Ibiza indwi vya nyuma
Abanse igikoko bahagaze iruhande y'ikiyaga c'ikirahure baririmba indirimbo ya Musa n'iy'Umwagazi w'intama, bavuga ko inzira za Data wacu zigororotse kandi ari iz'ukuri. Abamarayika indwi basohoka bambaye impuzu z'ibitani zirabagirana bafise ibibakure indwi, umwotsi ukuzura urusengero ku buryo ata n'umwe ashobora kwinjira gushika bisutse.
15 1Nabonye ikindi kimenyetso mw’ijuru, gihambaye kandi gitangaje: abamarayika indwi bafise ibiza indwi vya nyuma, kuko muri vyo ari ho uburake bwa Data wa twese bwaheze.
2Maze mbona ikintu gisa n’ikiyaga c’ikirahure kivanze n’umuriro, hamwe n’abari bahagaze iruhande ryaco, abari banesheje ca gikoko n’ikigirwamana caco n’igitigiri c’izina ryaco, bafise inanga bahawe na Data wa twese. 3Nuko baririmba ururirimbo rwa Musa, umusavyi wa Data wa twese, be n’ururirimbo rwa Yesu, ya Mwagazi w’intama, bati: “Ibikorwa vyawe birahambaye kandi biratangaje, Data Mwami Mushoboravyose! Inzira zawe zigororotse kandi ni iz’ukuri, Mwami w’amahanga! 4Ni nde atazogutinya, Data, ngo aninahaze izina ryawe? Kuko ari wewe wenyene uri mweranda. Amahanga yose azoza asenge imbere yawe, kuko ibikorwa vyawe vyo kugororoka vyahishuwe.”
5Inyuma y’ivyo ndaraba, mbona ingoro, rwa rusengero rw’ihema ry’intahe, rwuguruwe mw’ijuru. 6Maze bamwe mu bamarayika indwi bafise ibiza indwi baduga bava mu rusengero, bambaye impuzu z’ilino zityoroye kandi zaka, bakenyeje imikanda y’inzahabu ku bikiriza.
7Nuko kimwe mu bizima bine giha abamarayika indwi ibibindi indwi vy’inzahabu vyuzuye uburake bwa Data wa twese, we abaho ibihe bidashira. 8Umwotsi uvuye mu bwiza bwa Data wa twese no mu bubasha bwiwe wuzura mu rusengero; nta muntu yashobora kurwinjiramwo gushika aho ibiza indwi vy’abamarayika indwi biheze.
