啟示錄 14

14 ¹我見到羔羊耶穌企喺錫安山上面，同佢一齊嘅有十四萬四千人，額頭上面寫住佢嘅名同佢父嘅名。 ²我聽見有把聲音由天上嚟，好似眾水嘅轟鳴，又好似響亮嘅雷聲；我所聽見嘅聲音，又好似彈琴嘅人喺度彈緊琴。 ³佢哋喺寶座前，喺四個活物同眾長老面前唱一首新歌；除咗嗰十四萬四千個由地上被贖出嚟嘅人之外，冇人學得到呢首歌。 ⁴呢啲就係冇同女人沾染污穢嘅人，因為佢哋係童身。羔羊耶穌無論去到邊度，佢哋都跟住佢。佢哋係由世人中間被贖出嚟，作為初熟嘅果子獻俾我哋嘅父同羔羊， ⁵喺佢哋口中搵唔到謊言，佢哋係毫無瑕疵嘅。

永遠嘅福音傳開去

⁶我又見到另一位天使喺半空中飛，佢有永遠嘅福音要傳俾住喺地上嘅人，就係各國、各族、各種語言、各民族嘅人。 ⁷佢大聲喊：「你哋要敬畏我哋嘅父，將榮耀歸俾佢，因為佢審判嘅時候到喇。你哋要敬拜嗰位創造天、地、海同眾水泉源嘅。」

⁸第二位天使跟住嚟：「傾倒喇！傾倒喇！大巴比倫！佢曾經俾列國飲佢淫亂邪情嘅酒。」

⁹第三位天使又跟住嚟，大聲喊：「凡係敬拜嗰隻獸同佢嘅像，又喺自己額頭或者手上受咗記號嘅， ¹⁰佢都要飲我哋嘅父忿怒嘅酒，就係佢震怒嘅杯裏面斟落嘅純酒；佢仲要喺眾聖天使同羔羊面前，喺火同硫磺裏面受痛苦。 ¹¹佢哋受痛苦所發出嘅煙，永永遠遠往上升；嗰啲敬拜獸同佢嘅像、又受咗佢名字記號嘅人，晝夜都得唔到安息。」

¹²聖徒嘅忍耐就喺呢度：佢哋就係守我哋嘅父嘅誡命、又持守對耶穌嘅信心嘅人。

¹³我聽見有把聲音由天上嚟，話：「你要寫低：從今以後，喺主裏面死嘅人有福喇！」聖靈話：「係嘅，佢哋歇息，唔使再勞苦，因為佢哋所做嘅工作會跟住佢哋。」

一位好似人子嘅

¹⁴我一望，見到一朵白雲，雲上面坐住一位好似人子嘅，就係耶穌；佢頭上戴住金冠冕，手裏面攞住一把鋒利嘅鐮刀。 ¹⁵另一位天使由聖殿出嚟，大聲向坐喺雲上面嗰位喊：「揮動你把鐮刀去收割啦，因為收割嘅時候到喇，地上嘅莊稼已經完全成熟。」 ¹⁶於是坐喺雲上面嗰位就將佢把鐮刀向地上揮過去，地上嘅莊稼就俾人收割咗。

¹⁷跟住又有另一位天使由天上嘅聖殿出嚟，佢都攞住一把鋒利嘅鐮刀。 ¹⁸另一位有權管火嘅天使由祭壇嗰度出嚟，大聲向攞住鋒利鐮刀嗰位喊：「揮動你把鋒利嘅鐮刀，將地上葡萄樹嘅串串葡萄收埋嚟啦，因為啲葡萄已經熟喇。」 ¹⁹嗰位天使就將佢把鐮刀向地上揮過去，收割咗地上嘅葡萄樹，掉入我哋嘅父忿怒嘅大酒醡裏面。 ²⁰嗰個酒醡喺城外面俾人踹，有血由酒醡流出嚟，高到馬嚼環嗰度，流咗大約一百八十英里咁遠。