ଇଲୀଫସ୍‌ ପୁନର୍ବାର କହିଲେ

ଶେଷରେ ଇଲୀଫସ ଅଭିଯୋଗ ଗଢ଼ନ୍ତି: ଦରିଦ୍ରମାନଙ୍କ ବସ୍ତ୍ର କାଢ଼ି ନେବା, କ୍ଳାନ୍ତକୁ ଜଳ ନ ଦେବା, ବିଧବାମାନଙ୍କୁ ଶୂନ୍ୟ ହସ୍ତରେ ବିଦାୟ କରିବା। ସେ ଆୟୁବଙ୍କୁ ବଶୀଭୂତ ହେବାକୁ, ଆପଣା ସୁନାକୁ ଧୂଳିରେ ରଖିବାକୁ ଓ ସର୍ବଶକ୍ତିମାନଙ୍କୁ ଆପଣା ସୁନା କରିବାକୁ କହନ୍ତି। ପରାମର୍ଶ ସୁନ୍ଦର ଶୁଣାଯାଏ, ଆଉ ଅଭିଯୋଗ ମିଥ୍ୟା।

ଅଧ୍ୟାୟ 22।

ସେତେବେଳେ ତୈମନୀୟ ଇଲୀଫସ୍‌ ଉତ୍ତର ଦେଲେ, “ମନୁଷ୍ୟ କʼଣ ଈଶ୍ଵରଙ୍କ କୌଣସି ଉପକାରରେ ଆସିପାରେ? ଜ୍ଞାନୀ ତ କେବଳ ଆପଣାର ହିଁ ଉପକାର କରେ। ତୁମ୍ଭେ ଧାର୍ମିକ ହେଲେ ସର୍ବଶକ୍ତିମାନଙ୍କର କʼଣ ଆନନ୍ଦ ହୁଏ, ଅବା ତୁମ୍ଭେ ନିର୍ଦ୍ଦୋଷ ଭାବରେ ଜୀବନ କଟାଇଲେ ତାହାଙ୍କର କʼଣ ଲାଭ ହୁଏ? ତୁମ୍ଭର ଭକ୍ତି ସକାଶେ କʼଣ ସେ ତୁମ୍ଭକୁ ଅନୁଯୋଗ କରନ୍ତି ଓ ବିଚାରକୁ ଆଣନ୍ତି? ତୁମ୍ଭର ଦୁଷ୍ଟତା କʼଣ ବଡ଼ ନୁହେଁ? ତୁମ୍ଭର ପାପ କʼଣ ଅସୀମ ନୁହେଁ? କାରଣ ତୁମ୍ଭେ ବିନା କାରଣରେ ଆପଣା ଭାଇମାନଙ୍କଠାରୁ ବନ୍ଧକ ମାଗିଲ ଓ ଉଲଗ୍ନ ଲୋକଙ୍କ ବସ୍ତ୍ର ଛଡ଼ାଇ ନେଲ। ତୁମ୍ଭେ କ୍ଳାନ୍ତ ଲୋକକୁ ପିଇବା ନିମନ୍ତେ ଜଳ ଦେଲ ନାହିଁ ଓ କ୍ଷୁଧିତ ଲୋକଠାରୁ ଆହାର ଅଟକାଇ ରଖିଲ। ପରାକ୍ରମୀ ଲୋକ ଦେଶର ଅଧିକାରୀ ହେଲା ଓ ମାନ୍ୟ ବ୍ୟକ୍ତି ତହିଁ ମଧ୍ୟରେ ବାସ କଲା। ^a ତୁମ୍ଭେ ବିଧଵାମାନଙ୍କୁ ଖାଲି ହାତରେ ବିଦାୟ କଲ ଓ ପିତୃହୀନମାନଙ୍କ ବାହୁ ଭଗ୍ନ କଲ। ଏଥିପାଇଁ ଫାନ୍ଦସବୁ ତୁମ୍ଭକୁ ଘେରି ରହିଅଛି ଓ ଆକସ୍ମିକ ଆଶଙ୍କା ତୁମ୍ଭକୁ ବିବ୍ରତ କରୁଅଛି; ଅବା ଅନ୍ଧକାର, ଯେପରି ତୁମ୍ଭେ ଦେଖିପାର ନାହିଁ ଓ ଜଳର ବନ୍ୟା ତୁମ୍ଭକୁ ଆଚ୍ଛାଦନ କରୁଅଛି। ଈଶ୍ଵର କʼଣ ସ୍ଵର୍ଗର ଉଚ୍ଚସ୍ଥଳୀରେ ନାହାନ୍ତି? ଉଚ୍ଚତମ ନକ୍ଷତ୍ରସବୁ କେଡ଼େ ଉଚ୍ଚରେ ଅଛି, ତାହା ଦେଖ! ତଥାପି ତୁମ୍ଭେ କହୁଅଛ, ʻଈଶ୍ଵର କʼଣ ଜାଣନ୍ତି? ସେ କʼଣ ଏପରି ଗାଢ଼ ଅନ୍ଧକାର ମଧ୍ୟ ଦେଇ ବିଚାର କରିପାରନ୍ତି? ନିବିଡ଼ ମେଘ ତାହାଙ୍କୁ ଆଚ୍ଛାଦନ କରେ, ତେଣୁ ସେ ଦେଖିପାରନ୍ତି ନାହିଁ ଓ ସେ ସ୍ଵର୍ଗର ମଣ୍ଡଳ ଉପରେ ଗମନାଗମନ କରନ୍ତି।ʼ ଦୁଷ୍ଟ ଲୋକମାନେ ଯେଉଁ ପୁରାତନ ପଥରେ ଚାଲିଅଛନ୍ତି, ତୁମ୍ଭେ କʼଣ ସେହି ପଥ ଅବଲମ୍ବନ କରିବ? ସେମାନେ ଆପଣା ଆପଣା ସମୟ ପୂର୍ବରୁ ଅପହୃତ ହେଲେ ଓ ସେମାନଙ୍କ ଭିତ୍ତିମୂଳ ବନ୍ୟାରେ ଧୋଇ ହୋଇଗଲା। ସେମାନେ ଈଶ୍ଵରଙ୍କୁ କହିଲେ, ʻଆମ୍ଭମାନଙ୍କୁ ଛାଡ଼ିଦିଅ! ସର୍ବଶକ୍ତିମାନ ଆମ୍ଭମାନଙ୍କ ପ୍ରତି କʼଣ କରିପାରିବେ?ʼ ତଥାପି ସେ ହିଁ ସେମାନଙ୍କ ଗୃହକୁ ଉତ୍ତମ ଦ୍ରବ୍ୟରେ ପରିପୂର୍ଣ୍ଣ କରିଥିଲେ—ଏଣୁ ଦୁଷ୍ଟମାନଙ୍କ ମନ୍ତ୍ରଣା ସହିତ ମୋହର କୌଣସି ସମ୍ପର୍କ ନାହିଁ। ଧାର୍ମିକମାନେ ତାହା ଦେଖି ଆନନ୍ଦ କରନ୍ତି; ନିର୍ଦ୍ଦୋଷ ଲୋକମାନେ ଦୁଷ୍ଟମାନଙ୍କୁ ପରିହାସ କରି କହନ୍ତି, ʻନିଶ୍ଚୟ ଆମ୍ଭମାନଙ୍କ ଶତ୍ରୁଗଣ ବିନଷ୍ଟ ହୋଇଅଛନ୍ତି ଓ ସେମାନେ ଯାହା ଛାଡ଼ି ଯାଇଥିଲେ, ତାହା ଅଗ୍ନି ଗ୍ରାସ କରିଅଛି।ʼ ଏବେ ଈଶ୍ଵରଙ୍କ ବଶୀଭୂତ ହୁଅ ଓ ତାହାଙ୍କ ସହିତ ଶାନ୍ତିରେ ରୁହ; ଏହିପରି ଭାବରେ ତୁମ୍ଭ ପ୍ରତି ମଙ୍ଗଳ ଘଟିବ। ତାହାଙ୍କ ମୁଖରୁ ଉପଦେଶ ଗ୍ରହଣ କର ଓ ତାହାଙ୍କ ବାକ୍ୟ ଆପଣା ହୃଦୟରେ ସଞ୍ଚୟ କରି ରଖ। ଯଦି ତୁମ୍ଭେ ସର୍ବଶକ୍ତିମାନଙ୍କ ନିକଟକୁ ଫେରିଆସ, ତେବେ ତୁମ୍ଭେ ପୁନଃସ୍ଥାପିତ ହେବ; ଯଦି ତୁମ୍ଭେ ଆପଣା ଗୃହରୁ ଅନ୍ୟାୟକୁ ଦୂର କର, ପୁଣି ଆପଣା ସୁବର୍ଣ୍ଣ ଧୂଳିରେ ଓ ଓଫୀରର ସୁବର୍ଣ୍ଣ ନଦୀତଳର ପ୍ରସ୍ତରମାନଙ୍କ ମଧ୍ୟରେ ରଖ, ^b ତେବେ ସର୍ବଶକ୍ତିମାନ ସ୍ଵୟଂ ତୁମ୍ଭର ସୁବର୍ଣ୍ଣ, ତୁମ୍ଭର ବହୁମୂଲ୍ୟ ରୌପ୍ୟ ହେବେ। ସେତେବେଳେ ତୁମ୍ଭେ ସର୍ବଶକ୍ତିମାନଙ୍କଠାରେ ଆନନ୍ଦ କରିବ ଓ ଈଶ୍ଵରଙ୍କ ଆଡ଼କୁ ଆପଣା ମୁଖ ଉତ୍ତୋଳନ କରିବ। ତୁମ୍ଭେ ତାହାଙ୍କ ନିକଟରେ ପ୍ରାର୍ଥନା କରିବ ଓ ସେ ତୁମ୍ଭ କଥା ଶୁଣିବେ, ପୁଣି ତୁମ୍ଭେ ଆପଣା ମାନତ ପୂର୍ଣ୍ଣ କରିବ। ତୁମ୍ଭେ ଯାହା ସ୍ଥିର କରିବ, ତାହା ସଫଳ ହେବ ଓ ତୁମ୍ଭ ପଥ ଉପରେ ଆଲୋକ ପ୍ରକାଶିତ ହେବ। ଯେତେବେଳେ ଅନ୍ୟମାନେ ଅବନତ ହୁଅନ୍ତି ଓ ତୁମ୍ଭେ କୁହ, ʻସେମାନଙ୍କୁ ଉଠାଅ!ʼ, ସେତେବେଳେ ସେ ଅବନତ ଲୋକକୁ ଉଦ୍ଧାର କରିବେ। ଯେ ନିର୍ଦ୍ଦୋଷ ନୁହେଁ, ତାହାକୁ ସୁଦ୍ଧା ସେ ଉଦ୍ଧାର କରିବେ ଓ ତୁମ୍ଭ ହସ୍ତର ଶୁଚିତା ଦ୍ଵାରା ସେ ଉଦ୍ଧାର ପାଇବ।”