Kakhamnu Riangre Siari
Khouring ding ngam hungnu nun na bathing tuipui bachan bi han ongga Moses om laa khatle Zao saza om laa toga rinne, ani Pa om lampui bing ririak senu khatle bazenu diga kouga. Tambaan chonglang siari ga bathiangnu baan chuinu linen pwan sin basoiluga kam siari le diga han swakke, khatle kam bing sok loi mak basaan pakhatchanale bathiangnu in la lut ngam maknu to lang meikhut na haba sip thang rwe.
15 1Eina tambaan la kaliannu khatle tasiatnu badannu katei khat mu rwe: kakhamnu riangre siari choinu tambaan chonglang siari; balangbe bani bi ani Pa om balung pwan loi thang rwe.
2Eina mei thang karungnu bathing tuipui danga mu rwe. Khatle khouring, bamaang khatle bameng om sing ding ngam hungnu nun ga ani Pa om taraa choiluga haba paan bi han ong ngaake. 3Khatle banina ani Pa om chong Moses om laa khatle Zao saza Jisu om laa toga rinne, “Nachwan bing ga kaliannu khatle tasiatnuwe, He Pukraangba Ngam Bachangnu Apa! Nalampui bing ga ririak senuwe khatle bazenuwe, chaat bing om Krwang! 4He Apa, tuna Nang ding kachi makka Nameng ding lwat pi lian thanglayebo? Balangbe Nang araanto za bathiangnuwe. Chaat bing khangna hungluga Namaitwang bi kalumlune, balangbe Na om ririak senu chwan bing ga indao thang rwe.”
5Haba nung bi eina phaang rwe, khatle tambaan la bathiangnu in, sake om pwan in ga pi lat swak thang rwe. 6Riangre siari choinu tambaan chonglang siari ga bathiangnu baan chuinu linen pwan sin basoiluga, bani kachaang bi kachaak kongkhaak sinluga, bathiangnu in bina swak hung rwe.
7Haba nung bi ringnu katha amnu bali meithaan lak pina pakhatna, kachaak kam siari ding tambaan chonglang siari khou pi rwe; haba kam bing ga khwa seiga ringnu ani Pa om balung pwanna sip ngaake. 8Ani Pa om lwat khatle Baom nat bina meikhut ka bathiangnu in bi sipe; tambaan chonglang siari om riangre siari loi thang mak basaan maan, pakhatcha hakna haba bi khut ngam mak ngaake.