Zao saza khatle 144,000
Zao saza ga Zion Rammwan chung bi han ongme, bani bachan bi Bapa meng hiak thangnu mi 144,000 le diga; katei pakhatchanale chong thei ngam maknu laa khat bani theiye. Tambaan chonglang inthum zwang ongme: chaat khatcha khatcha lang lwat liannu chong, Babylon om badannu, khatle khouring ding kalumnu nun ding baningsu piga. Atiga talei ram tapaan ga lwakme khatle drakha kraa bing ga drakha tui sumnu riak pi bazwan rwe.
Ani Pa na chongkhak heiya bi kabia nge 13
14 1Zao saza Jisu Zion Rammwan chung bi han ongnu khatle bani bachan bi Bameng le Bapa meng hiak thangnu mi 144,000 eina mu rwe. 2Tambaan lana khwan khat tuipui baraam dannu khatle khwa barinu baraam basaangnu dannu eina ngaisu rwe, khatle eina ngaisunu khwan ga tara semnu nun na baom tara semnu baraam danne. 3Banina takung riak meithaan bi, ringnu katha amnu bali khatle bararwang nun meithaan bi laa kathan to rwe; talei ram bina ran swak thangnu mi 144,000 za makka khatchale haba laa ding chong thei ngam make. 4Hei bing ga mannu nun le bathiang mak to maknu nun gaye, balangbe bani reizuni gaye. Zao saza Jisu tulam thou dannu bina Maan ding bani zui ongme; mi nun lak pina kalei thangnu, ani Pa khatle Zao saza lang kamanu kraaye, 5khatle bani bao bi chong karwaknu lousu make; bani noh maaknu gaye.
Khwa seinu Sacham ga Indao swakme
6Tambaan chonglang katei khat talei ram bi amnu chaat bing, phum bing, chong chaat bing khatle mi nun—ha bing khou indao lang khwa seinu sacham choiga tambaan zai bi zwang ongnu eina mu rwe. 7Maanna baraam basaangga rinne, “Ani Pa ding kachiga Maan ding lwat liannu pi hungro, balangbe Baom chong kasemnu chakrin ga hung tang rwe. Tambaan, talei ram, tuipui khatle tui tuipwak bing to thangnu Maan ding kalummo.”
8Kaninu tambaan chonglang khat zui hung late, “Kaliannu Babylon ga ta drwe, ta drwe, baom lungkoi lungmaannu balung pwannu om zu ding chaat bing mi bing khou in kalo thang damnu.”
9Inthumnu tambaan chonglang khat zui hung ga baraam basaangga rinne, “Tudannu khouring khatle baom badannu ding kalumga baom badan bachan bi mak tabe kut pi thang damnu maan khat am tabe, 10maan le ani Pa om balung pwannu om zu ga, Baom balung pwannu om kham bi khatchale lwat mak toga daanga ongnu ya in kalolune, khatle bathiangnu tambaan chonglang nun khatle Zao saza meithaan bi mei le kanduk kana riangre khaanglune. 11Bani om riangre khaangnu meikhut ka khwa seiga kaye; khouring khatle baom badannu ding kalumnu khatle baom nameng badan lounu nun ga zingpha thamlai nai makka ongme.”
12Hei bi bathiangnu mi nun om sung khaangnu ga amme; ani Pa om zathang bing ding zeiga Jisu khou balumsat ding chamnu nun gaye.
13Tambaan lana khwan khat eina ngaisu rwe, “Hiako: Atun paanna Pukraangba khou thinu kathi nun ga lozaangnuwe.” Katha Bathiangnuna rinne, “Awo, bani om chwanlaang paan bina nailune, balangbe bani chwan tonu bing ga bani ding zui ongme.”
Misa Sa Kapaisa dannu Khat
14Eina phaang rwe, khatle barangnu tambu khat, haba chung bi misa sa kapaisa dannu mi khat, Jisu, badung ong ngaake; Balu bi chakhan luman khatle Bakut bi kangainu sangkhwei khat am ngaake. 15Tambaan chonglang katei khat kalum in bina swakluga, tambu chung bi badung ongnu Maan khou baraam basaangga paoga rinne, “Na sangkhwei chwei thouga aatro; aatnu chakrin ga hung tang rwe, talei ram om tapaan ga min loi rwe.” 16Atiga tambu chung bi badung ongnu Maanna talei ram chung bi Baom sangkhwei chwei thou rwe, khatle talei ram ga aat thang rwe.
17Habei ga tambaan bi amnu kalum in bina tambaan chonglang katei khat swak rwe, khatle maan le kangainu sangkhwei khat am ngaake. 18Mei chung bi ngam amnu tambaan chonglang katei khat rikhaang riak bina swakluga, kangainu sangkhwei choinu Maan khou baraam basaangga paoga rinne, “Na kangainu sangkhwei chwei thouga talei ram om drakha zem om bakraa bing ga rai kadoiro, balangbe baom drakha kraa bing ga min loi rwe.” 19Tambaan chonglangna talei ram bi Baom sangkhwei chwei thouluga talei ram om drakha zem ga aatluga, haba ga ani Pa om balung pwannu om kaliannu drakha tui sumnu riak pi bazwan thang rwe. 20Drakha tui sumnu riak ga namlian langkaang la ketna kadim rwe, khatle drakha tui sumnu riak bina raqwan om thin mun basaangnu bacham bi mile 180 khak namlaanu thi ga lwang swak rwe.