Naomeikap Unshimui Shini
Sāyur marāngaibing mengshen shamadruwui ngalemli nganingda Moseswui laa kala Yaonaowui laa sāda, ithumwui Avāwui shongfabing khamashung kala akachanga da hānga. Kazingrao shini khamenga kahora kachon ngavaida tengkot shini singda shoka, kala meikhutna khorumshim pemda athumna heishok ungshung tangda khipāla mazangrarthuwa.
15 1Ina kazingramli hakkhamahā kala matakhak kahai machut khangatei akha thei: naomeikap unshimui shini kasing kazingrao shini lei, kaja chibingli ithumwui Avāwui malungkhavāt ungshunghaira.
2Ina mengshen shamadru mei eina manāt kahai thada akha thei; kala sāyur chi, awui ama̱, kala awui mingwui mashing khayui samkaphangbing china, ithumwui Avāwui tingteilā singriplaga chiwui ngalemli nganingsai. 3Kala athumna ithumwui Avāwui rao Moseswui laa kala Yaonao Jishuwui laa sai: "Nawui otsakbing hakkhamahā kala matakhak kahaina, O Sāshap-pangshapa Proho Avā! O Miyurbingwui Awunga, nawui shongfabing khamashung kala akachanga! 4O Avā, khipāna nali makhangachee kala naming matekmatei ngasakra? Kaja na maningla katharana. Miyur saikora rāda nawui mangāli rākhorumra, kaja nawui khamashung otsakbing phongmihaira."
5Hiwui thili ina yangkakā tharan, kazingramli ningkhami kachonshim, khorumshim chi shohaowa. 6Unshimui shini kasing kazingrao shini khamenga kahora kathara kachon ngavailaga, athumwui malungli sinā shānneira̱ neilaga, khorumshim chiwui eina shoka.
7Chiwui thili kharinga sāyur matiwui ngachaili akhana, mashimānda ringching kaje ithumwui Avāwui malungkhavāt eina pemting kazang sinā tengkot shini kazingrao shini chili mi. 8Ithumwui Avāwui tekhamatei kala awui pangshapwui eina shoka meikhut china khorumshim chi pemhaowa; kazingrao shiniwui unshimui shini ungshungranglakha eina tangda khipākhala chili mazangrarthuwa.
