Minyanga Tsambwadi mya Tsuka
Bana banungina mbisi batelama bela-bela yi yanga dya kyengo, basangwala nkunga wa Moyize yi nkunga wa Mwana wa mukoku, batela ni nzila za Tata wetu zenina za masonga yi za kyedika. Banzyo tsambwadi balubuka bavwata miledi mya bukheti ni mabungu tsambwadi, amana mwisi wazadisa nzu ya Nzambi hanga ka mutu ku kalenda kota nate mabungu mabati sopulwa.
15 1Mboni kidimbu kikwawu kuna zilu, kya mbuta yi kya kuyituka: banzyo tsambwadi bana basimba minyanga tsambwadi mya tsuka, mukuma muna myawu khabu za Tata wetu zámana.
2Mboni kima kifwanani yi yanga dya kyengo dyabundikisa yi mbawu, amana bana bánungina mbisi, yi kifwani kyandi, yi thalu ya khumbu yandi, bakala telama bela-bela yi dyawu, basimba zinsambi za Tata wetu. 3Amana básangwala nkunga wa Moyize, musadi wa Tata wetu, yi nkunga wa Yesu, Mwana wa mukoku: «Mihangu myaku myenina mya mbuta yi mya kuyituka, A Tata, Pfumu wa Ngolu Zoosu! Nzila zaku zenina za masonga yi za kyedika, Kyamvu wa makanda! 4Nani wukondi kuyuka bweya bwaku, A Tata, yi kukumisa khumbu yaku? Mukuma ngeyi lwesi wenina wa bukheti. Makanda moosu makwísa yi kufukamina ku thwala yaku, mukuma mihangu myaku mya masonga myásengumuka.»
5Kunima dya mama, yátala, amana nzu ya Nzambi, sombolu ya kimbangi, yákangulwa kuna zilu. 6Banzyo tsambwadi bana bakala yi minyanga tsambwadi, bálubuka mu nzu ya Nzambi, bávwata miledi mya bukheti yi mya kedyamina, yi mikaba mya wolu mina myazingila thulu zawu.
7Amana mosi wa bihangwa biya bya moya wáhana banzyo tsambwadi mabungu tsambwadi ma wolu mana mazala khabu za Tata wetu, wuna wisi zinga mvula muna mvula. 8Mwisi wuna wátuka mu khembu ya Tata wetu yi mu ngolu zandi wázala nzu ya Nzambi; ka mutu ku walenda kukota muna yawu tii yi kuna minyanga tsambwadi mya banzyo tsambwadi myámanisa.
