Thonbü Shieinang Nyet
Meisiau to akümbü shuongei hinseibü mangchüh yungnyu danka loan, seneibü Bou khangenbou Mosa chia hoba lambü chia atkei, seneibü Bou lamnyu shuong saopobü hoba ngühmai ki dogo laukei. Khuthük hangangbü nyet kho phau nyet yoa neisimei thupaibü neian louan, hoba lembüchem kho kou wankhükei shenkei, khei yingalonga phau kho koula ongbüa aoei lembüchem to louen amulabü.
15 1Ngei khuthüka lubü amaaphilabü che hapbei, yaangbü hoba maangpanglabü: thonbü shieinangei nyet shenbü khuthük hangangbü nyet, aishanga khübü ka seneibü Bou maangshat penkei.
2Ngei wan yoa kheiyobü mangchüh yungnyu tegübü che hapbei, hoba meisiau, khoeibü heangsho, hoba khoeibü nyen lühbü shian apbü shuong kho, seneibü Bou ka kibü pithung shenan, khünei napheinei loan kikei. 3Hobaje haoenei seneibü Bou khangenbou Mosa chia, hoba San Shoushou Jisu chia atko laukei, “Kaibü kümsilei yaangbü hoba maangpanglabü ki, O pendou Thükenbou Bunyubou Mühghaü! Kaibü lamnyu shuong saopobü hoba ngühmai ki, phangshuongeibü Choba! 4O Abou, aoyouei no ahatlabü hoba kaibü nyen asoneikangtilabü? Aishanga no mütpemei saopobü ki. Phangshuong pendou louan no thedanga lemlabü, aishanga kaibü saopobü kümsilei tang khitan lenkei.”
5Kho phaia ngei chühkei, hoba khuthüka lembüchem, ngühkhüm neichem, ipbukei. 6Shieinangei nyet jinbü khuthük hangangbü nyet kho, saopobü ngesakbü phembanei neian, hoba haoeneibü chesil ka honeibü khude kaian, lembüchem ka longkei.
7Kheijinei langkei kibü leia yoa cheei, ponpen thon akiko langbü seneibü Bou maangshatei shenbü hon thung nyet, khuthük hangangbü nyet la kukei. 8Seneibü Bou soneikangbü ka hoba haoeibü hau ka longbü wankhükei lembüchem shenkei; khuthük hangangbü nyet shieinangei nyet penshongko, müt aoeikei khüto atla athükkei.
