ራእይ 15

15 ¹በሰማይም ታላቅና ድንቅ የሆነ ሌላ ምልክት አየሁ፤ ሰባቱን የመጨረሻ መቅሰፍቶች የያዙ ሰባት መላእክት ነበሩ፤ የአባታችን ቍጣ በእነርሱ ተፈጽሞአልና።

²በእሳት የተቀላቀለ የብርጭቆ ባሕር የሚመስል ነገርም አየሁ፤ አውሬውን፣ ምስሉንና የስሙን ቍጥር ድል የነሡት ከአባታችን የተሰጡ በገናዎች ይዘው በአጠገቡ ቆመው ነበር። ³የአባታችን አገልጋይ የሙሴን መዝሙርና የበጉን የኢየሱስን መዝሙር እንዲህ ብለው ዘመሩ፦ “ሁሉን ቻይ ጌታ አባት ሆይ፤ ሥራዎችህ ታላቅና ድንቅ ናቸው! የአሕዛብ ንጉሥ ሆይ፤ መንገዶችህ ጽድቅና እውነት ናቸው! ⁴አባት ሆይ፤ የማይፈራህና ስምህን የማያከብር ማን ነው? አንተ ብቻ ቅዱስ ነህና። አሕዛብ ሁሉ መጥተው በፊትህ ይሰግዳሉ፤ የጽድቅ ሥራዎችህ ተገልጠዋልና።”

⁵ከዚህ በኋላ ተመለከትሁ፤ በሰማይም ያለው ቤተ መቅደስ፣ የምስክር ድንኳኑ ተከፈተ። ⁶ሰባቱን መቅሰፍቶች የያዙ ሰባቱ መላእክት ንጹሕና የሚያበራ ተልባ እግር ለብሰው፣ በደረታቸውም የወርቅ መቀነት ታጥቀው ከቤተ መቅደሱ ወጡ።

⁷ከዚያም ከአራቱ ሕያዋን ፍጥረታት አንዱ ለዘላለም ዘመን በሕይወት ለሚኖረው ለአባታችን ቍጣ የተሞሉ ሰባት የወርቅ ጽዋዎች ለሰባቱ መላእክት ሰጣቸው። ⁸ከአባታችን ክብርና ከኀይሉ የተነሣ ጢስ ቤተ መቅደሱን ሞላው፤ የሰባቱ መላእክት ሰባት መቅሰፍቶች እስኪፈጸሙ ድረስ ወደ ቤተ መቅደሱ ሊገባ የሚችል ማንም አልነበረም።