Annoba Bakwai na Ƙarshe
Waɗanda suka ƙi dabbar suna tsaye kusa da tekun gilashi suna rera waƙar Musa da ta Ɗan Rago, suna cewa hanyoyin Ubanmu masu adalci ne da gaskiya. Mala'iku bakwai suka fito saye da lilin mai haske riƙe da kwanoni bakwai, hayaƙi kuma ya cika haikalin har ba mai iya shiga sai an zubar da su.
15 1Na ga wata alama a Sama, mai girma da ban mamaki: mala'iku bakwai riƙe da annoba bakwai na ƙarshe, gama a cikinsu fushin Ubanmu ya ƙare.
2Na ga wani abu kamar teku na gilashi gauraye da wuta, waɗanda kuma suka ci nasara a kan dabbar, da siffarta, da lambar sunanta suna tsaye kusa da shi, riƙe da garayu daga Ubanmu. 3Suka kuma rera waƙar Musa, bawan Ubanmu, da waƙar Yesu, Ɗan Rago: “Ayyukanka manya ne masu ban mamaki, ya Uba Maɗaukaki Mai Iko Dukka! Hanyoyinka masu adalci ne da gaskiya, ya Sarkin al'ummai! 4Wane ne ba zai ji tsoronka ba, ya Uba, ya kuma ɗaukaka sunanka? Gama kai kaɗai ne Mai Tsarki. Dukan al'ummai za su zo su yi sujada a gabanka, gama an bayyana ayyukanka na adalci.”
5Bayan wannan na duba, sai aka buɗe haikali, wato tentin shaida, a Sama. 6Mala'iku bakwai masu annoba bakwai suka fito daga haikali, sanye da tufafin lilin mai tsabta mai haske, ɗaure da ɗamarar zinariya a ƙirjinsu.
7Sai ɗaya daga cikin halittu huɗu masu rai ya ba wa mala'iku bakwai kwanoni bakwai na zinariya cike da fushin Ubanmu, wanda yake da rai har abada abadin. 8Hayaƙi daga ɗaukakar Ubanmu da kuma daga ikonsa ya cika haikali; babu wanda ya iya shiga ciki sai da annoba bakwai na mala'iku bakwai suka ƙare.