प्रकटीकरण 15

15 ¹ मी स्वर्गात आणखी एक चिन्ह पाहिले, महान व अद्भुत: शेवटल्या सात पीडा घेतलेले सात देवदूत, कारण त्यांच्यामध्ये आमच्या पित्याचा क्रोध पूर्ण झाला.

² मी अग्नीमिश्रित काचेच्या समुद्रासारखे काहीतरी पाहिले, आणि त्याच्या शेजारी उभे असलेले ते, ज्यांनी त्या श्वापदावर, त्याच्या मूर्तीवर व त्याच्या नावाच्या संख्येवर विजय मिळवला होता, आमच्या पित्याकडून मिळालेल्या वीणा घेतलेले. ³ आणि त्यांनी आमच्या पित्याचा सेवक मोशे याचे गीत, आणि कोकरा येशू याचे गीत गायले: “तुझी कृत्ये महान व अद्भुत आहेत, हे प्रभू पिता, सर्वसमर्थ! तुझे मार्ग न्याय्य व सत्य आहेत, हे राष्ट्रांच्या राजा! ⁴ हे पित्या, तुझे भय कोण धरणार नाही आणि तुझ्या नावाचे गौरव कोण करणार नाही? कारण केवळ तूच पवित्र आहेस. सर्व राष्ट्रे येऊन तुझ्यापुढे उपासना करतील, कारण तुझी नीतिमान कृत्ये प्रकट झाली आहेत.”

⁵ यानंतर मी पाहिले, आणि स्वर्गात मंदिर, म्हणजे साक्षीचा तंबू, उघडले गेले. ⁶ ज्या सात देवदूतांजवळ सात पीडा होत्या ते मंदिरातून बाहेर आले, स्वच्छ व तेजस्वी तागाची वस्त्रे परिधान केलेले, आणि त्यांच्या छातीभोवती सोन्याचे पट्टे बांधलेले.

⁷ मग त्या चार जिवंत प्राण्यांपैकी एकाने त्या सात देवदूतांना, युगानुयुग जिवंत असलेल्या आमच्या पित्याच्या क्रोधाने भरलेल्या सोन्याच्या सात वाट्या दिल्या. ⁸ आमच्या पित्याच्या गौरवामुळे व त्याच्या सामर्थ्यामुळे निघालेल्या धुराने मंदिर भरून गेले; आणि त्या सात देवदूतांच्या सात पीडा संपेपर्यंत कोणालाही त्यात प्रवेश करता आला नाही.