ሸውዓተ ናይ መወዳእታ መቕሰፍቲ
እቶም ነቲ ኣራዊት ዝነፈግዎ ኣብ ጥቓ ባሕሪ መስትያት ደው ኢሎም መዝሙር ሙሴን መዝሙር እቲ ገንሸልን ይዝምሩ፥ መንገድታት ኣቦና ቅኑዕን ሓቀኛን ኢሎም ይፅውዑ። ሸውዓተ መላእኽቲ ብሩህ ሃሪ ተኸዲኖም ምስ ሸውዓተ ጭሐሎታት ይወፁ፥ ትኪ ድማ ነቲ መቕደስ ይመልኦ፥ ክሳዕ ዝፍሰሱ ሓደኳ ክኣቱ ኣይኽእልን።
15 1ኣብ ሰማይ ካልእ ዓብዪን ዘገርምን ምልክት ረአኹ፦ ቍጥዓ ኣቦና ብኣኣቶም ተፈፂሙ እዩ እሞ፥ ሸውዓተ መላእኽቲ ነቶም ሸውዓተ ናይ መወዳእታ መቕሰፍቲ ሒዞም ነበሩ።
2ብሓዊ ዝተሓወሶ ከም መስትያት ዝመስል ባሕሪ ረአኹ፤ እቶም ነቲ ኣራዊትን ንምስሉን ንቝፅሪ ስሙን ዝሰዓሩ ድማ፥ ናይ ኣቦና በገናታት ሒዞም ኣብ ጥቓኡ ደው ኢሎም ነበሩ። 3ንሳቶም ድማ መዝሙር ሙሴ ባርያ ኣቦናን መዝሙር ኢየሱስ እቲ በጊዕን ከምዙይ እናበሉ ዘመሩ፦ “ግብርታትካ ዓብዪን ዘገርምን እዩ፥ ኦ ኵሉ እትኽእል ጐይታ ኣቦ! መንገድታትካ ቅኑዕን ሓቀኛን እዩ፥ ኦ ንጉስ ኣህዛብ! 4ኦ ኣቦ፥ ዘይፈርሀካን ንስምካ ዘየኽብርን መን እዩ? ንስኻ በይንኻ ቅዱስ ኢኻ እሞ። ኵሎም ኣህዛብ መፂኦም ኣብ ቅድሜኻ ክሰግዱ እዮም፤ ፅድቂ ግብርታትካ ተገሊፁ እዩ እሞ።”
5ድሕሪዙይ ረአኹ፥ እቲ መቕደስ፥ እቲ ድንኳን ምስክር፥ ኣብ ሰማይ ተኸፈተ። 6እቶም ነቲ ሸውዓተ መቕሰፍቲ ዝሓዙ ሸውዓተ መላእኽቲ፥ ንፁህን ብሩህ ሃሪ ተኸዲኖም፥ ኣብ ኣፍ ልቦም ድማ ናይ ወርቂ ቅናት ተዓጢቖም፥ ካብቲ መቕደስ ወፁ።
7ሽዑ ካብቶም ኣርባዕተ ህያዋን እንስሳ ሓደ፥ ነቶም ሸውዓተ መላእኽቲ፥ ብቍጥዓ እቲ ንዘለኣለመ ኣለም ህያው ኮይኑ ዝነብር ኣቦና ዝመልአ ሸውዓተ ናይ ወርቂ ጭሐሎታት ሃቦም። 8ካብ ክብሪ ኣቦናን ካብ ሓይሉን ዝወፀ ትኪ ነቲ መቕደስ መልኦ፤ እቲ ናይ እቶም ሸውዓተ መላእኽቲ ሸውዓተ መቕሰፍቲ ክሳዕ ዝውዳእ፥ ሓደኳ ናብቲ መቕደስ ክኣቱ ኣይከኣለን።
