Kong'alaal Eliphas Kogeny
Kochobchin Eliphas Job kirwoogutik: koreegune che poortanik ngoroikwak, koetenen beek che nyaluli, koon mosoogik koba puch. Koleenji Job koyemjigei, koinde thahabunyi eng' temburyek, ak koegu Ne po Kamuktaet thahabunyi. Kararaan kaguiyet eng' iitet, ago ma po iman kirwoogutyet.
22 1Kowol anyun Eliphas Temanindet koleenji, 2“Tos imuuchi chii konuchee Kamuktaindet kelunet age? Iman kole chiito ne ng'om konuchee kelunet ineegei kityo. 3Tos baibaitune Kamuktaindet Ne po Kamuktaet ngo imanit inyee, anan tos mi kelunet age ngo isup ooreet ne ma tinyei leluut? 4Tos amu kayaneng'ung' si ng'ururuuken ineendet ak koibun kirwoogutyet? 5Tos ma oo sogornateng'ung'? Tos ma tinyei let tengeguk? 6Amu ki imagena tupchosyeguk kii ne kirate puch, ak ki ireegune ngoroik piik che mi aach ngor. 7Ma ki ioochi beek che nyaluli koee, ak ki ietenen amdit che amei rubeet. 8Chiito ne tinyei kamuget ko po emet, ak ki meny ne chamat eng' ineendet. a a v8 Mwaei Eliphas kole ki geer Job emet ko po piik che tinyei kimnateet kityo, ak kobagakta mogoreek ma tinyei kiy age. 9Ki ioon mosoogik koba puch, ak ki ng'em eunegap kibananook. 10Eng' nooto anyun si yiemin mestonok, ak kotuch inyee kamuiset ne cheein; 11anan mesundeito, si ma imuuchi igeer, ak kopiiten maraneet ne po beek. 12Tos ma mi Kamuktaindet ole toroor po kipsengwet? Keero ole torooreen kecheik che mi parak miising'! 13Ago imwae ile, ‘Nee ne ngen Kamuktaindet? Tos imuuchi korwookyi eng' mesundeito ne tuui ni? 14Tuch poolik che tuuen ineendet si ma keer, ak wendi ineendet eng' yiemutyetap kipsengwet.’ 15Tos iriiptos ooreet ne po keny ne ki wendi kiptengeginik? 16Ki kinam icheek kota komakoit sait, ak kila maraneet lumdaetnywa. 17Ki leenji icheek Kamuktaindet kole, ‘Bagaaktech kiyokgei! Nee ne imuuchi koyaiywech Kamuktaindet Ne po Kamuktaet?’ 18Ago ineendet ne ki inyiit kooriikwak tuguuk che myachen—nooto anyun ma amache kiy age ne mi kabwaatutigap che ya. 19Keer piik che po iman ak koboiboitu; chotechi che ma tinyei tengek che ya, kole, 20‘Iman kole kagong'emak puunikyok, ak kagoam maat kiy ne ki pagaakta.’ 21Iming'injigei Kamuktaindet nguno ak inyoor kaalyeet kobooto ineendet; eng' nooto konyonjin ne myee. 22Nam ng'atuutyet ne bunu kutinnyi, ak igonor ng'aleekyik eng' muguleldang'ung'. 23Ngo iweekyigei Kamuktaindet Ne po Kamuktaet, kigeteechin kogeny; ngo iste yaityet koloo ak kaang'ung', 24ak inde thahabung'ung' eng' ng'ung'unyek, thahabutap Opir eng' koik che mi kereruut, b b v24 Ki ingen Opir eng' emoni ne po keny ko uu ole punu thahabu ne karaaran miising'. 25ko Kamuktaindet Ne po Kamuktaet ineegei koek thahabung'ung', fedhaing'ung' ne po kamanuutyet ne oo. 26Yeityo ibaibaitune Kamuktaindet Ne po Kamuktaet ak inam togeng'ung' parak kotokyi Kamuktaindet. 27Isaa ineendet, ak kogas inyee, ak isuldaani kaarortaosyeguk. 28Keyai kiy ne ibwaat, ak kokweny lapkeiyet eng' oortinwekuk. 29Ye kibanan alak ak imwae ile, ‘Inam icheek parak!’, ko isaru ineendet che arageni. 30Isaru ineendet agot chiito ne ma po iman, ne kisaru eng' tiliilindap euneguk.”