வெளிப்படுத்துதல் 15

15 ¹பரலோகத்தில் பெரிதும் ஆச்சரியமுமான வேறொரு அடையாளத்தைக் கண்டேன்: ஏழு கடைசி வாதைகளைப் பிடித்திருந்த ஏழு தூதர்கள்; ஏனெனில் அவைகளால் எங்கள் பிதாவின் கோபம் முடிவுற்றது.

²நெருப்புக் கலந்த கண்ணாடிக் கடல்போன்ற ஒன்றைக் கண்டேன்; அந்த மிருகத்தையும், அதின் உருவத்தையும், அதின் நாமத்தின் இலக்கத்தையும் ஜெயித்தவர்கள் எங்கள் பிதாவினிடத்திலிருந்து பெற்ற சுரமண்டலங்களைப் பிடித்துக்கொண்டு அதின் அருகே நின்றார்கள். ³அவர்கள் எங்கள் பிதாவின் ஊழியக்காரனாகிய மோசேயின் பாட்டையும், ஆட்டுக்குட்டியாகிய இயேசுவின் பாட்டையும் பாடி: “சர்வவல்லமையுள்ள சர்வாதிபதியாகிய பிதாவே! உம்முடைய கிரியைகள் மகத்துவமும் ஆச்சரியமுமானவைகள்! ஜாதிகளின் ராஜாவே, உம்முடைய வழிகள் நீதியும் சத்தியமுமானவைகள்! ⁴பிதாவே, யார் உமக்குப் பயந்து, உம்முடைய நாமத்தை மகிமைப்படுத்தாதிருப்பார்? தேவரீர் ஒருவரே பரிசுத்தர். எல்லா ஜாதிகளும் வந்து உமக்கு முன்பாகத் தொழுதுகொள்வார்கள்; ஏனெனில் உம்முடைய நீதியான செயல்கள் வெளிப்படுத்தப்பட்டன.”

⁵இதற்குப் பின்பு நான் பார்த்தேன், பரலோகத்தில் சாட்சியின் கூடாரமாகிய ஆலயம் திறக்கப்பட்டது. ⁶ஏழு வாதைகளையுடைய அந்த ஏழு தூதர்களும் சுத்தமும் பிரகாசமுமான மெல்லிய வஸ்திரம் தரித்து, மார்பில் பொற்கச்சைகளைக் கட்டிக்கொண்டு, ஆலயத்திலிருந்து புறப்பட்டு வந்தார்கள்.

⁷அப்பொழுது அந்த நான்கு ஜீவன்களில் ஒன்று, சதாகாலங்களிலும் உயிரோடிருக்கிற எங்கள் பிதாவின் கோபத்தால் நிறைந்த ஏழு பொற்கலசங்களை அந்த ஏழு தூதர்களுக்குக் கொடுத்தது. ⁸எங்கள் பிதாவின் மகிமையினாலும் அவருடைய வல்லமையினாலும் உண்டான புகை ஆலயத்தை நிரப்பிற்று; ஏழு தூதர்களின் ஏழு வாதைகள் முடியும்வரைக்கும் ஒருவனும் ஆலயத்திற்குள் பிரவேசிக்கக்கூடாதிருந்தது.