونو گئروو گؤتورورلر. 4مؤحتاجلاری یولدان کنارا ائته‌له‌یئرلر، بله‌جه اؤلکه‌ده‌کی کاسیبلار گئزلنمه‌یه مجبور اولورلار. 5باخ، کاسیبلار صحراداکی وحشی اِششَکلر کئمی، یمک آختارا-آختارا اؤز ائشلرئنه چیخیرلار؛ چؤل اونلارین اوشاقلاری اوچون چؤرک ورئر. 6اؤزگه زَمئلرده یِم بئچئرلر و شرئرئن اوزوم باغینی دنله‌یئرلر. 7گجه‌نی لوت کچئرئرلر، پالتارسیز، سویوغا قارشی اؤرتوکلری یوخ. 8داغ یاغیشلاریندان ایسلانیرلار و پناهگاهلاری اولمادیغی اوچون قایایا سیغینیرلار. 9یتئم اوشاق آنا دؤشوندن قاپیلیر، و کاسیبین کؤرپه‌سی گئروو گؤتورولور. 10لوت گَزئرلر، پالتارسیز؛ آج قالا-قالا دَرزلری داشییرلار. 11زیتون باغلاری آراسیندا یاغ سیخیرلار؛ شراب سیخاجاقلاردا ائشله‌یئرلر، آمّا سوسوز قالیرلار. 12شهردن اؤلَنلر ناله ادئرلر، یارالیلارین بوغازی کؤمک اوچون فریاد ادئر؛ آمّا تاری هچ کئمی بو پئسلئیه گؤره تقصئرکار ساییمیر.
13«بعضئلری وار کی، ائشیغا قارشی عاصی اولورلار؛ اونون یوللارینی تانیمیرلار و اونون طرئقلرئنده قالمیرلار. 14سحر چاغی قاتئل قالخیر، کاسیبی و مؤحتاجی اؤلدورمک اوچون، گجه ده اوغرو کئمی دولانیر. 15زئناکارین گؤزو آخشامچاغینی گؤزله‌یئر، ”هچ گؤز منی گؤرمه‌یه‌جک“ دیئ دوشونور و اوزونو گئزلی ساخلاییر. 16قارانلیقدا اِولره گئرئرلر؛ گوندوز اؤزلرئنی گئزله‌دئرلر، چونکی ائشیقلا هچ ائشلری اولماز. 17چونکی قاتی قارانلیق سحردئر اونلارین هامیسینا؛ قارانلیغین دهشتلری ائله آشنادیرلار.
18«آمّا سئز دیئرسئنئز کی، اونلار سولارین اوزونده ایتی‌دئرلر؛ تورپاقدان پایلاری ملعوندور، و هچ کس اونلارین اوزوم باغلارینا اوز توتمور. 19نجه کی قوراقلیق و ائستی اَرئین قاری آپاریر، اله‌جه ده قبئر گوناه ادنلری قاپیر. 20اونلاری دوغان بطن اونلاری یادیندان چیخاردیر؛ قورد اونلاری یئیَر؛ بئر داها یاد ادئلمئرلر، و شرارت بئر آغاج کئمی قیریلیر. 21اوشاق دوغمایان سونسوز آروادی اَزئرلر و دول آروادا مهرئبانلیق اتمئرلر.
22«آمّا تاری اؤز قووّتی ائله قودرتلی‌لری چکئب آپاریر؛ او قالخاندا، هچ کس اؤز حیاتیندان امئن اولمور. 23تاری اونلاری آسایئش ائچئنده دینجلمه‌یه قویور، و اونلار بونا آرخالانیرلار، آمّا اونون گؤزلری اونلارین یوللاریندادیر. 24آز بئر مودّت اوجالیرلار، سونرا یوخ اولورلار؛ هامی کئمی آلچالدیلیب ییغیلیرلار، سونبول باشلاری کئمی بئچئلئرلر. 25اگر بله دیئلسه، کئم منی یالانچی چیخارا بئلر و سؤزلرئمی هچه سایا بئلر؟»
