Izibetho Ezisixhenxe Zokugqibela
Abo babelalile irhamncwa bema ngasecaleni lolwandle lweglasi bevuma ingoma kaMoses neyeMvana, besithi iindlela zikaBawo wethu zilungile ziyinyaniso. Kuphuma izithunywa ezisixhenxe zivethe ilinen eqaqambileyo ziphethe iingqayi ezisixhenxe, uze umsi uzalise itempile ukuze kungabikho namnye onokungena bade baziphalaze.
15 1Ndabona omnye umqondiso ezulwini, omkhulu nomangalisayo: izithunywa ezisixhenxe ziphethe izibetho ezisixhenxe zokugqibela, kuba ngazo yaphela ingqumbo kaBawo wethu.
2Ndabona into enjengolwandle lweglasi oluxutywe nomlilo, baza bema ngasecaleni lalo abo babeyoyisile irhamncwa, nomfanekiso walo, nenani legama lalo, bephethe iihadi ezivela kuBawo wethu. 3Baza bavuma ingoma kaMoses, umkhonzi kaBawo wethu, nengoma kaYesu, iMvana: “Mikhulu, iyamangalisa imisebenzi yakho, Nkosi Bawo wethu uSomandla! Zilungile, ziyinyaniso iindlela zakho, Kumkani weentlanga! 4Ngubani ongayi kukoyika, Bawo, azukise igama lakho? Kuba nguwe wedwa ongcwele. Zonke iintlanga ziya kuza ziqubude phambi kwakho, kuba imisebenzi yakho yobulungisa ityhilekile.”
5Emva koko ndakhangela, yaza yavuleka ezulwini itempile, intente yesingqino. 6Zaphuma etempileni izithunywa ezisixhenxe ezinezibetho ezisixhenxe, zambethe ilinen ecocekileyo neqaqambileyo, zibhinqe imibhinqo yegolide ezifubeni zazo.
7Saza esinye sezinto ezine eziphilileyo sanika izithunywa ezisixhenxe iingqayi ezisixhenxe zegolide, zizele yingqumbo kaBawo wethu, ohleli ngonaphakade kanaphakade. 8Umsi ovela ebuqaqawulini bukaBawo wethu nasemandleni akhe wayizalisa itempile; akubangakho mntu wayenokungena kuyo, zada zaphela izibetho ezisixhenxe zezithunywa ezisixhenxe.
