2 Wungnaobing 6

6 ¹Marānbingwui naomayarabingna Elishali hānga, "Yanglu, nawui azingli ithum okpam kahai apam hi ithumwui vang teonahaira.

²Jordanli vausa, mi kachiva̱na thing akha khuida chili ithumna okpam khavai apam akha sāsa." Ana hānga, "Vālu."

³Athumwui akhana hānga, "Ina kapona, naraobingli ngasoda vākhavai mayāngailu." Ana ngahānkai, "Ina vāra."

⁴Chieina ana athumli ngasoda vai. Athumna Jordanli vāshungda thingrong ta̱tekhaowa. ⁵Akhana thing ta̱tek tharan, ngahā akui chi tara̱li tai. Ana chapta hānga, "Iyavo, iwui amei! Chi shuksangkahaina!"

⁶Ithumwui Avāwui mina ngahāna, "Kachipamli tai?" Mi china apam chi Elishali chithei. Elishana thing khayim akha renkhuida chili horhaowa, kala mari chi khalap ngasaka. ⁷"Chi reisokkhuilu," da ana hānga. Chieina mi china apāng khangkāda chi khuisinga.

Avāwui Mei Raimina Elishali Yangmi

⁸Aramwui awungana Israelli rai tā kahaina. Ana araobingli ngazek ngarokta hānga, "Iwui rāmrah chi apam thadathadali leira."

⁹Ithumwui Avāwui mina Israelwui awungali ningmida hānga, "Apam hili mazangalu, kaja Aramnaobing chili katā kahaina." ¹⁰Chieina Israelwui awungana ithumwui Avāwui mina namei kahai apam chili hāngchihovāhaowa; ana chili akhalatta phāri sai; chi akhashi lah khani shi maningmana. ¹¹Hiwui vang Aramwui awungana malungvātlakhaowa. Ana araobingli hokhuilaga ngahāna, "Ithumwui ngachai eina khipāna Israelwui awungali ngachonkhame kaji nathumna ili mahāngmapaimara?"

¹²Araobingwui akhana hānga, "Ishāmei awunga, khipānakha maningmana. Israelli khalei marān Elishana nana shimlungshongli khamatui tui chi Israelwui awungali hāngngasaka."

¹³Awungana hānga, "Ina mi chihovāda ali tukkhui khavai, vālu, ana kachipamli leikhala yanglu." Chieina ali unghānga, "Ana Dothanli lei."

¹⁴Ana chili sigui, siguigari kala raimi kachungkha chihovāhaowa; athumna ngayā rāda keinung chi kuinama. ¹⁵Ithumwui Avāwui miwui rao china ngathorthakva̱ ngakarthuida kayāngli shokvai tharan sigui kala siguigari khuiphungda raimibingna keinung chi kuinam kahai chi theihaowa. Raona hānga, "Iyavo, iwui amei! Ithumna khi sarakhala?"

¹⁶Ana ngahānkai, "Mangacheealu, ithumli ngaso kahaibing chi athumli ngaso kahaibing phamei chungmeira." ¹⁷Elishana seihā sāda hānga, "O iwui Avā, ana theira jipai khavai amik rak ngasakmilu." Kala ithumwui Avāna naoshinaopawui amik rak ngasaka: ana kaphung chi Elishali kuimareida sigui kala meiwon siguigarina pemtinghai kahai chi theihaowa. ¹⁸Syrianaobingna awuili kharā tharan, Elishana ithumwui Avāli seihā sāda hānga, "Miyur hibingli mik ngapeo ngasakmilu da kapona." Chieina Elishawui hāng athishurda, ana athumli mik ngapeo ngasaka.

¹⁹Elishana hānga, "Hi shongfa maningmana, keinung chila maningmana. Ili shurlu; nathumna phā mipā chili ina nathumli thānvāra." Chieina ana athumli Samariali thānvai. ²⁰Athumna Samariali azang tharan, Elishana hānga, "O iwui Avā, athumna thei khavai miyur hibingwui mik rak ngasakmilu." Chieina ithumwui Avāna athumwui mik rak ngasaka, kala athum Samariawui alungli lei kaji athumna theihaowa.

²¹Athumli theilaga, Israelwui awungana Elishali hānga, "Iwui avā, ina athumli shaothatra? Shaothatra?"

²²Ana hānga, "Athumli mashaothatalu. Nawui raighai kala malā eina khui kahaibingli nana shaothatngaila? Athumli kashakazā kala tara̱ shaikhavai kala mangkhavai milu, chiwui thili athumwui akhavāli unguranu."

²³Ana zātkhān kahakva akha sai; athumna phāshak phazāngaruma, chiwui thili ana athumli athumwui akhavāli chihovai. Syriawui khangaponbing Israelwui ngaleili marāluithuwa.

Kuinam kala Chāmreina Samariali Ngataikachupa

²⁴Atam khaleilaga Aramwui awunga Ben-hadadna awui raimibing saikora kazipkhuida rātāda Samariali kuinama. ²⁵Kuinamlungli Samariali zāt sakkachangkhathaowa; gadhāwui akui chi lupā hangchishatna yorkasanga, kala nāsha̱wui akhi kab akhawui amatikhai akha chi lupā phangāna yorkasanga. ^a a v25 Kab hi kachichā khakhaowui thinghang khangan khangan akhana, quart khangan thāda; chieina kab akhawui amatikhai akha hi zāt kasak atamwui kashakazā kateo maleikasā akhana. ²⁶Israelwui awunga phākho ngalemli kānvai tharan sha̱nao akhana panglāk eina vaoda hānga, "Iwui amei awunga, ili ngachonmilu!"

²⁷Ana hānga, "Ithumwui Avāna nali mangachonakha, ina nali akhuida ngachon phākhuimirakhala? Lanpumwui eina khuirakhala? Drakhātheiwui eina khuirakhala?" ²⁸Awungana ngahānkai, "Nawui kasak khi leihaokhala?" Ana hānga, "Sha̱nao hina ili hānga, 'Aja nawui naomayara chi shaikhavai milu; akhama imang chi ithumna shaira.'

²⁹Chieina ithumna iwui naomayarali hanglaga shai. Akhamathang ina hānga, 'Ithumna shaikhavai nawui naomayara chi milu,' kha ana ali ngathumhaowa."

³⁰Sha̱naowui tui kashā tharan, awungana awui kachon serkhāka; ana phākho ngalemli kānvai tharan mibingna awui phasā azingli bora ngavaikasā chi thei. ³¹Ana hānga, "Shaphatwui naomayara Elishawui akui aja awuitungli leichingakha, ithumwui Avāna ili tandi mida zakshimeikharda miranu!"

³²Elishana awui shimli pamsai, kala khararnaobing ali ngasoda pama. Awungana awui rida mi akha chihovai, kha paome china marāshungranglakha Elishana khararnaobingli hānga, "Shaokathatwui naomayara hina iwui akui katatkhavai chihovai kaji nathumna theila? Yanglu, ana rā tharan, khāmong shungda ali ngasungmilu. Awui akhavāwui pheikhon awui khanukli maleimala?"

³³Ana athumli hāng mamānlakha, paome china awuili rāhaowa. Awungana hānga, "Hi kalākashi hi ithumwui Avāwui eina rāhaira. Khisāthuda ina ithumwui Avāli kasangda kachihāna?"