مکاشفہ 14

14 ¹میں نے برّہ، یعنی یسوع کو کوہِ صیون پر کھڑے دیکھا، اور اُس کے ساتھ ایک لاکھ چوالیس ہزار تھے جن کے ماتھوں پر اُس کا نام اور اُس کے باپ کا نام لکھا ہوا تھا۔ ²میں نے آسمان سے ایک آواز سنی جو بہت سے پانیوں کے شور جیسی اور زوردار گرج جیسی تھی، اور جو آواز میں نے سنی وہ اُن بربط بجانے والوں کی مانند تھی جو اپنے بربط بجا رہے ہوں۔ ³اُنہوں نے تخت کے سامنے، اور چار جانداروں اور بزرگوں کے سامنے ایک نیا گیت گایا؛ اُس گیت کو صرف وہی ایک لاکھ چوالیس ہزار سیکھ سکے جو زمین سے چھڑائے گئے تھے۔ ⁴یہ وہ ہیں جو عورتوں کے ساتھ ناپاک نہیں ہوئے، کیونکہ وہ کنوارے ہیں۔ وہ برّہ یعنی یسوع کے پیچھے پیچھے چلتے ہیں جہاں کہیں وہ جاتا ہے؛ یہ انسانوں میں سے خریدے گئے، ہمارے باپ اور برّہ کے لیے پہلے پھل ہیں، ⁵اور اُن کے مُنہ میں کوئی جھوٹ نہ پایا گیا؛ وہ بےعیب ہیں۔

ابدی خوشخبری کا اعلان

⁶پھر میں نے ایک اور فرشتے کو آسمان کے بیچ اُڑتے دیکھا جس کے پاس ابدی خوشخبری تھی تاکہ وہ زمین کے باشندوں یعنی ہر قوم اور قبیلے اور زبان اور اُمّت کو سنائے۔ ⁷اُس نے بلند آواز سے پکارا، ”ہمارے باپ سے ڈرو اور اُس کی تمجید کرو، کیونکہ اُس کی عدالت کی گھڑی آ پہنچی ہے۔ اُس کی عبادت کرو جس نے آسمان اور زمین اور سمندر اور پانی کے چشمے بنائے۔“

⁸دوسرا فرشتہ اُس کے پیچھے آیا اور کہا، ”گر پڑا، گر پڑا وہ بڑا بابل، جس نے سب قوموں کو اپنی حرامکاری کی شہوت کی مے پلائی۔“

⁹تیسرا فرشتہ اُن کے پیچھے آیا اور بلند آواز سے کہنے لگا، ”جو کوئی اُس حیوان اور اُس کے بُت کی پرستش کرے اور اپنے ماتھے یا ہاتھ پر نشان لے، ¹⁰وہ بھی ہمارے باپ کے غضب کی مے پیئے گا، جو اُس کے قہر کے پیالے میں بےآمیز ڈالی گئی ہے، اور مقدّس فرشتوں اور برّہ کے سامنے آگ اور گندھک سے عذاب پائے گا۔ ¹¹اُن کے عذاب کا دھواں ابدالآباد اُٹھتا رہے گا؛ جو اُس حیوان اور اُس کے بُت کی پرستش کرتے ہیں اور اُس کے نام کا نشان لیتے ہیں، اُنہیں دن رات چین نہ ملے گا۔“

¹²مقدّسوں کے صبر کا موقع یہی ہے: وہ جو ہمارے باپ کے احکام پر عمل کرتے اور یسوع پر اپنے ایمان کو قائم رکھتے ہیں۔

¹³میں نے آسمان سے ایک آواز سنی: ”لکھ: مبارک ہیں وہ مُردے جو اب سے خُداوند میں مرتے ہیں۔“ رُوحُ القُدس فرماتا ہے، ”ہاں، وہ اپنی محنتوں سے آرام پائیں گے، کیونکہ اُن کے اعمال اُن کے ساتھ ساتھ چلتے ہیں۔“

اِبنِ آدم جیسا ایک

¹⁴پھر میں نے نظر کی: ایک سفید بادل، اور اُس پر اِبنِ آدم جیسا ایک بیٹھا ہوا تھا—یعنی یسوع—جس کے سر پر سونے کا تاج اور ہاتھ میں تیز درانتی تھی۔ ¹⁵ایک اور فرشتہ ہیکل سے نکلا اور بلند آواز سے اُس کو جو بادل پر بیٹھا تھا پکار کر کہا، ”اپنی درانتی چلا اور کاٹ، کیونکہ کاٹنے کی گھڑی آ پہنچی ہے، زمین کی فصل بالکل پک چکی ہے۔“ ¹⁶پس جو بادل پر بیٹھا تھا اُس نے اپنی درانتی زمین پر چلائی اور زمین کی فصل کاٹی گئی۔

¹⁷پھر ایک اور فرشتہ اُس ہیکل سے نکلا جو آسمان میں ہے، اور اُس کے پاس بھی تیز درانتی تھی۔ ¹⁸پھر ایک اور فرشتہ، جسے آگ پر اختیار تھا، قربان گاہ سے نکلا اور اُس کو جس کے پاس تیز درانتی تھی بلند آواز سے پکار کر کہا، ”اپنی تیز درانتی چلا اور زمین کی تاک کے گُچّھے جمع کر، کیونکہ اُس کے انگور پک چکے ہیں۔“ ¹⁹پس اُس فرشتے نے اپنی درانتی زمین پر چلائی اور زمین کی تاک کاٹی اور اُسے ہمارے باپ کے غضب کے بڑے حوض میں ڈال دیا۔ ²⁰وہ حوض شہر کے باہر روندا گیا، اور حوض سے اِتنا خون بہا کہ گھوڑوں کی لگام تک جا پہنچا اور تقریباً ایک سو اسّی میل تک پھیل گیا۔