Nda Amuuchi Anyoor Ineendet
Machei Job kapkirwooget, ma lugeet. Nda ngen ole menyei Kamuktaindet, kiip ng'aleekyik tainnyi ak kinyaan. Ago ma mi Kamuktaindet murot tai anan murot let, ak yaei ne machei komugul. Mwaei Job kole among'u ko uu thahabu, ak tebee eng' ywenatet.
23 1Ki wol Job koleenji, 2“Agot ra ko ng'waan ng'olyoondennyu; nyigiis eunnyi agot tigenoinyu. 3Nda angen ole amuuchi anyoor ineendet, si kobiit anyo oldanyi! 4Aip ng'aleekyuk tainnyi ak anyiit kutinnyu ng'aleegap boljindo. 5Aneetigei ng'aleek che wolu anee, ak aguiyo ne mwaiwo. 6Tos kobolji anee eng' ooindap kimnateennyi? Acha—kogas anee iman. 7Eng' olooto ko muuchi chiitap iman kong'alaal ak ineendet, ak asarak koigeny eng' kirwoogindennyu. 8Ago ngo awendi komostap kong'asiis, ko ma mi yooto; ak eng' cherongo ko ma muuchi anyoor ineendet. 9Ye yaei poisyet eng' murot kaataam, ko ma muuchi ageer; ye weigei murot tai, ko ma muuchi anyoor ineendet. 10Ago ingen ooreet ne awendi; ye kagotyema, among'u ko uu thahabu. 11Kanamgei keeldonyu tyegutikyik; kaariip ooreennyi ak ma kaastoegei. 12Ma kaabagaakta ng'atuutigap kutinnyi; kaagonoree ng'aleegap kutinnyi ne siir amitwogikyuk che po kotugul. 13Ago ma walakei—ng'a ne muuchi koweekta? Kiit age tugul ne machei, koyaei. 14Amu koyaei kiy ne king'atyi anee, ak chaang' tuguuk che uu nooto che mi muguleldanyi. 15Nooto si aiyweisei tainnyi; ye abwaat, aiywei ineendet. 16Ki yai Kamuktaindet muguleldanyu konyaluli; ki iyweisyo Ne po Kamuktaet. 17Ago ma kaasilem eng' mesundeito, anan eng' imenindo ne oo ne tuch togeennyu.”