Me basika na mukanda
Dibuku

Bimbevo Nsambwadi ya Nsuka

Bayina buyaka kibulu ke telama na lweka ya mubu ya kitala-tala, ke yimbila mukunga ya Moyize mpe mukunga ya Mwana-Dimeme, ke tuba ti banzila ya Tata ya beto kele ya kudedama mpe ya tsyelika. Bambazi nsambwadi ke basika na bilele ya lino ya kulezima, na bandonga nsambwadi, mpe mulinga ke fuluka Yinzo ya Nzambi, samu ti muntu lenda kota ve tii ntangu ba ke losa bandonga yina na ntoto.

Kapu 15.

Mu talaka kidimbu ya nkaka na zulu, ya nene mpe ya ngitukulu: bambazi nsambwadi yina vwandaka simba bimbevo nsambwadi ya nsuka, samu ti na yawu nkele ya Tata ya beto manaka.

Mu talaka kima yina vwandaka talana mutindu mubu ya kitala-tala, yina ba vukisaka na tiya. Bantu yina nungaka kibulu, kifwani ya yawu, mpe lutangu ya nkumbu ya yawu, vwandaka telama na lweka ya mubu yina, bawu vwandaka simba bansambi yina katukaka na Tata ya beto. Mpe bawu yimbilaka mukunga ya Moyize, kisadi ya Tata ya beto, mpe mukunga ya Yesu, Dimeme: «Bisalu ya nge kele ya nene mpe ya ngitukulu, Tata Nzambi-Mpungu! Banzila ya nge kele ya kudedama mpe ya tsyelika, Ntinu ya bayinsi! Nani ke vwanda na boma ya nge ve, Tata, mpe kembisa nkumbu ya nge? Samu ti nge kaka mosi kele ya longo. Bayinsi nyonso ke kwiza mpe fukama na ntwala ya nge, samu ti mambu ya nge ya kudedama me monikina.»

Na manima ya mambu yayi, mu talaka, mpe Yinzo ya Nzambi, Tenta ya Kimbangi, ba fungulaka yawu na zulu. Bambazi nsambwadi yina vwandaka na bimbevo nsambwadi basikaka na Yinzo ya Nzambi. Bawu vwandaka ya kulwata balele ya lino ya kuvedila mpe ya kulezima, mpe mikaba ya wolo na bantulu ya bawu.

Na yina, mosi na kati ya bima ya moyo iya pesaka bambazi nsambwadi bandonga nsambwadi ya wolo yina vwandaka ya kufuluka na nkele ya Tata ya beto, yina ke zinga seko na seko. Mulinga yina katukaka na nkembo ya Tata ya beto mpe na ngolo ya yandi fulusaka Yinzo ya Nzambi. Ata muntu lendaka kukota kuna ve tii ntangu bimbevo nsambwadi ya bambazi nsambwadi manaka.