Apocalipsis 15

15 ¹Nakita ko ang isa pang tanda sa langit, dakila at kahanga-hanga: pitong anghel na may hawak ng pitong huling salot, sapagkat sa mga ito natapos ang poot ng ating Ama.

²Nakita ko ang tila isang dagat na salamin na may halong apoy, at nakatayo sa tabi nito ang mga nagtagumpay laban sa halimaw, sa larawan nito, at sa bilang ng pangalan nito, na may hawak na mga alpa mula sa ating Ama. ³At inawit nila ang awit ni Moises, ang lingkod ng ating Ama, at ang awit ni Jesus, ang Kordero: “Dakila at kahanga-hanga ang iyong mga gawa, O Soberanong Ama na Makapangyarihan sa lahat! Matuwid at totoo ang iyong mga daan, Hari ng mga bansa! ⁴Sino ang hindi matatakot sa iyo, O Ama, at luluwalhati sa iyong pangalan? Sapagkat ikaw lamang ang banal. Ang lahat ng mga bansa ay darating at sasamba sa harapan mo, sapagkat nahayag na ang iyong mga matuwid na gawa.”

⁵Pagkatapos nito ay tumingin ako, at ang templo, ang tolda ng patotoo, ay nabuksan sa langit. ⁶Lumabas mula sa templo ang pitong anghel na may pitong salot, nakadamit ng malinis at maningning na lino, na may mga sintas na ginto sa palibot ng kanilang dibdib.

⁷Pagkatapos ay ibinigay ng isa sa apat na buhay na nilalang sa pitong anghel ang pitong mangkok na ginto na puno ng poot ng ating Ama, na nabubuhay magpakailanpaman. ⁸Ang usok mula sa kaluwalhatian ng ating Ama at mula sa kaniyang kapangyarihan ay pumuno sa templo; walang sinumang makakapasok dito hanggang matapos ang pitong salot ng pitong anghel.