Job 22

22 ¹Chieina Temanwui Eliphazna ngahānkai: ²"Mipā akhana Vareli khikha kānkhanā samphang ngasakla? Kachangkhatta, thangkhamei mina akhalatta maningla kānkhanā samphanga. ³Na khamashungakha, Sāshap-pangshapali ningyāng khaung leirakhala, lah na shāt makālakla okthuiakha, awui vang khikha tongzā leirakhala? ⁴Nawui khangacheewui vang eina ana nali kaharda nali bichar sāki kajila? ⁵Nawui makhayā kahaka maningmala? Nawui morei matheng maleilakmana? ⁶Kaja maram maleila nawui achinā ngarābingli khangashit khuiya, kala mahonghatbingwui kashankachon raimihaowa. ⁷Nana kakhanangbingli tara̱ manga khavai mamimana, kala kathaibingwui eina kashakazā khalanhaowa. ⁸Pangshapa mina ngalei chi khuiya, kala mathālak mina chili sompama. ^a a v8 Eliphazna hāngmāng hi, Jobna ngalei chi kapangabingwui vangmāng da shānkhuida, kachāmabingli khikha maleila haihaowa da matuina. ⁹Nana ra̱meinaobingli khamasai eina shiunhaowa, kala avāva̱ makhalei naongarābingwui pāng sātekmihaowa. ¹⁰Chiwui vang eina khalenbingna nali kuinama, kala kashuirak kahai khangacheena nali khakshingakhaira; ¹¹lah tangkhamangna nali kuinama, chithākha na matheimara, kala tara̱ kaphongna nali tumhaira. ¹²Vare chi kazingramwui kajuili maleimana? Juimeikap kaje sirābing chi kathada kajuikhala, yanglu! ¹³Chithālala nana hānga, 'Varena khi theikhala? Hikathā tangmangting kahai chi eina ana bichar sāshapla? ¹⁴Muiyā kashāna ali farormi, chithākha ana matheimara, kala ana kazingramwui kuikhamarei atungli zata.' ¹⁵Makhayā mibingna okthuikahai achālakhawui shongfa chi nana singtitra̱khala? ¹⁶Athumwui atam marāranga athumli ngapaithuihaowa, athumwui shimphunga tara̱ kaphongna khuithuihaowa. ¹⁷Athumna Vareli hānga, 'Ithumwui eina thuihaolu! Sāshap-pangshapana ithumli khi sāshaprakhala?' ¹⁸Chithālala ana athumwui shim kaphā ot eina pemngasaka; chiwui vang eina makhayābingwui khangarānli ina khikha mavaimana. ¹⁹Khangarongbingna chi theida ringphāhaowa; khayon makhalei mibingna makhayābingli mana̱shida hānga, ²⁰'Makahatlakla ithumwui yangkashebing shimānhaira, kala meina athumna nothāhaikasā chi chuithathaira.' ²¹Ara Vareli hamsangda ali chingrihailu; chithāda nawuili kaphā rāra. ²²Akhamor eina hāngkachithei khuilu, kala awui tui naningli kaziphailu. ²³Nana Sāshap-pangshapali mai ngareiungakha kakhuisangmiluishitra; makhamashung chi nawui shim eina tāda kashamshokakha, ²⁴kala nawui sinā chifali, Ophirwui sinā chi pālongkhurwui lungguibing ngachaili haiakha, ^b b v24 Ophir chi achālakha atamli kaphāmei sinā samphangpam sāda okathuili theilak kahai leisai. ²⁵chithākha Sāshap-pangshapa akhalattana nawui sinā kala nawui aman kasaka lupāsā ngasāra. ²⁶Chithākha nana Sāshap-pangshapali ringphāra, kala Vareli namai yangkāra. ²⁷Nana ali seihā sāra, kala ana nali shāra, kala nana nawui khangashit ungshung ngasakra. ²⁸Nana kakkhui chi sāra, kala nawui shongfali kahor horra. ²⁹Kateibing maishi ngasak tharan kala nana, 'Athumli reingasaklu!' da hāngakha, ana khangazanbingli huimira. ³⁰Ana khayon khalei mi eina tangda kanshokra, nawui pāng kathar eina ana kanshok samphangra."