Job 22 FHB Father's Heart Bible™

22 ¹Tetiya Teman desh laga Eliphaz pora jawab di koise: ²“Ekjon manuh pora Isor ke eku labh dibo pare naki? Hosa bhi gyaani manuh pora nijor ke he labh diye. ³Jodi tumi dharmik ase, Sorbashoktiman ke eku khushi ase naki, nahole jodi tumi dosh nathaka jivon korile, Tar ke eku labh ase naki? ⁴Tumar bhokti nimite naki Tar pora tumi ke gali diye aru tumi ke bichar te ani diye? ⁵Tumar dushtota bisi dangor nohoi naki? Tumar paap khan khotom nathaka nohoi naki? ⁶Kilemane tumi tumar bhai khan pora eku karon nathaka te bondhok mangise, aru nangta thaka khan laga kapor khuli loise. ⁷Thaki juwa manuh khan ke tumi khabole pani dua nai, aru bhuka manuh khan ke roti dibole rukhai loise. ⁸Takot thaka manuh pora matti laga malik hoise, aru morom pa-a manuh ta te thakise. ^a a v8 Eliphaz koi ase Job pora matti tu khali takot thaka khan laga ase koi kene dhurise, aru dukhiya khan ke eku nai kene chari dise. ⁹Tumi bidhowa khan ke khali haath pathai dise, aru etim khan laga haath bhangai dise. ¹⁰Etu nimite phandi khan pora tumi ke gheri ase, aru achanak bhoi pora tumi ke dhoki loise; ¹¹nahole andhera, etu karone tumi dekhibo napare, aru pani laga baan pora tumi ke dhaki diye. ¹²Isor sorgo laga ucha jagate nai naki? Sabi sob pora ucha tara khan kiman ucha te ase! ¹³Kintu tumi koi ase, ‘Isor pora ki jane? Eneka gohin andhera laga majot te Tar pora bichar koribo pare naki? ¹⁴Gohin badal pora Tar ke dhaki diye etu karone Tar dekhibo napare, aru Tar sorgo laga chat uporte berai thake.’ ¹⁵Dushto manuh khan berai juwa purana rasta te tumi bhi thakibo naki? ¹⁶Tarkhan laga homoi napuncha age te taikhan ke chingi loi jaise, tarkhan laga bhetimul baan pani pora dhui loi jaise. ¹⁷Tarkhan pora Isor ke koise, ‘Amikhan ke chari dibi! Sorbashoktiman pora amikhan ke ki koribo pare?’ ¹⁸Kintu Tar he taikhan laga ghor khan ke bhal jinis pora bhorai dise—etu karone dushto khan laga bhabona logote moi eku kaam narakhe. ¹⁹Dharmik khan pora etu dekhi kene khushi hoi; nirdoshi khan pora dushto khan ke sarmisa kori kene koi ase, ²⁰‘Hosa bhi amikhan laga dushman khan khotom hoise, aru taikhan chari juwa jinis khan jui pora khai loise.’ ²¹Etiya Isor ke nijor di dibi aru Tar logote shanti pora thakibi; eneka korile bhal jinis tumi logote ahhibo. ²²Tar laga mukh pora sikhai diya kotha grohon koribi, aru Tar laga kotha khan tumar mon bhitor te rakhibi. ²³Jodi tumi Sorbashoktiman logote ghuri ahhile, tumi aru bhal hoi jabo; jodi tumi tumar ghor pora anyai ke dur te khedai dile, ²⁴aru tumar suna ke dhuli te rakhidile, Ophir laga suna ke nodi laga pathor khan majot te rakhidile, ^b b v24 Purana somoi te Ophir tu sob pora bhal suna ula-a jaga hisab te naam thaka jaga asele. ²⁵titia Sorbashoktiman nijor he tumar suna hobo, tumar daami chandi hobo. ²⁶Titia tumi Sorbashoktiman te anond koribo aru Isor phale tumar chehera uthabo. ²⁷Tumi Tar logote prathana koribo, aru Tar pora tumi laga kotha hunibo, aru tumi tumar kosom khan pura koribo. ²⁸Tumi ki thik koribo, etu hoi jabo, aru tumar rasta khan uporte ujala jilibo. ²⁹Jitia dusra khan ke niche girai diye aru tumi koi, ‘Taikhan ke uthai dibi!’ titia Tar pora niche hoi juwa khan ke bachai dibo. ³⁰Nirdoshi nathaka manuh ke bhi Tar pora bachai dibo, tumar haath laga sapha pora tai ke bachai lobo.”