Elifaz Ya Sāke Magana

Daga ƙarshe Elifaz ya ƙago tuhume-tuhume: tuɓe wa matalauta tufafi, hana gajiyayye ruwa, korar gwauraye hannu wofi. Ya ce wa Ayuba ya miƙa kai, ya zuba zinariyarsa cikin ƙura, ya bar Mai Iko Duka ya zama zinariyarsa. Shawarar tana da daɗin ji, tuhumar kuwa ƙarya ce.

Babi na 22.

Sai Elifaz mutumin Teman ya amsa ya ce, “Ko mutum zai iya amfana wa Allah da wani abu? Hakika mai hikima yana amfanar kansa ne kaɗai. Ko Maɗaukaki yana jin daɗi in kai mai adalci ne, ko kuwa akwai ribar da zai samu in ka yi rayuwa marar aibi? Ko saboda tsoron da kake yi masa ne yake tsautar maka, yake kuma kawo ka gaban shari'a? Ashe, muguntarka ba mai girma ba ce? Ashe, zunubanka ba su da iyaka ba? Gama ka karɓi jingina daga wurin 'yan'uwanka ba dalili, ka kuma tuɓe wa tsirara tufafinsu. Ba ka ba gajiyayye ruwa yă sha ba, ka kuma hana mai yunwa abinci. Mai iko shi ne ya mallaki ƙasar, wanda aka fifita kuma ya zauna a cikinta. ^a Ka kori gwauraye hannu wofi, ka kuma karya hannuwan marayu. Shi ya sa tarko ya kewaye ka, razana kuma ba zato ba tsammani ta sha kanka; ko kuma duhu, har da ba ka iya gani ba, ambaliyar ruwa kuma ta rufe ka. Ashe, Allah ba ya cikin can bisa sama ba? Dubi yadda taurari mafiya tsayi suke can sama! Amma kana cewa, ‘Me Allah ya sani? Ko zai iya yin shari'a ta cikin wannan matsanancin duhu? Gajimare masu kauri sun rufe shi har ba ya iya gani ba, yana kuma takawa a kan rufin sama.’ Za ka ci gaba da bin tsohuwar hanyar da mugaye suka taka ne? An ƙwace su kafin lokacinsu, harsashinsu kuwa ambaliyar ruwa ta share. Suka ce wa Allah, ‘Ka rabu da mu! Me Maɗaukaki zai iya yi mana?’ Alhali shi ne ya cika gidajensu da abubuwa masu kyau—saboda haka ba ruwana da shawarwarin mugaye. Masu adalci sun gani suka yi murna; marasa laifi suna yi wa mugaye ba'a, suna cewa, ‘Hakika an hallaka maƙiyanmu, wuta kuma ta cinye abin da suka bari.’ Ka miƙa kanka ga Allah yanzu ka kuma yi sulhu da shi; ta haka ne alheri zai zo maka. Ka karɓi koyarwa daga bakinsa, ka kuma ajiye kalmominsa a cikin zuciyarka. In ka komo wurin Maɗaukaki za a maido da kai; in ka kori rashin adalci nesa da gidanka, ka kuma kwantar da zinariyarka a ƙura, zinariyar Ofir a cikin duwatsun rafi, ^b to, Maɗaukaki kansa zai zama zinariyarka, azurfarka mai daraja. Sa'an nan za ka ji daɗi a cikin Maɗaukaki, ka kuma ɗaga fuskarka ga Allah. Za ka yi masa addu'a, shi kuma zai ji ka, za ka kuma cika alkawuranka. Abin da ka ƙudura za a yi shi, haske kuma zai haskaka a kan hanyoyinka. Sa'ad da aka ƙasƙantar da waɗansu kuma ka ce, ‘A ɗaga su!’, zai ceci masu karaya. Zai ceci har wanda ba marar laifi ba, wanda za a cece shi ta wurin tsabtar hannuwanka.”