Mĩthiro Mũgwanja ya Mũthia
Arĩa maaregire nyamũ marũgamĩte hakuhĩ na iria rĩa gĩcicio makĩina rwĩmbo rwa Musa na rwa Gatũrũme, makiuga njĩra cia Ithe witũ nĩ cia kĩhooto na ma. Araika mũgwanja makoima mehumbĩte nguo cia gatani ikũhenia na mbakũri mũgwanja, nayo ndogo ĩkaiyũra hekarũ gũtikagĩe mũndũ wa gũtoonya nginya ciitwo.
15 1Nĩndoonire kĩmenyithia kĩngĩ kũu igũrũ, kĩnene na kĩa kũgegania: araika mũgwanja marĩa maanyiitĩte mĩthiro mũgwanja ya mũthia, nĩgũkorwo thĩinĩ wayo marakara ma Ithe witũ nĩmaarĩĩkĩte.
2Ningĩ nĩndoonire kĩndũ kĩahaanaga ta iria rĩa gĩcicio rĩtukanĩte na mwaki, na harĩa haarũgamĩte arĩa maatooretie nyamũ ĩĩrĩa, na mũhiano wayo, na namba ya rĩĩtwa rĩayo, manyiitĩte inanda cia mũgeeto cia kuuma kũrĩ Ithe witũ. 3Nao makĩina rwĩmbo rwa Musa, ndungata ya Ithe witũ, na rwĩmbo rwa Jesũ, Gatũrũme: “Mawĩra maku nĩ manene na ma kũgegania, Wee Ithe Mwathani Mwene-Hinya-Wothe! Njĩra ciaku nĩ cia kĩhooto na cia ma, Wee Mũthamaki wa ndũũrĩrĩ! 4Nũũ ũtangĩgwĩtigĩra, Wee Ithe, na agoocithie rĩĩtwa rĩaku? Nĩgũkorwo nĩ wee wiki ũrĩ mũtheru. Ndũũrĩrĩ ciothe nĩigoka ciinamĩrĩre mbere yaku, nĩgũkorwo ciĩko ciaku cia ũthingu nĩcioonanio.”
5Thuutha wa ũguo ngĩrora, nayo hekarũ, ĩrĩa nĩ hema ya ũira, ĩkĩhingũrwo kũu igũrũ. 6Nao araika acio mũgwanja marĩa maarĩ na mĩthiro mũgwanja makiuma thĩinĩ wa hekarũ, mehumbĩte nguo cia gatani theru na ikũhenia, na mĩcibi ya thahabu mĩĩohe ithũriinĩ ciao.
7Nakĩo kĩmwe kĩa ciũmbe iria inya irĩ muoyo gĩkĩnengera araika acio mũgwanja mbakũri mũgwanja cia thahabu ciyũrĩte marakara ma Ithe witũ, ũrĩa ũtũũraga muoyo tene na tene. 8Nayo hekarũ ĩkĩiyũra ndogo yoimanĩte na riiri wa Ithe witũ na hinya wake; gũtirĩ mũndũ ũngĩahotire gũtoonya thĩinĩ wayo nginya rĩrĩa mĩthiro mũgwanja ya araika acio mũgwanja yathirire.