Ufunuo 14

14 ¹Nikamwona Mwana-Kondoo, Yesu, amesimama juu ya Mlima Sayuni, na pamoja naye watu 144,000 wenye jina lake na jina la Baba yake yameandikwa katika vipaji vya nyuso zao. ²Nikasikia sauti kutoka mbinguni kama mngurumo wa maji mengi na kama ngurumo kuu ya radi, na sauti niliyoisikia ilikuwa kama wapiga vinubi wakivipiga vinubi vyao. ³Wakaimba wimbo mpya mbele ya kile kiti cha enzi, na mbele ya wale wenye uhai wanne, na wale wazee; hakuna aliyeweza kujifunza wimbo huo ila wale 144,000 waliokombolewa kutoka duniani. ⁴Hawa ndio wale wasiotiwa unajisi pamoja na wanawake, kwa maana ni bikira. Hawa humfuata Yesu, Mwana-Kondoo, kokote aendako; walinunuliwa kutoka miongoni mwa wanadamu, malimbuko kwa Baba yetu na kwa Mwana-Kondoo, ⁵wala uongo haukuonekana vinywani mwao; hawana lawama.

Injili ya Milele Yatangazwa

⁶Kisha nikamwona malaika mwingine akiruka juu angani, mwenye injili ya milele aitangaze kwa wakaao duniani—kwa kila taifa, na kabila, na lugha, na jamaa. ⁷Akapaza sauti kuu, akisema, "Mcheni Baba yetu, na kumtukuza, kwa maana saa ya hukumu yake imekuja. Msujudieni yeye aliyeziumba mbingu, na nchi, na bahari, na chemchemi za maji."

⁸Malaika wa pili akafuata, akisema, "Umeanguka, umeanguka Babeli ule mkuu, aliyeyanywesha mataifa yote mvinyo wa ghadhabu ya uasherati wake."

⁹Malaika wa tatu akafuata, akipaza sauti, akisema, "Mtu ye yote amsujudiaye yule mnyama na sanamu yake, na kupokea chapa katika kipaji cha uso wake au mkononi mwake, ¹⁰yeye naye atakunywa mvinyo wa ghadhabu ya Baba yetu, uliomiminwa pasipo kuchanganywa katika kikombe cha hasira yake, naye atateswa kwa moto na kiberiti mbele ya malaika watakatifu na mbele ya Mwana-Kondoo. ¹¹Na moshi wa mateso yao hupanda juu milele na milele; wala hawana raha mchana wala usiku, hao wamsujudiao yule mnyama na sanamu yake, na kila apokeaye chapa ya jina lake."

¹²Hapa ndipo penye saburi ya watakatifu, wale wazishikao amri za Baba yetu na kuidumisha imani yao kwa Yesu.

¹³Kisha nikasikia sauti kutoka mbinguni ikisema, "Andika: Heri wafu wafao katika Bwana tangu sasa." "Naam," asema Roho Mtakatifu, "wapate kupumzika baada ya taabu zao, kwa kuwa matendo yao yawafuata."

Mmoja Kama Mwana wa Adamu

¹⁴Kisha nikatazama, na tazama, wingu jeupe, na juu ya wingu ameketi mmoja kama mwana wa Adamu—Yesu—mwenye taji ya dhahabu kichwani mwake, na mundu wenye makali mkononi mwake. ¹⁵Malaika mwingine akatoka hekaluni, akimwita kwa sauti kuu yeye aliyeketi juu ya wingu, akisema, "Tia mundu wako, ukavune; kwa maana saa ya kuvuna imekuja, mavuno ya dunia yamekomaa kabisa." ¹⁶Basi yeye aliyeketi juu ya wingu akautupa mundu wake juu ya nchi, nayo nchi ikavunwa.

¹⁷Kisha malaika mwingine akatoka katika hekalu lililoko mbinguni, naye pia alikuwa na mundu wenye makali. ¹⁸Na malaika mwingine, mwenye mamlaka juu ya moto, akatoka madhabahuni, akampazia sauti kuu yeye aliyekuwa na ule mundu wenye makali, akisema, "Tia mundu wako wenye makali, ukakusanye vichala vya mzabibu wa dunia, kwa maana zabibu zake zimeiva." ¹⁹Malaika akautia mundu wake katika nchi, akauvuna mzabibu wa dunia, akazitupa zabibu katika shinikizo kuu la ghadhabu ya Baba yetu. ²⁰Nalo shinikizo likakanyagwa nje ya mji, na damu ikatoka katika shinikizo hilo hata kuufikia lijamu wa farasi, kiasi cha maili 180.