വെളിപാട് 14 FHB Father's Heart Bible™

14 ¹കുഞ്ഞാടായ യേശു സീയോൻ മലയിൽ നില്ക്കുന്നതു ഞാൻ കണ്ടു; അവിടുത്തോടൊപ്പം, നെറ്റിയിൽ അവിടുത്തെ നാമവും അവിടുത്തെ പിതാവിന്റെ നാമവും എഴുതിയിരുന്ന 1,44,000 പേരും ഉണ്ടായിരുന്നു. ²പെരുവെള്ളത്തിന്റെ ഇരമ്പൽപോലെയും ഉറക്കെയുള്ള ഇടിമുഴക്കംപോലെയുമുള്ള ഒരു ശബ്ദം സ്വർഗത്തിൽനിന്നു ഞാൻ കേട്ടു; ഞാൻ കേട്ട ആ ശബ്ദം വീണവായിക്കുന്നവർ തങ്ങളുടെ വീണകൾ മീട്ടുന്നതുപോലെ ആയിരുന്നു. ³സിംഹാസനത്തിനും നാലു ജീവികൾക്കും മൂപ്പന്മാർക്കും മുമ്പാകെ അവർ ഒരു പുതിയ ഗീതം പാടി; ഭൂമിയിൽനിന്നു വീണ്ടെടുക്കപ്പെട്ട ആ 1,44,000 പേർക്കു മാത്രമേ അതു പഠിക്കുവാൻ കഴിഞ്ഞുള്ളൂ. ⁴സ്ത്രീകളുമായി തങ്ങളെ മലിനമാക്കാത്തവരാണ് ഇവർ; എന്തെന്നാൽ ഇവർ കന്യകമാരാകുന്നു. കുഞ്ഞാടായ യേശു എവിടെ പോയാലും അവിടുത്തെ അവർ അനുഗമിക്കുന്നു. മനുഷ്യരുടെ ഇടയിൽനിന്നു വിലയ്ക്കുവാങ്ങപ്പെട്ട ഇവർ നമ്മുടെ പിതാവിനും കുഞ്ഞാടിനും ആദ്യഫലമായിരിക്കുന്നു, ⁵അവരുടെ വായിൽ യാതൊരു വ്യാജവും കണ്ടെത്തിയില്ല; അവർ നിഷ്കളങ്കരാകുന്നു.

നിത്യസുവിശേഷം പുറപ്പെടുന്നു

⁶ഭൂമിയിൽ വസിക്കുന്നവരോട് - സകല ജാതിയോടും ഗോത്രത്തോടും ഭാഷയോടും ജനത്തോടും - പ്രഘോഷിക്കുവാൻ ഒരു നിത്യസുവിശേഷവുമായി മറ്റൊരു ദൂതൻ ആകാശമധ്യേ പറക്കുന്നതു ഞാൻ കണ്ടു. ⁷അവൻ ഉറക്കെ വിളിച്ചുപറഞ്ഞു: “നമ്മുടെ പിതാവിനെ ഭയപ്പെടുവിൻ, അവിടുത്തേക്കു മഹത്ത്വം കൊടുപ്പിൻ; എന്തെന്നാൽ അവിടുത്തെ ന്യായവിധിയുടെ നാഴിക വന്നിരിക്കുന്നു. ആകാശവും ഭൂമിയും സമുദ്രവും നീരുറവകളും സൃഷ്ടിച്ചവനെ ആരാധിക്കുവിൻ.”

⁸രണ്ടാമതൊരു ദൂതൻ പിന്നാലെ വന്നു: “വീണുപോയി, മഹാനഗരമായ ബാബിലോൺ വീണുപോയി; തന്റെ പരസംഗപാപത്തിന്റെ മോഹമദ്യം സകല ജാതികളെയും കുടിപ്പിച്ചവൾ തന്നെ.”

⁹മൂന്നാമതൊരു ദൂതൻ പിന്നാലെ വന്ന് ഉറക്കെ വിളിച്ചുപറഞ്ഞു: “മൃഗത്തെയും അതിന്റെ പ്രതിമയെയും ആരാധിക്കുകയും തന്റെ നെറ്റിയിലോ കൈയിലോ ഒരു മുദ്ര സ്വീകരിക്കുകയും ചെയ്യുന്ന ഏവനും ¹⁰അവനും നമ്മുടെ പിതാവിന്റെ ക്രോധത്തിന്റെ വീഞ്ഞ്, അവിടുത്തെ കോപത്തിന്റെ പാനപാത്രത്തിൽ കലർപ്പില്ലാതെ, കുടിക്കേണ്ടിവരും; വിശുദ്ധദൂതന്മാരുടെയും കുഞ്ഞാടിന്റെയും മുമ്പാകെ അവൻ തീയിലും ഗന്ധകത്തിലും ദണ്ഡിപ്പിക്കപ്പെടും. ¹¹അവരുടെ ദണ്ഡനത്തിന്റെ പുക എന്നെന്നേക്കും ഉയർന്നുകൊണ്ടിരിക്കുന്നു; മൃഗത്തെയും അതിന്റെ പ്രതിമയെയും ആരാധിക്കുന്നവർക്കും അതിന്റെ നാമത്തിന്റെ മുദ്ര സ്വീകരിക്കുന്നവർക്കും രാവും പകലും യാതൊരു വിശ്രമവുമില്ല.”

¹²നമ്മുടെ പിതാവിന്റെ കല്പനകൾ പാലിക്കുകയും യേശുവിലുള്ള തങ്ങളുടെ വിശ്വാസം മുറുകെപ്പിടിക്കുകയും ചെയ്യുന്ന വിശുദ്ധന്മാരുടെ സഹനം ഇവിടെ കാണാം.

¹³സ്വർഗത്തിൽനിന്ന് ഒരു ശബ്ദം ഞാൻ കേട്ടു: “എഴുതുക: ഇനിമേൽ കർത്താവിൽ മരിക്കുന്ന മരിച്ചവർ ഭാഗ്യവാന്മാർ.” “അതേ,” എന്നു പരിശുദ്ധാത്മാവ് അരുളിച്ചെയ്യുന്നു, “അവർ തങ്ങളുടെ പ്രയത്നങ്ങളിൽനിന്നു വിശ്രമിക്കുന്നു; എന്തെന്നാൽ അവരുടെ പ്രവൃത്തികൾ അവരെ അനുഗമിക്കുന്നു.”

മനുഷ്യപുത്രനു തുല്യനായവൻ

¹⁴ഞാൻ നോക്കി: ഒരു വെള്ളമേഘം; അതിന്മേൽ മനുഷ്യപുത്രനു തുല്യനായ ഒരുവൻ - യേശു - ഇരിക്കുന്നു; അവിടുത്തെ ശിരസ്സിൽ ഒരു സ്വർണകിരീടവും അവിടുത്തെ കൈയിൽ മൂർച്ചയുള്ള ഒരു അരിവാളും ഉണ്ടായിരുന്നു. ¹⁵മറ്റൊരു ദൂതൻ ആലയത്തിൽനിന്നു പുറത്തുവന്ന്, മേഘത്തിന്മേൽ ഇരിക്കുന്നവനോട് ഉറക്കെ വിളിച്ചുപറഞ്ഞു: “അങ്ങയുടെ അരിവാൾ വീശി കൊയ്യണമേ; കൊയ്യുവാനുള്ള നാഴിക വന്നിരിക്കുന്നു, ഭൂമിയിലെ വിള നന്നായി പഴുത്തിരിക്കുന്നു.” ¹⁶അപ്പോൾ മേഘത്തിന്മേൽ ഇരുന്ന അവിടുന്ന് ഭൂമിക്കുമീതെ തന്റെ അരിവാൾ വീശി, ഭൂമി കൊയ്തെടുക്കപ്പെട്ടു.

¹⁷പിന്നീട് മറ്റൊരു ദൂതൻ സ്വർഗത്തിലെ ആലയത്തിൽനിന്നു പുറത്തുവന്നു; അവനും മൂർച്ചയുള്ള ഒരു അരിവാൾ ഉണ്ടായിരുന്നു. ¹⁸തീയുടെമേൽ അധികാരമുള്ള മറ്റൊരു ദൂതൻ യാഗപീഠത്തിൽനിന്നു വന്ന്, മൂർച്ചയുള്ള അരിവാൾ പിടിച്ചിരുന്നവനോട് ഉറക്കെ വിളിച്ചുപറഞ്ഞു: “നിന്റെ മൂർച്ചയുള്ള അരിവാൾ അയച്ച് ഭൂമിയിലെ മുന്തിരിവള്ളിയുടെ കുലകൾ ശേഖരിക്കുക; എന്തെന്നാൽ അതിന്റെ മുന്തിരിപ്പഴങ്ങൾ പഴുത്തിരിക്കുന്നു.” ¹⁹ആ ദൂതൻ തന്റെ അരിവാൾ ഭൂമിയിലേക്കു വീശി, ഭൂമിയിലെ മുന്തിരിവള്ളി കൊയ്തെടുത്ത്, അതു നമ്മുടെ പിതാവിന്റെ ക്രോധത്തിന്റെ വലിയ മുന്തിരിച്ചക്കിലേക്ക് എറിഞ്ഞു. ²⁰ആ മുന്തിരിച്ചക്ക് നഗരത്തിനു പുറത്തുവെച്ചു ചവിട്ടിമെതിക്കപ്പെട്ടു; മുന്തിരിച്ചക്കിൽനിന്നു രക്തം ഒരു കുതിരയുടെ കടിഞ്ഞാണിന്റെ ഉയരത്തോളം, ഏകദേശം 180 മൈൽ ദൂരത്തോളം, ഒഴുകി.