Pitung Wewelak Pungkasan
Wong-wong kang nampik kewan galak padha ngadeg ing sacedhake segara kaca ngidungake kidunge Musa lan kidunge Cempe, nyebut lakune Rama kita adil lan nyata. Malaekat pitu metu nganggo kain linen kang padhang nggawa bokor pitu, lan kumelun ngebaki padaleman suci nganti ora ana kang bisa mlebu nganti bokor-bokor iku diesokake.
15 1Aku banjur ndeleng pratandha liyane ing swarga, kang gedhe lan ngeram-eramake: malaekat pitu kang padha nyekel wewelak pungkasan pitu, amarga sajroning wewelak iku bebenduning Rama kita wis rampung.
2Aku ndeleng kaya-kaya ana sagara kaca kang kacampur geni, lan ing sapinggire ngadeg wong-wong kang wis padha ngalahake si kewan, recane, sarta angkaning jenenge, kalawan nyekel clempung paringe Rama kita. 3Banjur padha ngidungake kidunge Nabi Musa, abdine Rama kita, lan kidunge Gusti Yesus, Sang Cempe: “Agung lan ngeram-eramake sakehing pakaryan Paduka, Dhuh Rama ingkang Mahakwasa, Pangwasaning jagad! Adil lan sanyata sadaya margi Paduka, Dhuh Rajaning para bangsa! 4Sinten ingkang boten ajrih dhateng Paduka, Dhuh Rama, saha ngluhuraken asma Paduka? Awit namung Paduka piyambak ingkang suci. Sakehing bangsa badhe sami sowan saha sujud ing ngarsa Paduka, awit sampun kababar panindak Paduka ingkang adil.”
5Sawuse iku aku banjur ndeleng, lah Padaleman Suci, yaiku Tarub Paseksi, ing swarga kabukak. 6Malaekat pitu kang nggawa wewelak pitu mau banjur padha metu saka ing Padaleman Suci, ngagem sandhangan lena kang resik lan gumebyar, kalawan sabuk mas ing dhadhane.
7Banjur salah sawijining makhluk urip papat mau maringake marang malaekat pitu mau bokor mas pitu kang kebak isi bebenduning Rama kita, kang gesang langgeng salawas-lawase. 8Padaleman Suci kebak kukus saka ing kamulyane Rama kita lan saka ing pangwasane; satemah ora ana wong siji-sijia kang bisa mlebu, nganti wewelak pitune malaekat pitu mau wis rampung.