ራእይ 14

14 ¹በጉ ኢየሱስ በጽዮን ተራራ ላይ ቆሞ አየሁ፤ ስሙና የአባቱ ስም በግንባራቸው ላይ የተጻፈባቸው 144,000 ከእርሱ ጋር ነበሩ። ²እንደ ብዙ ውሃዎች ድምፅና እንደ ታላቅ ነጎድጓድ የሚሆን ድምፅ ከሰማይ ሰማሁ፤ የሰማሁትም ድምፅ በገና ደርዳሪዎች በገናቸውን እንደሚደረድሩ ነበር። ³በዙፋኑ፣ በአራቱ ሕያዋን ፍጥረታትና በሽማግሌዎቹ ፊት አዲስ ዝማሬ ዘመሩ፤ ከምድር ከተቤዡት ከ144,000 በቀር ያን ዝማሬ ሊማር የሚችል አልነበረም። ⁴እነዚህ ከሴቶች ጋር ያልረከሱ ናቸው፤ ድንግሎች ናቸውና። በጉን ኢየሱስን ወደሚሄድበት ሁሉ ይከተሉታል፤ ለአባታችንና ለበጉ በኵራት ይሆኑ ዘንድ ከሰዎች መካከል ተገዝተዋል፤ ⁵በአፋቸውም ሐሰት አልተገኘም፤ ነውር የሌለባቸው ናቸው።

የዘላለሙ ወንጌል ይታወጃል

⁶ሌላም መልአክ በሰማይ መካከል ሲበር አየሁ፤ በምድር ለሚኖሩ—ለሕዝብ ሁሉ፣ ለነገድ፣ ለቋንቋና ለወገን ሊሰብክ የዘላለም ወንጌል ነበረው። ⁷በታላቅ ድምፅ እንዲህ አለ፤ “አባታችንን ፍሩ፣ ክብርንም ስጡት፤ የፍርዱ ሰዓት ደርሷልና። ሰማይንና ምድርን፣ ባሕርንም የውሃ ምንጮችንም የፈጠረውን ስገዱለት።”

⁸ሁለተኛውም መልአክ ተከትሎ እንዲህ አለ፤ “ታላቂቱ ባቢሎን ወደቀች፣ ወደቀች፤ አሕዛብን ሁሉ የዝሙቷን የፍትወት ወይን ያጠጣች።”

⁹ሦስተኛውም መልአክ ተከትሎ በታላቅ ድምፅ እንዲህ አለ፤ “ለአውሬውና ለምስሉ የሚሰግድ፣ በግንባሩ ወይም በእጁ ምልክት የሚቀበል ሁሉ፣ ¹⁰እርሱ ደግሞ ባልተቀላቀለ ሁኔታ በቍጣው ጽዋ የተዘጋጀውን የአባታችንን የቍጣ ወይን ይጠጣል፤ በቅዱሳን መላእክትና በበጉ ፊት በእሳትና በዲን ይሠቃያል። ¹¹የሥቃያቸውም ጢስ ለዘላለም እስከ ዘላለም ይወጣል፤ ለአውሬውና ለምስሉ የሚሰግዱ፣ የስሙንም ምልክት የሚቀበሉ ቀንም ሌሊትም ዕረፍት የላቸውም።”

¹²የቅዱሳን ጽናት ይህ ነው፤ እነርሱም የአባታችንን ትእዛዛት የሚጠብቁ፣ በኢየሱስም ያላቸውን እምነት የሚይዙ ናቸው።

¹³ከሰማይም ድምፅ ሰማሁ፤ “ጻፍ፤ ከእንግዲህ ወዲህ በጌታ የሚሞቱ ሙታን ብፁዓን ናቸው።” መንፈስ ቅዱስ፣ “አዎን፤ ከድካማቸው ያርፋሉ፤ ሥራቸው ይከተላቸዋልና” ይላል።

የሰው ልጅ የሚመስል አንድ

¹⁴አየሁም፤ ነጭ ደመና፣ በደመናው ላይም የሰው ልጅ የሚመስል—ኢየሱስ—ተቀምጦ ነበር፤ በራሱ ላይ የወርቅ አክሊል፣ በእጁም ስለታም ማጭድ ነበረው። ¹⁵ሌላም መልአክ ከቤተ መቅደሱ ወጣ፤ በደመናው ላይ የተቀመጠውን በታላቅ ድምፅ እንዲህ ብሎ ጠራው፤ “ማጭድህን ልከህ አጭድ፤ የማጨድ ሰዓት ደርሷል፤ የምድር መከር ፈጽሞ በስሏልና።” ¹⁶በደመናው ላይ የተቀመጠውም ማጭዱን በምድር ላይ ጣለ፤ ምድርም ታጨደች።

¹⁷ከዚያም ሌላ መልአክ በሰማይ ካለው ቤተ መቅደስ ወጣ፤ እርሱም ደግሞ ስለታም ማጭድ ነበረው። ¹⁸በእሳቱ ላይ ሥልጣን ያለው ሌላ መልአክ ከመሠዊያው መጣ፤ ስለታሙን ማጭድ የያዘውን በታላቅ ድምፅ እንዲህ ብሎ ጠራው፤ “ስለታም ማጭድህን ልከህ የምድርን የወይን ዘለላዎች ሰብስብ፤ ወይኖቹ በስለዋልና።” ¹⁹መልአኩም ማጭዱን ወደ ምድር ጣለ፤ የምድርንም ወይን አጭዶ ወደ አባታችን ታላቅ የቍጣ የወይን መጭመቂያ ጣለው። ²⁰የወይን መጭመቂያውም ከከተማ ውጭ ተረገጠ፤ ከመጭመቂያውም ደም ወጣ፤ ለ180 ያህል ማይል ርቀት እስከ ፈረስ ልጓም ከፍታ ደረሰ።