Miliri Isanu ndi Iwiri Yotsiriza
Amene adakana chilombo aima pambali pa nyanja yagalasi akuimba nyimbo ya Mose ndi ya Mwanawankhosa, ponena kuti njira za Atate athu ndi zolungama ndi zoona. Angelo asanu ndi awiri atuluka atavala nsalu yabafuta yonyezimira ali ndi mbale zisanu ndi ziwiri, ndipo utsi udzaza Nyumba ya Mulungu kotero kuti palibe angalowemo mpaka zitathiridwa.
15 1Ndinaona chizindikiro china kumwamba, chachikulu ndi chodabwitsa: angelo asanu ndi awiri atanyamula miliri isanu ndi iwiri yotsiriza, pakuti mwa iyo mkwiyo wa Atate wathu unatha.
2Ndinaona chinthu chooneka ngati nyanja ya galasi yosakanizidwa ndi moto, ndipo pambali pake panaima iwo amene anagonjetsa chilombo, ndi chifaniziro chake, ndi chiwerengero cha dzina lake, atanyamula azeze ochokera kwa Atate wathu. 3Ndipo anaimba nyimbo ya Mose, mtumiki wa Atate wathu, ndi nyimbo ya Yesu, Mwanawankhosa, nati: “Ntchito zanu nzazikulu ndi zodabwitsa, Inu Atate Wolamulira, Wamphamvuzonse! Njira zanu nzolungama ndi zoona, Inu Mfumu ya mitundu ya anthu! 4Ndani sadzakuopani Inu, Atate, ndi kulemekeza dzina lanu? Pakuti ndinu nokha oyera. Mitundu yonse ya anthu idzadza, nilambire pamaso panu, pakuti zochita zanu zolungama zavumbulutsidwa.”
5Zitatha izi ndinayang'ana, ndipo kachisi, chihema cha umboni, anatsegulidwa kumwamba. 6Angelo asanu ndi awiri aja a miliri isanu ndi iwiri anatuluka m'kachisi, atavala nsalu zabafuta zoyera ndi zonyezimira, atamanga malamba agolide m'zifuwa mwawo.
7Ndipo chimodzi cha zamoyo zinayi chija chinapatsa angelo asanu ndi awiri aja mbale zisanu ndi ziwiri zagolide zodzala ndi mkwiyo wa Atate wathu, amene ali ndi moyo kunthawi za nthawi zonse. 8Ndipo utsi wochokera ku ulemerero wa Atate wathu ndi ku mphamvu zake unadzaza kachisi; ndipo panalibe munthu amene akanatha kulowamo kufikira miliri isanu ndi iwiri ya angelo asanu ndi awiri aja itatha.
