እቲ ገንሸልን እቶም 144,000ን

እቲ ገንሸል ኣብ እምባ ፅዮን ምስ እቶም ስም ኣቦኡ ኣብ ግምባሮም ዘለዎም ሚእትን ኣርብዓን ኣርባዕተን ሽሕ ደው ይብል፥ ንሳቶም ካልእ ክመሃሮ ዘይኽእል መዝሙር ይፈልጡ። ሰለስተ መላእኽቲ ይበርሩ፦ ንዅሉ ህዝቢ ብስራት፥ ውድቀት ባቢሎን፥ ነቶም ንኣራዊት ዝሰግዱ መጠንቀቕታ። ደሓር እታ ምድሪ ትዕፀድ፥ እቲ ወይኒ ድማ ይረግፅ።

ምዕራፍ 14።

ነቲ ገንሸል ንኢየሱስ ኣብ እምባ ፅዮን ደው ኢሉ እንተሎ ረኣኹ፤ ምስኡ ኸዓ ስሙን ስም ኣቦኡን ኣብ ግምባሮም ተፂሒፉ ዘለዎም ሚእትን ኣርብዓን ኣርባዕተን ሽሕ ነበሩ። ካብ ሰማይ ድማ ከም ድምፂ ብዙሕ ማያት ዝጓዝምን ከም ዓብዪ ነጐድጓድን ዝኾነ ድምፂ ሰማዕኹ፤ እቲ ዝሰማዕኽዎ ድምፂ ኸዓ ከም ተፃወትቲ በገና፥ ነቲ በገናታቶም እናተፃወቱ ዘስምዕዎ ነበረ። ኣብ ቅድሚ እቲ ዙፋንን እቶም ኣርባዕተ ህያዋን ፍጡራትን እቶም ሽማግለታትን ሓድሽ መዝሙር ዘመሩ፤ ነቲ መዝሙር ድማ ብዘይ እቶም ካብ ምድሪ ዝደሓኑ ሚእትን ኣርብዓን ኣርባዕተን ሽሕ፥ ሓደኳ ክመሃሮ ዝኽእል ኣይነበረን። እዚኣቶም እቶም ምስ ኣንስቲ ዘይረኸሱ እዮም፤ ደናግል እዮም እሞ። ናብቲ ዝኸዶ ዅሉ ነቲ ገንሸል ንኢየሱስ ይስዕብዎ። ካብ ሰብ ተዓዲጎም ድማ ንኣቦናን ንገንሸልን በዅሪ ፍረ ኾኑ፥ ኣብ ኣፎም ድማ ሓሰት ኣይተረኽበን፤ ፍፁማት እዮም።

እቲ ናይ ዘለኣለም ወንጌል ይውፅእ

ካልእ መልኣኽ ድማ ኣብ ማእኸል ሰማይ እናበረረ ረኣኹ፤ ንሱ ኸዓ ነቶም ኣብ ምድሪ ዝነብሩ፥ ንዅሉ ኣህዛብን ነገድን ቛንቋን ህዝብን ክሰብኽ፥ ናይ ዘለኣለም ወንጌል ሒዙ ነበረ። ዓው ኢሉ ኸዓ ከምዙይ በለ፦ “ንኣቦና ፍርሑ፤ ክብሪ ድማ ሃብዎ፤ ሰዓት ፍርዱ በፂሓ እያ እሞ። ነቲ ሰማይን ምድርን ባሕርን ዓይኒ ማያትን ዝፈጠረ ስገዱ።”

ካልኣይ መልኣኽ ድማ ሰዓቦ፤ ከምዙይ ከዓ በለ፦ “እታ ዓባይ ባቢሎን ወደቐት፥ ወደቐት፤ ንሳ ነቶም ኵሎም ኣህዛብ፥ ናይ ዝሙታ ፍትወት ወይኒ ኣስትያቶም እያ።”

ሳልሳይ መልኣኽ ድማ ሰዓቦም፤ ዓው ኢሉ ኸዓ ከምዙይ በለ፦ “እቲ ነቲ ኣራዊትን ነቲ ምስሉን ዝሰግድ፥ ኣብ ግምባሩ ወይ ኣብ ኢዱውን ምልክት ዝቕበል ዅሉ፥ ንሱ ኸዓ ነቲ ኣብ ፅዋዕ ቍጥዓኡ ተዳልዩ ዘሎ ዘይተሓወሶ ወይኒ ቍጥዓ ኣቦና ክሰቲ እዩ፤ ኣብ ቅድሚ እቶም ቅዱሳን መላእኽትን ኣብ ቅድሚ እቲ ገንሸልን ድማ ብሓዊን ዲንን ክሳቐ እዩ። ትኪ ስቓዮም ድማ ንዘለኣለመ ኣለም ይለዓል ኣሎ፤ እቶም ነቲ ኣራዊትን ነቲ ምስሉን ዝሰግዱ፥ ምልክት ስሙ ዝቕበሉ ዅሎም ከዓ ለይትን መዓልትን ዕረፍቲ የብሎምን።”

ትዕግስቲ እቶም ቅዱሳን እንሆ፦ እዚኣቶም እቶም ትእዛዛት ኣቦና ዝሕልዉን ብኢየሱስ ዘለዎም እምነት ዝሕዙን እዮም።

ካብ ሰማይ ከዓ ድምፂ ሰማዕኹ፦ “ካብ ሕዚ ጀሚሮም ብጐይታ ዝሞቱ ምዉታት ብፁኣን እዮም እሞ ፀሓፍ።” መንፈስ ቅዱስ ድማ “እወ፥ ካብ ጻዕሮም ይዓርፉ፤ ግብሮም ከዓ ይስዕቦም እዩ” ይብል።

ወዲ ሰብ ዝመስል ሓደ

ጠሚተ ድማ፥ እንሆ ፀዓዳ ደመና ረኣኹ፤ ኣብ ልዕሊኣ ኸዓ ወዲ ሰብ ዝመስል ሓደ፥ ንሱ ድማ ኢየሱስ ተቐሚጡ ነበረ፤ ኣብ ርእሱ ወርቃዊ ኣኽሊል፥ ኣብ ኢዱ ድማ በሊሕ ማዕፀድ ነበሮ። ካልእ መልኣኽ ድማ ካብ ቤተ መቕደስ ወፀ፤ ነቲ ኣብ ደመና ተቐሚጡ ዝነበረ ዓው ኢሉ ኸዓ ከምዙይ በሎ፦ “ሰዓት ምዕፃድ በፂሓ እያ፥ ዓፂድ ምድሪ ድማ ኣዝዩ በሲሉ እዩ እሞ ማዕፀድካ ስደድ፥ ዕፆድ።” ሽዑ እቲ ኣብ ደመና ዝነበረ ማዕፀዱ ናብ ምድሪ ወርወረ፤ ምድሪ ድማ ተዓፅደት።

ሽዑ ኻልእ መልኣኽ ካብታ ኣብ ሰማይ ዘላ ቤተ መቕደስ ወፀ፤ ንሱውን በሊሕ ማዕፀድ ነበሮ። ኣብ ልዕሊ እቲ ሓዊ ስልጣን ዘለዎ ኻልእ መልኣኽ ድማ ካብቲ መሰውኢ ወፀ፤ ነቲ በሊሕ ማዕፀድ ዝሓዘ ዓው ኢሉ ኸዓ ከምዙይ በሎ፦ “ፍረ ወይኒ ምድሪ በሲሉ እዩ እሞ ነቲ በሊሕ ማዕፀድካ ስደድ፥ ኣስካል ወይኒ ምድሪ ኣክብ።” እቲ መልኣኽ ድማ ማዕፀዱ ናብ ምድሪ ከተተ፤ ወይኒ ምድሪ ዓፀደ፤ ናብቲ ዓብዪ መፅመቚ ወይኒ ቍጥዓ ኣቦና ኸዓ ደርበዮ። እቲ መፅመቚ ወይኒ ድማ ኣብ ወፃኢ እታ ኸተማ ተረግፀ፤ ደም ከዓ ካብቲ መፅመቚ ወይኒ ውሒዙ፥ ክሳዕ ልጓም ፈረስ ዝበፅሕ ኾይኑ፥ ኣስታት ሚእትን ሰማንያን ማይል ኣቢሉ ፈሰሰ።