နောက်ဆုံးဘေးဒဏ်ခုနစ်ပါး
သားရဲကို ငြင်းပယ်ခဲ့သူတို့သည် ဖန်ပင်လယ်နံဘေး၌ ရပ်၍ မောရှေ၏သီချင်းနှင့် သိုးသငယ်တော်၏သီချင်းကို သီဆိုကြပြီး ငါတို့၏ခမည်းတော်၏ လမ်းတော်တို့သည် တရားမျှတ၍ မှန်ကန်တော်မူ၏ဟု ဆိုကြ၏။ ကောင်းကင်တမန်ခုနစ်ပါးတို့သည် တောက်ပသော ပိတ်ချောကို ဝတ်ဆင်၍ ဖလားခုနစ်လုံးနှင့် ထွက်လာကြပြီး ၎င်းတို့ကို မသွန်းမချမီ မည်သူမျှ မဝင်နိုင်အောင် ဗိမာန်တော်ကို မီးခိုးဖုံးလွှမ်း၏။
15 1ကောင်းကင်၌ ကြီးမြတ်၍အံ့ဖွယ်သော အခြားနိမိတ်လက္ခဏာတစ်ပါးကို ငါမြင်၏။ ထိုနိမိတ်ကား နောက်ဆုံးဘေးဒဏ်ခုနစ်ပါးကို ကိုင်ဆောင်ထားသော ကောင်းကင်တမန်ခုနစ်ပါးတည်း။ ထိုဘေးဒဏ်တို့၌ ငါတို့၏ခမည်းတော်၏အမျက်တော်သည် ပြီးဆုံးသတည်း။
2မီးရောယှက်သော ဖန်ပင်လယ်ကဲ့သို့သောအရာကို ငါမြင်၏။ သားရဲကိုလည်းကောင်း၊ သူ၏ရုပ်တုကိုလည်းကောင်း၊ သူ၏နာမည်အရေအတွက်ကိုလည်းကောင်း အောင်မြင်ခဲ့ကြသောသူတို့သည် ငါတို့၏ခမည်းတော်ထံတော်မှ စောင်းများကို ကိုင်ဆောင်လျက် ထိုပင်လယ်အနားတွင် ရပ်နေကြ၏။ 3ငါတို့၏ခမည်းတော်၏အစေခံ မောရှေ၏သီချင်းနှင့် သိုးသူငယ်တော်ဖြစ်သော ယေရှု၏သီချင်းကို သူတို့သီဆိုကြသည်ကား၊ “အနန္တတန်ခိုးရှင် အရှင်အဖခမည်းတော်၊ ကိုယ်တော်၏အမှုတော်တို့သည် ကြီးမြတ်၍ အံ့ဖွယ်ဖြစ်ပါ၏။ လူမျိုးတကာတို့၏ဘုရင်၊ ကိုယ်တော်၏လမ်းစဉ်တို့သည် ဖြောင့်မတ်၍ မှန်ကန်ပါ၏။ 4အို အဖခမည်းတော်၊ ကိုယ်တော်ကို မကြောက်ရွံ့ဘဲ နာမတော်ကို မချီးမြှောက်ဘဲ နေမည့်သူ တစ်စုံတစ်ဦးမျှရှိပါမည်လော။ အကြောင်းမူကား ကိုယ်တော်တစ်ပါးတည်းသာလျှင် သန့်ရှင်းတော်မူ၏။ ကိုယ်တော်၏ဖြောင့်မတ်သောအမှုတော်တို့သည် ထင်ရှားပြီဖြစ်သောကြောင့် လူမျိုးအပေါင်းတို့သည် လာ၍ ရှေ့တော်၌ ကိုးကွယ်ဝတ်ပြုကြပါလိမ့်မည်။”
5ထို့နောက် ငါကြည့်လိုက်သောအခါ၊ ကောင်းကင်၌ သက်သေခံချက်တဲတော်ဖြစ်သော ဗိမာန်တော်သည် ပွင့်လျက်ရှိ၏။ 6ဘေးဒဏ်ခုနစ်ပါးကို ဆောင်သော ကောင်းကင်တမန်ခုနစ်ပါးသည် သန့်ရှင်း၍ တောက်ပသော ပိတ်ချောထည်ကို ဝတ်ဆင်လျက်၊ ရင်ဘတ်တွင် ရွှေခါးစည်းကို စည်းလျက် ဗိမာန်တော်မှ ထွက်လာကြ၏။
7ထိုအခါ သက်ရှိသတ္တဝါလေးပါးတွင် တစ်ပါးသည် ကမ္ဘာအဆက်ဆက် အသက်ရှင်တော်မူသော ငါတို့၏ခမည်းတော်၏အမျက်တော်နှင့် ပြည့်လျက်ရှိသော ရွှေဖလားခုနစ်လုံးကို ကောင်းကင်တမန်ခုနစ်ပါးအား ပေးအပ်၏။ 8ငါတို့၏ခမည်းတော်၏ဘုန်းတော်နှင့် တန်ခိုးတော်မှ ထွက်သောမီးခိုးသည် ဗိမာန်တော်ကို ပြည့်စေ၏။ ကောင်းကင်တမန်ခုနစ်ပါး၏ ဘေးဒဏ်ခုနစ်ပါး မပြီးဆုံးမီ မည်သူမျှ ဗိမာန်တော်ထဲသို့ မဝင်နိုင်ကြ။