Phongkhami 14

14 ¹Ina Yaonao, Jishu, Zion Kaphungli khanganing thei, kala 144,000 mibingwui khaveili awui aming kala awui Avāwui aming kapisang lei. ²Ina kazingramwui eina akhon akha shā, tara̱ kachungkha kakhangang thāda kala kazing khangashum panglāk thāda; kala ina shā akhon chi tingteilā kahuikhon kasābingna athumwui tingteilā huida khon thai. ³Athumna wungpamkhong, kharinga sāyurbing mati, kala khararnaobingwui mangāli laa kadhar sai; okathuiwui eina kanshokmi kahai 144,000 maningla chi tamkhuishapa. ⁴Hibing hi sha̱naobingli ngasoda makathar masā kahaibingna, kaja athum kachingva̱na. Yaonao Jishu khaleipam kachida athumna ali shurra. Athum mibingwui ngachaili eina lokhui kahaibing, ithumwui Avā kala Yaonaowui vang matheikhare ngarāna, ⁵kala athumwui khamorli kakapik akhala masamphangmana; athum shāt makāna.

Katang Makhavai Paokaphā Hāshoka

⁶Ina kazingrao khangatei akha, katang makhavai paokaphā zangda kazingramli yongkazata thei; ana okathuili kapambing, yur kachiva̱, shang, tuiyur, kala mibingli vaomalānmi khavaina. ⁷Ana panglāk eina vaoda hānga, "Ithumwui Avāli khangacheelu, ali tekmatei ngasaklu, kaja awui bichar atam rāhaira. Kazing, ngalei, ngayi, kala ura̱pam kasaa chili khorumlu."

⁸Kazingrao kakhanena athi shurda hānga, "Babylon haklak pitāhao, pitāhaohaira! Ana yur saikorali awui shām kasāwui khamathang-khamarangwui drakhāra̱ mangngasaka."

⁹Kazingrao kakathumana athi shurda panglāk eina vaoda hānga, "Sāyur kala awui ama̱li khoruma, kala awui khavei lah pāngli khudam khuida mi kachiva̱na, ¹⁰ana ithumwui Avāwui malungkhavātwui drakhāra̱, awui malungli tengkotli manāt makhalei chi mangra; kala kazingrao kathara kala Yaonaowui mangāli meiwon kala meiri eina ningrāk ngasakra. ¹¹Athumwui ningrākwui meikhut chi katang makhavai shokchingra; sāyur kala awui ama̱li khoruma, lah awui nameiwui khudam samkaphangbing chi ngashun ngayā ngasām maleimana."

¹²Ithumwui Avāwui ningkhami mayonda kala Jishuli shitkasangda khalei katharabingwui khāngkathei chi hili lei.

¹³Ina kazingramwui eina akhon akha shā, "Kapilu: Ara eina thuida Proholi shitsangda thikahaibing chi ringkaphava̱na." "Mha," da Manglā Katharana hānga, "athum athumwui ot eina ngasāmra, kaja athumwui otsak china athumli shurra."

Miwui Naomayara Thāda Akha

¹⁴Ina yangda muiyā kachar akha thei, kala chiwuitungli miwui naomayara thāda akha, Jishu, pama. Awui kuili sinā kuihon ngahona, kala awui pāngli chāngkui sharuk akha singa. ¹⁵Kazingrao khangatei akhana khorumshim eina shokta, muiyātungli kapama chili panglāk eina vaoda hānga, "Nawui chāngkui singda hātkhuilu; hātkhavai atam rāhaira, okathuiwui māhā chi minhaira." ¹⁶Chieina muiyātungli kapama china awui chāngkui okathuitungli singda, okathui hātkhuihaowa.

¹⁷Chiwui thili kazingramli khalei khorumshimwui eina kazingrao khangatei akha shokta, anala chāngkui sharuk akha zanga. ¹⁸Meiwuitungli pangshap leilak kahai kazingrao khangatei akha hanphutwui eina shoklaga, kazana chāngkui kasinga chili panglāk eina vaoda hānga, "Nawui kazana chāngkui chi chihovāda okathuiwui drakhārong eina amazānbing kazipkhuilu, kaja chiwui drakhāthei minhaira." ¹⁹Kazingrao china awui chāngkui okathuili ngaruiwutmihaowa, kala okathuiwui drakhārong hātkhuihaowa, kala chi ithumwui Avāwui malungkhavātwui vaichum kahakva̱ chili horsanga. ²⁰Vaichum chi keinungwui ayarli naikazama, kala vaichumwui eina ashee sigui nārenra̱ kaji vāshungda, mile shākha hangchishat shakha peida longshoka.