Sat-ta Hekh Mohamari
Janwar ke na kora manuh khan kach laga samundar usor te khara hoi Moses laga geet aru Mer-bacha laga geet gai, amikhan laga Pitri laga rasta khan nyay aru hosa ase koi. Satjon sorgodoot ujala linen kapra pindhi satta bati loi bahar ahe, aru dhuwa pora mondir bhorti hoi jai etu karne taikhan dhali nadiya tak kun bhi bhitor te jabo napare.
15 1Moi sorgot te dusra ekta dangor aru asurit chihna dekhise: sat-jon sorgodoot khan sat-ta hekh mohamari dhori ase, kilemane eitu khan te amar Pitri laga khong tu khotom hoise.
2Moi jui logot milai diya kach laga samundar nisena ekta dekhise, aru tar usor te janwar tu, tar murti, aru tar nam laga number ke jiti luwa manuh khan amar Pitri pora diya beena khan dhori kene khara ase. 3Aru tarkhan amar Pitri laga noukar Moses laga git, aru Mer-Bacha Jisu laga git gaise: “Apuni laga kaam khan dangor aru asurit ase, O Prabhu Sorbashoktiman Pitri! Apuni laga rasta khan dhormik aru hosa ase, desh khan laga Raja!” 4“O Pitri, kun pora Apuni ke bhoi nakoribo, aru Apuni laga nam ke mohima nadibo? Kilemane khali Apuni he pobitro ase. Sob desh khan ahhi kene Apuni laga age te aradhana koribo, kilemane Apuni laga dhormik kaam khan prokahh hoise.”
5Eitu pichete moi saise, aru sorgot te mondir, gawahi laga tombu tu, khuli jaise. 6Sat-ta mohamari thaka sat-jon sorgodoot khan mondir pora bahar ulai ahhise, sapha aru ujwal kapra pindhi kene, tarkhan laga chati te suna laga peti bandhi kene.
7Tetiya char-ta jinda jiu khan majot ekjon pora, hodai-hodai jinda thaka amar Pitri laga khong pora bhorta sat-ta suna laga bati sat-jon sorgodoot khan ke dise. 8Amar Pitri laga mohima pora aru Tar shokti pora dhuwa mondir te bhorti hoise; sat-jon sorgodoot khan laga sat-ta mohamari khotom nohua tak kun bhi bhitor te ghusibo para nai.