ኢዮብ 22

22 ¹ቴማናዊው ኤሊፋዝም እንዲህ ሲል መለሰ፦ ²“ሰው እግዚአብሔርን ሊጠቅም ይችላልን? ጥበበኛው ሰው በርግጥ ራሱን ብቻ ነው የሚጠቅመው። ³ጻድቅ ብትሆን ለሁሉን ቻዩ ደስታ ይሆነዋልን? ነውር በሌለበት ብትኖር ለእርሱ ትርፍ ይሆንለታልን? ⁴ስለ መፍራትህ ነውን የሚገሥጽህ፣ ወደ ፍርድም የሚያመጣህ? ⁵ክፋትህ ታላቅ አይደለምን? ኀጢአትህስ ፍጻሜ የሌለው አይደለምን? ⁶ከወንድሞችህ ያለ ምክንያት መያዣ ጠየቅህ፤ የተራቈቱትንም ልብስ ገፈፍህ። ⁷ለደከመው ውሃ አላጠጣኸውም፤ ከተራበውም እንጀራ ነሣህ። ⁸ኀያሉ ሰው ምድሪቱን ገዛ፤ የተወደደውም በእርሷ ኖረ። ^a a v8 ኤሊፋዝ ኢዮብ ምድሪቱ የኀያላን ብቻ እንደ ሆነች አድርጎ እንደ ያዛትና ድኾችን ባዶ እጃቸውን እንደ ተዋቸው ይጠቁማል። ⁹መበለቶችን ባዶ እጃቸውን ሰደድህ፤ የድኻ አደጐችንም ክንድ ሰበርህ። ¹⁰ስለዚህ ወጥመዶች ከበቡህ፤ ድንገተኛ ድንጋጤም ወረረህ፤ ¹¹ወይም ማየት እንዳትችል ጨለማ ሆነ፤ የውሃም ጐርፍ ይሸፍንሃል። ¹²እግዚአብሔር በሰማይ ከፍታ ላይ አይደለምን? ከፍ ያሉት ከዋክብት እንዴት ከፍ እንዳሉ ተመልከት! ¹³ነገር ግን አንተ፣ ‘እግዚአብሔር ምን ያውቃል? በዚህ ጥቅጥቅ ጨለማ ውስጥ ሆኖ ሊፈርድ ይችላልን? ¹⁴ወፍራም ደመና ማየት እንዳይችል ይጋርደዋል፤ በሰማይ ጠፈርም ላይ ይመላለሳል።’ ¹⁵ክፉ ሰዎች የተመላለሱበትን የጥንቱን መንገድ ትጠብቃለህን? ¹⁶ጊዜያቸው ሳይደርስ ተነጠቁ፤ መሠረታቸውም በጐርፍ ተጠራረገ። ¹⁷ለእግዚአብሔር፣ ‘ተወን! ሁሉን ቻዩ ምን ሊያደርገን ይችላል?’ አሉ። ¹⁸ነገር ግን ቤቶቻቸውን በመልካም ነገር የሞላ እርሱ ነበር፤ ስለዚህ ከክፉዎች ምክር ጋር ምንም የሚያገናኘኝ የለም። ¹⁹ጻድቃን አይተው ደስ ይላቸዋል፤ ንጹሓኑም ክፉዎችን እያፌዙ እንዲህ ይላሉ፤ ²⁰‘ጠላቶቻችን በርግጥ ጠፍተዋል፤ እሳትም ያስቀሩትን በልቷል።’ ²¹አሁን ለእግዚአብሔር ተገዛ፤ ከእርሱም ጋር ታረቅ፤ በዚህ መንገድ መልካም ነገር ይመጣልሃል። ²²ከአፉ ትምህርትን ተቀበል፤ ቃላቱንም በልብህ አኑር። ²³ወደ ሁሉን ቻዩ ብትመለስ ትታደሳለህ፤ ግፍን ከቤትህ ብታርቅ፤ ²⁴ወርቅህንም በትቢያ ላይ ብታኖር፣ የኦፊርንም ወርቅ በወንዝ ድንጋዮች መካከል ብትጥል፤ ^b b v24 ኦፊር በጥንቱ ዓለም ከሁሉ የተሻለ ወርቅ የሚገኝበት ቦታ በመሆኗ ዝነኛ ነበረች። ²⁵ያን ጊዜ ሁሉን ቻዩ ራሱ ወርቅህ፣ ክቡር ብርህም ይሆናል። ²⁶ያን ጊዜ በሁሉን ቻዩ ደስ ይልሃል፤ ፊትህንም ወደ እግዚአብሔር ታነሣለህ። ²⁷ወደ እርሱ ትጸልያለህ፤ እርሱም ይሰማሃል፤ ስእለትህንም ትፈጽማለህ። ²⁸የወሰንከው ነገር ይፈጸማል፤ በመንገዶችህም ላይ ብርሃን ያበራል። ²⁹ሌሎች ዝቅ ዝቅ ሲደረጉ አንተ፣ ‘ከፍ አድርጋቸው!’ ስትል፣ የተዋረዱትን እርሱ ያድናቸዋል። ³⁰ንጹሕ ያልሆነውን እንኳ ያድነዋል፤ እርሱም በእጆችህ ንጽሕና ይድናል።”